បាត់ដំបង៖ ឯកឧត្តម សុខ លូ អភិបាលខេត្តបាត់ដំបង និង​ឯកឧត្តម ចាវ ហៃយាន អគ្គទីប្រឹក្សាស្ថានទូតចិនប្រចាំ​ព្រះរាជា ណាចក្រកម្ពុជា កាលពីព្រឹកថ្ងៃទី២៥ ខែឧសភា បានអញ្ជើញ​ចូលរួមសម្ពោធដាក់ឱ្យប្រើប្រាស់អគារសិក្សាថ្មីនិងសមិទ្ធផលនានា ក្នុងសាលារៀនចិន លាន ហួខេត្តបាត់ដំបងដែលទើប​កែលម្អនិងសាងសង៎បន្ថែមទៀតដើម្បីបំពេញសេចក្តីត្រូវការចាំបាច់របស់សាលា។ ពិធីនេះ ក៏មានវត្តមានឧកញ៉ា ចឹង មានហ្វា តំណាងសមាគមសម្ព័ន្ធ ខ្មែរ-ចិន នៅកម្ពុជា អ្នកតំណាងរា
ស្ត្រមណ្ឌលខេត្តបាត់ដំបង ថ្នាក់ដឹកនាំមន្ទីរជុំវិញខេត្ត និងភ្ញៀវ​ជាច្រើនរូប។

ថ្លែងក្នុងឱកាសនេះឯកឧត្តម ចាវ ហៃយាន អគ្គទីប្រឹក្សា​ស្ថាន​ទូតចិនប្រចាំកម្ពុជា បានចាត់ទុកសមិទ្ធផលដែលស្ថិត​នៅ​
ចំពោះមុខនិងសម្ពោធនៅថ្ងៃនេះបានបង្ហាញពីការខិតខំរួមគ្នារបស់សាខាសមាគមខ្មែរ-ចិន ខេត្តបាត់ដំបង និងពីថ្នាក់ដឹក
នាំសាលា លោកគ្រូអ្នកគ្រូ និងមិនអាចកាត់ផ្តាច់បានពីការ​ជួយ​ឧបត្ថម្ភគាំទ្ររបស់អាជ្ញាធរ នៃរដ្ឋបាលខេត្ត-ក្រុងមន្ទីរអប់រំ។​ឯកឧត្តមក៏បានកោតសរសើរនិងអរគុណដល់ថ្នាក់
ដឹក​នាំ​សាខាសមាគមនិងសាលារៀន ព្រមទាំងសប្បុរស​ជនខ្មែរ-ចិន ជិតឆ្ងាយ ដែលបានរួមចំណែកក្នុងការកសាង ដើម្បីជំរុញឱ្យការអប់រំបណ្តុះបណ្តាលធនធានភាសាចិនបានកាន់តែច្រើននិងដើម្បីរួមចំណែកពង្រឹងដល់ការអភិវឌ្ឍប្រទេសកម្ពុជា និងមិត្តភាព កម្ពុជា-ចិន ផងដែរ។

ចំណែកឯកឧត្តម សុខ លូ អភិបាលខេត្តបាត់ដំបង បានវាយ​តម្លៃខ្ពស់​ចំពោះសប្បុរសជនដែលជាម្ចាស់ជំនួយដែលបាន​រួមចំណែក ក្នុងការអភិវឌ្ឍនូវវិស័យអប់រំផ្នែកភាសាបរទេស​មាន ភាសាអង់គ្លេស,​បារាំង…ជាពិសេសភាសាចិន​ដែលកំពុង​តែមានការបណ្តុះបណ្តាលកាន់តែច្រើន នៅតាមបណ្តា​គ្រឹះស្ថាន​​សិក្សានានាក្នុងខេត្ត ឆ្លើយតបទៅនឹងយុទ្ធសាស្ត្រ​បញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧។

តាមការបញ្ជាក់ពីតំណាងសមាគមខ្មែរ-ចិនខេត្តបាត់ដំបងគឺ​សមិទ្ធផលនេះជាការរួមចំណែកក្នុងការអនុវត្តគោលនយោបាយរបស់រាជរដ្ឋាភិបាលកម្ពុជា”ស្តីពីការអប់រំនិងការបណ្តុះបណ្តាលធនធានមនុស្ស”ក្នុងគោលដៅកាត់បន្ថយភាពក្រីក្ររបស់ប្រជាជន និងដើម្បីជំរុញការអភិវឌ្ឍប្រទេស។អគារសិក្សា​ថ្មីនេះ ជាសមិទ្ធផលថ្មីមួយទៀតក្នុងចំណោម សមិទ្ធផលនានា ដែលមានក្នុងសាលារៀនចិន លាន ហ៊ួរ ដោយមានកិច្ច​សហការ​សម្របសម្រួលពីអាជ្ញាធរ មន្ទីរជំនាញពាក់ព័ន្ធ ជាមួយនិងសប្បុរសជនបានធ្វើឱ្យសាលារៀនសម្រេចបាននូវសមិទ្ធនិងអគារសិក្សាថ្មីបន្ថែមទៀតដោយចំណាយថវិកាសរុបចំនួន ២៦៦. ៥៥០,៥០ដុល្លារអាមេរិក៕
(អត្ថបទ-រូបភាព៖ អ៊ុក សំអាន បប)