ម៉ានីល៖ នៅថ្ងៃចន្ទនេះ ប្រធានាធិបតីប្រទេសអ៊ុយក្រែន លោក Volodymyr Zelenskyបានថ្លែងអំណរគុណដល់ប្រធានាធិបតីហ្វីលីពីន លោក Ferdinand Marcos Jr សម្រាប់ការគាំទ្រ និងការទទួលស្គាល់របស់ហ្វីលីពីន ចំពោះអធិបតេយ្យភាពអ៊ុយក្រែន ខណៈដែលទីក្រុង Kyiv នៅតែបន្តដោះស្រាយបញ្ហាឈ្លានពានរបស់រុស្ស៊ី។

មេដឹកនាំអ៊ុយក្រែន ដែលបានទៅដល់ប្រទេសហ្វីលីពីន ក្រោយពេលចាកចេញពីប្រទេសសិង្ហបុរីរូបនេះ ក៏បានអរគុណ ជាពិសេសចំពោះតួនាទីរបស់ហ្វីលីពីន នៅក្នុងដំណោះស្រាយរបស់អង្គការសហប្រជាជាតិ (UN) ដែលថ្កោលទោសការឈ្លានពានរបស់រុស្ស៊ី លើអ៊ុយក្រែន។

ចាប់តាំងពីសង្គ្រាមរវាងទីក្រុងមូស្គូ និងគៀវបានផ្ទុះឡើង កាលពីពីរឆ្នាំមុន ហ្វីលីពីនបានបោះឆ្នោតគាំទ្រដំណោះស្រាយចំនួនប្រាំមួយ នៃមហាសន្និបាតអង្គការសហប្រជាជាតិក្នុងគ្រាអាសន្នពិសេសស្តីពីអ៊ុយក្រែន ហើយបានគាំទ្រយ៉ាងខ្ជាប់ខ្ជួន នូវអធិបតេយ្យភាព ឯករាជ្យភាព និងបូរណភាពទឹកដី របស់ទីក្រុងគៀវ។

ជំនួបរវាងមេដឹកនាំទាំងពីរបានធ្វើឡើង បន្ទាប់ពីពួកលោកបានចូលរួមកិច្ចសន្ទនា Shangri-La នៅប្រទេសសិង្ហបុរី ដែលជាកិច្ចប្រជុំកំពូល ទាក់ទងនឹងកិច្ចការពារជាតិ នៅអាស៊ី កាលពីចុងសប្តាហ៍៕

ប្រភពពី Philippine News Acency ប្រែសម្រួល៖ សារ៉ាត