មន្ទីរពេទ្យបង្អែករមាសហែកថ្មី ផ្តល់សេវាផ្នែកវះកាត់ជាលើកដំបូង
ស្វាយរៀង៖មន្ទីរសុខាភិបាលខេត្តស្វាយរៀងនៅថ្ងៃទី៦ ខែមិថុនាឆ្នាំ២០២៤នេះបានបង្ហាញវឌ្ឍនភាព និងសកម្មភាពផ្តល់សេវាផ្នែកវះកាត់ជាលើកដំបូងរបស់មន្ទីរពេទ្យបង្អែករមាសហែកថ្មី។
លោកវេជ្ជបណ្ឌិត គុជ ស៊ីថា ប្រធានមន្ទីរសុខាភិបាលខេត្តស្វាយរៀងបានឱ្យដឹងថា បន្ទាប់ពីមន្ទីរសុខាភិបាលខេត្តបានបង្កើតក្រុមការងារសម្របសម្រួលការងារវះកាត់របស់មន្ទីរពេទ្យបង្អែករមាសហែក មន្ទីរពេទ្យនេះបានផ្ដល់សេវាវះកាត់ជាលើកដំបូងរបស់ខ្លួនបានពីរករណី ប្រកបដោយជោគជ័យ សុវត្ថិភាព និងទំនុកចិត្តខ្ពស់ជូនប្រជាពលរដ្ឋ ។ករណីទី១. វះពោះវៀនខ្នែងនិង ករណីទី២. វះពោះវៀនធ្លាក់ចូលពងស្វាស។
លោកវេជ្ជបណ្ឌិត គុជ ស៊ីថា បានឱ្យដឹងទៀតថា អគារមន្ទីរពេទ្យបង្អែករមាសហែកថ្មី បានកកើតឡើងក្រោមការឧបត្ថម្ភពីសំណាក់នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស អនុប្រធានក្រុមការងាររាជរដ្ឋាភិបាលចុះជួយខេត្តស្វាយរៀង និងជាប្រធានក្រុមការងាររាជរដ្ឋាភិបាលចុះជួយមូលដ្ឋានស្រុករមាសហែក។
សូមជម្រាបថា អគារមន្ទីរពេទ្យបង្អែកថ្មីនេះ មានទីតាំងនៅភូមិតាត្រាវ ឃុំកំពង់ត្រាច ស្រុករមាសហែក ដោយបានបើកការដ្ឋានសាងសង់នៅថ្ងៃទី៧ ខែធ្នូ ឆ្នាំ២០២១ និងបានបញ្ចប់ការសាងសង់ជាស្ថាពរនៅថ្ងៃទី១ ខែកក្កដា ឆ្នាំ២០២៣ ហើយត្រូវបានដាក់ឱ្យដំណើរការប្រើប្រាស់នៅថ្ងៃទី១ ខែកញ្ញា ឆ្នាំ២០២៣ ។
មន្ទីរពេទ្យបង្អែកថ្មីនេះ មានលទ្ធភាពផ្តល់សេវាគ្របដណ្តប់លើ ១៦ឃុំ ស្មើនឹង២០៤ភូមិ ដែលមានប្រជាជនសរុប ១៥៤.៤៥៣ នាក់ (ស្រី ៧៦,៧៦២ នាក់) ។មន្ទីរពេទ្យនេះផ្តល់សេវាសង្គ្រោះបន្ទាន់ ជំងឺទូទៅនិងជំងឺឆ្លង របួស-វះកាត់ សម្ភព-រោគស្រ្តី ជំងឺកុមារ ពិគ្រោះជំងឺក្រៅ ពិនិត្យភ្នែកវាស់កាត់វ៉ែនតា,សុខភាពផ្លូវចិត្តនិងបំពានគ្រឿងញៀន, សុខភាពមាត់ធ្មេញ,ជំងឺទឹកនោមផ្អែមនិងលើសសម្ពាធឈាម, កន្លែងផ្តល់ប្រឹក្សាធ្វើតេស្តឈាមរកមេរោគអេដស៍ដោយរក្សាការសំងាត់, ផ្នែកជំងឺកាមរោគ កម្មវិធីបង្ការការចម្លងមេរោគអេដស៍ពីម្តាយទៅកូន ,ព្យាបាលជំងឺឱកាសនិយម និងផ្តល់ឱសថពន្យា ,សេវាអមគ្លីនិក (វិទ្យុសាស្ត្រ អេកូសាស្ត្រ មន្ទីរពិសោធន៍,វាស់ចង្វាក់បេះដូង)ផ្នែករដ្ឋបាលនិងឃ្លាំងឳសថ៕
ដោយ៖នុត នាង
