ភ្នំពេញ៖នៅថ្ងៃសុក្រនេះ មាសនៅលើទីផ្សារកម្ពុជា បានបន្តធ្លាក់ថ្លៃយ៉ាងគំហុកបើធៀបនឹងដើមសប្តាហ៍។ ពោលគឺ​មិន​ដល់​មួយ​សប្តាហ៍ផង តម្លៃមាស​​បាន​ដាំក្បាល​ចុះ​ចំនួន​១១០ ដុល្លារ​អាមេរិក ក្នុង​មួយ​តម្លឹង។

កាលពីថ្ងៃចន្ទដើមសប្តាហ៍ មាសមួយតម្លឹងមានតម្លៃ ២ ៩៣០ដុល្លារ ខណៈដែលថ្ងៃសុក្រទី២៤ ខែឧសភា នេះតម្លៃចុះមកត្រឹម ២ ៨២០ដុល្លារ។ នេះបើតាមការ​អះអាង​របស់​ក្រុម​អាជីវករ​លក់មាស​នៅ​រាជ​ធានីភ្នំពេញ។

អ្នកស្រី ចាន់ ម៉ាលីស អាជីវករលក់គ្រឿងអលង្ការជិត២០ឆ្នាំនៅផ្សារធំថ្មីប្រាប់ Apsara Tonight ថា មាសបានធ្លាក់ថ្លៃជាប់ៗគ្នាក្នុងរយៈពេលប៉ុន្មានថ្ងៃមកនេះ។ ស្របពេលមាសចុះថ្លៃ ចរន្តនៃការទិញលក់មាសក៏មានភាពស្ងប់ស្ងាត់ផងដែរ។

​អ្នកស្រី ស៊ឹម សុវិលក្ម្សី អ្នកលក់គ្រឿងអលង្ការមួយរូបទៀតនៅផ្សារធំថ្មីដែរ ក៏សម្គាល់ឃើញពីការធ្លាក់ចុះនូវតម្រូវការមាសដូចគ្នាដែរ។ អ្នក​ស្រីបញ្ជាក់​ថា អ្នក​ទិញ​មាស​មាន​ប្រមាណ​តែ១០ភាគរយប៉ុណ្ណោះខណៈដែល​អ្នក​យកមាស​មក​លក់​វិញ​ មានរហូត​ដល់ ៩០ភាគរយ។

អាជីវករលក់មាសមួយរូបទៀត អ្នកស្រី ជុត គីមសែ ​វាយតម្លៃថា បើទោះជាមាសធ្លាក់ថ្លៃ​មកវិញ នាពេលនេះតែតម្លៃមាសអាចហក់ឡើងដល់ ៣ពាន់ដុល្លារ ​មកវិញ ក្នុងមួយតម្លឹង ​មុននឹង​នៅ​ថេរ​តម្លៃ ឬចាប់​ផ្តើម​ចុះ​ជា​ថ្មី​ម្តងទៀត។

ប៉ុន្តែលោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុ នៃក្រុមហ៊ុន ភីភី លីង ស៊ីឃ្យួរិធី យល់ផ្ទុយពីនេះ។​ លោកគិតថា មាសអាចនឹងស្ទុះឡើងដល់ ៣ ០១០ដុល្លារ ​ក្នុង​មួយ​តម្លឹង​ក្នុងពេលឆាប់ៗខាងមុខ។ អ្នកវិភាគតម្លៃមាសរូបនេះ មើលឃើញថា ទំហំនៃការទិញមាសរបស់ក្រុមវិនិយោគិនលើពិភពលោកមានចំនួនច្រើនលើសលប់ ដែលរុញឱ្យតម្លៃមាសកាន់តែស្ទុះឡើងខ្លាំង ខណៈដែលប្រាក់ដុល្លារចុះខ្សោយការជួញដូរមាសមានស្ថិរភាពវែងឆ្ងាយជាង។

គួរសម្គាល់ថា តម្លៃមាសចាប់ផ្តើមស្ទុះឡើងនៅចុងឆ្នាំ២០២៣ប្រមាណ២ ៣០០ដុល្លារ ក្នុងមួយតម្លឹង។ ​ហើយតម្លៃ​មាស បន្តងើបឡើងដល់ ២ ៩៦០ដុល្លារ នៅខែមេសា ឆ្នាំ ២០២៤ ដែលជារដូវចូលឆ្នាំខ្មែរ។​ ប៉ុន្តែចូលដល់ខែឧសភា តម្លៃ​បានប្រែប្រួលទៅតាមទីផ្សារអន្តរជាតិ និងបានធ្លាក់ចុះជាប់ៗគ្នា នៅក្នុងសប្តាហ៍ទី៣នេះ។

យោងតាមភ្នាក់ងារសារព័ត៌មាន រ៉យទ័រ(Reuters) មាសបានធ្លាក់ចុះដល់កម្រិតទាបក្នុងសប្តាហ៍នេះ ដោយ​សារអ្នកវិនិយោគមានការភ័យខ្លាចចំពោះការប្រែប្រួលនៃគោលនយោបាយអត្រាការប្រាក់របស់សហរដ្ឋអាមេរិក និងសញ្ញារឹងមាំសាជាថ្មីសកម្មភាពអាជីវកម្មនានានៅអាមេរិក។ ប៉ុន្តែ Reuters ដោយផ្អែកលើអ្នកជំនាញលើកឡើងថា ការធ្លាក់ចុះនេះអាចក្នុងកម្រិតមួយប៉ុណ្ណោះ តែមិនបញ្ជាក់ថាមាសអាចនឹងឡើងថ្លៃវិញក្នុងកម្រិតណាទេ៕

ដោយ៖ទួន សុផល Apsara Tonight