ហាណូយ៖ អ្នកជំនាញបាននិយាយកាលពីថ្ងៃពុធថា គ្រោះរាំងស្ងួត រលកកំដៅ និងសត្វល្អិត បង្កឡើងពីអាកាសធាតុក្តៅ និងស្ងួត បានបន្ទុចបង្អាក់ការលូតលាស់ នៃដើមកាហ្វេរបស់ប្រទេសវៀតណាម។

ប្រធានសមាគមកាហ្វេ និងកាកាវវៀតណាម (Vicofa) លោក Nguyen Nam Hai បានប្រាប់កាសែតបារាំង AFP ថា ដំណាំគ្រាប់កាហ្វេចាប់ពីឆ្នាំ ២០២៤ ដល់ឆ្នាំ ២០២៥ ការប្រមូលផលដែលចាប់ផ្តើមនៅក្នុងខែតុលា ទំនងជាធ្លាក់ចុះពី ១៥ ទៅ ២០ភាគរយ។ លោកបន្តថា រលកកំដៅ និងគ្រោះរាំងស្ងួតបានជះឥទ្ធិពលយ៉ាងខ្លាំងដល់ការដាំដុះ និងការលូតលាស់របស់ដើមកាហ្វេ ខណៈដែលកសិករពិបាករកប្រភពទឹកស្រោចស្រប់ដំណាំ។

ជាមធ្យមវៀតណាមផលិតកាហ្វេបានប្រហែល ១.៨លានតោនក្នុងមួយឆ្នាំ។ភាគច្រើននាំចេញជាងពាក់កណ្តាលទៅកាន់ទីផ្សារអឺរ៉ុប។ ក្រុមហ៊ុនស្រាវជ្រាវទីផ្សាររបស់អាមេរិក StoneX បានព្យាករណ៍ថា ទិន្នផលកាហ្វេរបស់វៀតណាមក្នុងឆ្នាំ២០២៤ ទំនងជាមានចំនួនត្រឹមតែ ១.៤លានតោនប៉ុណ្ណោះ ដែលនេះជាកម្រិតទាបបំផុតក្នុងរយៈពេល ៤ឆ្នាំ។

ប្រទេសវៀតណាម គឺជាអ្នកផ្គត់ផ្គង់គ្រាប់កាហ្វេ robusta ឈានមុខគេលើពិភពលោក ដែលជាគ្រាប់សណ្តែកប្រើនៅក្នុងផលិតផលរបស់ Nescafe និងម៉ាកយីហោផ្សេងៗទៀតនៅលើពិភពលោក។ ប៉ុន្តែបញ្ហាប្រែប្រួលអាកាសធាតុ បានបង្ហាញពីក្តីកង្វល់ដ៏ធ្ងន់ធ្ងរមួយ សម្រាប់ឧស្សាហកម្មកាហ្វេ ដែលមានតម្លៃរាប់ពាន់លានដុល្លារ។ គ្រាប់កាហ្វេ Robusta ត្រូវបានគេជឿថា អាចទប់ទល់នឹងសីតុណ្ហភាពក្តៅខ្លាំង បើធៀបនឹងគូប្រជែងរបស់ខ្លួន គឺគ្រាប់កាហ្វេ arabica។

ប៉ុន្តែពិភពលោកអាចនឹងប្រឈមមុខនូវការខ្វះខាតគ្រាប់កាហ្វេ robusta រហូតដល់ ៣៥លានកញ្ចប់នៅឆ្នាំ ២០៤០ នេះបើយោងតាមការស្រាវជ្រាវកាហ្វេពិភពលោក ដោយផ្អែកលើការកើនឡើងនៃនិន្នាការប្រើប្រាស់ និងផលប៉ះពាល់ពីវិបត្តិអាកាសធាតុ។ ក្រុមអ្នកស្រាវជ្រាវបាននិយាយថា ផ្ទៃដីមានជីវជាតិសម្រាប់ការដាំដុះគ្រាប់កាហ្វេ arabica នឹងធ្លាក់ចុះពាក់កណ្តាលនៅឆ្នាំ ២០៥០។ រីឯតម្លៃកាហ្វេសកលនឹងកើនឡើងយ៉ាងឆាប់រហ័សនៅក្នុងឆ្នាំ ២០២៤នេះ៕ ប្រភព៖ AFP ប្រែសម្រួលដោយ៖ ឈឹម ទីណា