(ភ្នំពេញ)៖ ឯកឧត្តម សរ សិទ្ធិ រដ្ឋលេខាធិការក្រសួងមាហាផ្ទៃ និងជាប្រធាន​សហព័ន្ធ​កីឡាសូហ្វតិន្នីសកម្ពុជា បានថ្លែង នៅក្នុងពិធីវគ្គបណ្តុះបណ្តាល មន្រ្តី​បច្ចេកទេស និង​អាជ្ញាកណ្តាល ថ្នាក់ជាតិ កីឡាសហ្វតិន្នីស នាព្រឹកថ្ងៃទី៧ ខែ កក្តដា ឆ្នាំ២០២៤ថា អាជ្ញាកណ្តាលត្រូវប្រកាន់ភ្ជាប់នូវចំណុចកណ្តាលមិនលម្អៀងទៅកាន់ភាគីខាងណាមួយឡើយ ទោះភាគីនោះជាបងប្អូន ឬមិត្តភ័ក្តិក៏ដោយ។ ធ្វើជាអាជ្ញាកណ្តាល​ត្រូវប្រកាន់​ភ្ជាប់នូវក្រមសិល៍ធម៌ និងយុត្តិធម៌ ក្នុងការកាត់ក្តីប្រកបដោយវិជ្ជាជីវៈ។

ឯកឧត្តម បានគូសបញ្ជាក់ទៀតថា​ មន្រ្តីអាជ្ញាកណ្តាលត្រូវតែអភិវឌ្ឍសមត្ថភាពរហូត​ដើរឱ្យទាន់ការវិវឌ្ឍនៃប្រភេទកីឡារបស់យើង មានន័យថា អាជ្ញាកណ្តាលត្រូវ​បន្ថែម​ចំណេះ​ដឹងថ្មីជានិច្ចពីមួយឆ្នាំទៅមួយឆ្នាំ ព្រោះចំណេះនេះ យើងក៏មិនប្រកដថា យើងជាអាជ្ញាកណ្តាលកាត់សេចក្តីតែនៅក្នុងស្រុករហូតនោះទេ ពោលបើយើង​អភិវឌ្ឍ​ចំណេះបន្ថែមយើងក៏អាចឈានជើងទៅជាអាជ្ញាកណ្តាលអន្តរជាតិកាត់សេចក្តីការប្រកួតនៅក្រៅប្រទេសបានដែរ។ ព្រោះអាជ្ញាកណ្តាលដែលចូលរួមកាត់សេចក្តីការប្រកួត​អន្តរជាតិទាំងអស់បានកើតចេញពីការរៀនសូត្រដូចគ្នា អញ្ចឹងយើងប្រឹងប្រែង​រៀនសូត្រ​យើង​ក៏អាចក្លាយទៅជាអាជ្ញាកណ្តាលកម្រិតអន្តរជាតិបានដូចគ្នាដែរ។

ឯកឧត្តម រដ្ឋលេខាធិការ បានចាត់ទុកវគ្គបណ្តុះបណ្តាលនេះ ជាវគ្គដែលមានសារៈ​សំខាន់ជាការដុះខាត់ដើម្បីអភិវឌ្ឍបន្ថែមនូវចំណេះដឹងថ្មីៗជាមួយមេរៀនថ្មីៗល្អដែលគ្រូឧទ្ទេសបានធ្វើការបង្ហាត់បង្ហាញ។ជាការពិតទាំងមន្រ្តីបច្ចេកទេស​និងអាជ្ញាកណ្តាល​ត្រូវតែមានបទពិសោធន៍ខ្ពស់តាមកម្រិតស្តង់ដា ទើបអាចកាត់សេចក្តីក្នុងព្រឹត្តិការណ៍​ប្រកួតដោយភាពជឿជាក់។ហេតុដូចនេះហើ់យទើបសហព័ន្ធកីឡា​សហ្វតិន្នីសកម្ពុជា​បានដាក់នូវផែនការសកម្មភាពរបស់ខ្លួនក្នុងការអភិវឌ្ឍសមត្ថភាពមន្រ្តីបច្ចេកទេសនិងអាជ្ញាកណ្តាល ដើម្បីឱ្យពួកគាត់ទទួលបាននូវជំនាញបច្ចេកទេស​អាចឆ្លើយតបបាន​ទៅនិងកម្រិតប្រកួតប្រកបដោយប្រសិទ្ធិភាពក្នុងវិស័យកីឡាសហ្វតិន្នីសរបស់យើង។

ដោយឡែក ឯកឧត្តម យិត ភីរៈ អគ្គលេខាធិការ សហព័ន្ធកីឡាសូហ្វតិន្នីសកម្ពុជា បានបញ្ជាក់ឱ្យដឹងដែរថា វគ្គបណ្តុះបណ្តាលនេះពិតជាមានសារៈសំខាន់ណាស់ ក្នុងការលើកកម្ពស់សមត្ថភាព និងបង្កើនធនធានមនុស្ស លើផ្នែកមន្រ្តីបច្ចេកទេស និងអាជ្ញាកណ្តាលកីឡាសូហ្វតិន្នីស ដើម្បីកាត់សេចក្តីក្នុងការប្រកួត​ឱ្យមានភាព​សុក្រឹត្យ និងយុត្តិធម៌ និងត្រៀមចូលរួមចំណែកដឹកនាំការប្រកួត។ សូមបញ្ជាក់ថា វគ្គបណ្តុះបណ្តាលមន្រ្តីបច្ចេកទេស និងអាជ្ញាកណ្តាលថ្នាក់ជាតិ ឆ្នាំ២០២៤ បានដំណើរការ៥ថ្ងៃ ដោយមាន​សិក្ខាកាម ២៦នាក់ ក្រោមការចែករំលែកចំណេះ​ដឹងពីគ្រូឧទ្ទេស គឺលោក OGIWARA MASATO គ្រូបង្វឹកអន្តរជាតិ និងលោក យី សារិន គ្រូបង្វឹកជាតិ។ ចំពោះលទ្ធផល គឺសិក្ខាកាមទទួលបាននិទ្ទេសល្អ ៧៥ %, ល្អបង្គួរ ១៥ % និងមធ្យម ១០%៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ