ភ្នំពេញ៖ សារព័ត៌មានចិនស៊ីនហួរ និង ម៉ាឡេស៊ី The Star បានចេញផ្សាយនៅថ្ងៃទី២៦ និងទី២៧ ខែឧសភាថា គណៈកម្មាធិការជាតិរៀបចំការបោះឆ្នោត ហៅកាត់ថា (គ.ជ.ប) បានឲ្យដឹងថា គណបក្សប្រជាជនកម្ពុជា ដែលជាគណបក្សកាន់អំណាចនៅប្រទេសកម្ពុជា កាលពីថ្ងៃអាទិត្យទី២៦ ខែឧសភា បានទទួលសំឡេងច្រើនជាងគេ ក្នុងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង និងស្រុក សម្រាប់អាណត្តិទី៤ ឆ្នាំ២០២៤។

សារព័ត៌មានអន្តរជាតិធំៗទាំងពីរបានចេញផ្សាយទៀតថា គណបក្សនយោបាយចំនួន៥ រួមមាន គណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ គណបក្សហ៊្វុនស៊ីនប៉ិច និងគណបក្សខ្មែររួបរួមជាតិ បានចូលរួមការបោះឆ្នោតអសកល។ លទ្ធផលបឋមដែលចេញដោយ គ.ជ.ប និងបានប្រកាសពីការិយាល័យបោះឆ្នោតនីមួយៗនៅលើកញ្ចក់ទូរទស្សន៍រដ្ឋ TVK បានបង្ហាញថា គណបក្សប្រជាជនកម្ពុជាទទួលបានសំឡេងភាគច្រើននៅក្នុងការបោះឆ្នោតអសកល។ ប្រធាន គ.ជ.ប ឯកឧត្តម ប្រាជ្ញ ច័ន្ទ មានប្រសាសន៍ថា មេឃុំ និងសមាជិកក្រុមប្រឹក្សាចំនួន ១១.៥៩៨រូប ឬ ៩៩.៧៩ភាគរយនៃអ្នកដែលមានសិទ្ធិបោះឆ្នោតចំនួន ១១.៦២២នាក់ បានបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង និងស្រុកចំនួន ៤.២០០រូបកាលពីថ្ងៃអាទិត្យ។

ឯកឧត្តមបានថ្លែងក្នុងសន្និសីទសារព័ត៌មាននៅពេលបញ្ចប់ការបោះឆ្នោតថា ការបោះឆ្នោតបានប្រព្រឹត្តទៅដោយរលូនប្រកបដោយសន្តិសុខ និងសណ្តាប់ធ្នាប់ល្អ ហើយគ្មានអំពើហិង្សា ឬការបំភិតបំភ័យណាមួយឡើយ។ ឯកឧត្តមបន្តថា ការបោះឆ្នោតត្រូវបានប្រព្រឹត្តទៅដោយសេរី និងយុត្តិធម៌ ដោយផ្អែកលើគោលការណ៍ប្រជាធិបតេយ្យសេរីពហុបក្ស។

អ្នកនាំពាក្យគណបក្សប្រជាជនកម្ពុជា ឯកឧត្តម សុខ ឥសាន បានប្រាប់ទីភ្នាក់ងារសារព័ត៌មានចិនស៊ីនហួថា ផ្អែកលើចំនួនសរុបរបស់គណបក្ស គណបក្សប្រជាជនកម្ពុជាទទួលបានសំឡេងភាគច្រើនបំផុតនៅក្នុងការបោះឆ្នោតអសកល ដោយទទួលបានសំឡេងគាំទ្រប្រមាណ ១០.០៥២សំឡេង ឬប្រហែល ៨៦ភាគរយនៃសំឡេងឆ្នោតសរុប។

ឯកឧត្តមបន្ថែមថា នេះគឺជាជោគជ័យដ៏អស្ចារ្យមួយទៀតសម្រាប់គណបក្សប្រជាជនកម្ពុជា បន្ទាប់ពីយើងបានទទួលជ័យជម្នះភ្លូកទឹកភ្លូកដីនៅក្នុងការបោះឆ្នោតព្រឹទ្ធសភាក្នុងខែកុម្ភៈ ឆ្នាំ២០២៤ និងការបោះឆ្នោតសកលនៅខែកក្កដា ឆ្នាំ២០២៣។ បើតាមគណៈកម្មាធិការជាតិរៀបចំការបោះឆ្នោត លទ្ធផលផ្លូវការនឹងត្រូវផ្សព្វផ្សាយជាសាធារណៈនៅថ្ងៃទី៨ ខែមិថុនាខាងមុខនេះ ហើយការបោះឆ្នោតក្រុមប្រឹក្សារាជធានី ខេត្ត ក្រុង និងស្រុក នឹងត្រូវធ្វើឡើងម្តងក្នុងរយៈពេល៥ឆ្នាំក្រោយ៕

ប្រភព៖ ស៊ីនហួរ និង The Star ប្រែសម្រួលដោយ៖ ឈឹម ទីណា