លោក Pita មានទំនុកចិត្ត ក្នុងសំណុំរឿងរំលាយបក្ស Move Forward
បាងកក៖ លោក Pita Limjaroenrat មេដឹកនាំគណបក្ស Move Forward ឬ គណបក្សឆ្ពោះទៅមុខ ដែលធ្លាប់ឈ្នះការបោះឆ្នោត តែមិនអាចធ្វើជានាយករដ្ឋមន្ត្រី បាននិយាយ កាលពីថ្ងៃអាទិត្យថា លោកមានទំនុកចិត្ត ក្នុងការឈ្នះលើសំណុំរឿងតុលាការ ដែលប៉ុនប៉ងរំលាយគណបក្សរបស់លោក ជុំវិញការប្រមាថព្រះមហាក្សត្រ។
សូមរម្លឹកថា គណបក្ស Move Forward បានឈ្នះអាសនៈភាគច្រើន នៅក្នុងការបោះឆ្នោតសកល កាលពីឆ្នាំមុន ប៉ុន្តែសមាជិកព្រឹទ្ធសភាអភិរក្សបោះឆ្នោតមិនគាំទ្រលោកមិនឱ្យក្លាយជានាយករដ្ឋមន្ត្រី ត្បិតលោកត្រូវការសម្លេងបន្ថែមពីសភា ព្រោះឈ្នះមិនដាច់។ ជាការបង្អាក់ ក្រោមហេតុផលការប្តេជ្ញារបស់លោក ដែលនឹងជំរុញឱ្យកែប្រែច្បាប់ការពារព្រះមហាក្សត្រ ពីការរិះគន់ បើលោកធ្វើជានាយករដ្ឋមន្ត្រី។
តុលាការធម្មនុញ្ញកំពុងពិចារណាលើញត្តិដើម្បីរំលាយគណបក្សមួយនេះ ប៉ុន្តែលោក Pita បានគូសបញ្ជាក់កាលពីថ្ងៃអាទិត្យថា មានហេតុផល៩ចំណុច ដែលលោកនឹងឈ្នះ គឺផ្តោតលើយុត្តាធិការ និងដំណើរការ ប៉ុន្តែលោកមិនប្រាប់លម្អិតទេ។ លោកគ្រាន់តែនិយាយថា ការណ៍នេះ មានន័យថា ជាការវាយប្រហារលើលទ្ធិប្រជាធិបតេយ្យ មិនមែនត្រឹមតែលោកផ្ទាល់ទេ ហើយក៏មិនមែនតែគណបក្ស ប៉ុន្តែលំហប្រជាធិបតេយ្យ ទាំងមូល ក្នុងប្រទេសថៃ។
គណៈកម្មាធិការរៀបចំការបោះឆ្នោតរបស់ប្រទេសថៃបានស្នើឱ្យតុលាការធម្មនុញ្ញរំលាយ គណបក្ស Move Forward នៅក្នុងខែមីនា ដោយរកឃើញថា គណបក្សមួយនេះប៉ុនប៉ងផ្តួលរំលំរបបរាជានិយមអាស្រ័យ រដ្ឋធម្មនុញ្ញ។ តុលាការនឹងបើកសវនាការលើសំណុំរឿងនេះ នៅថ្ងៃពុធ សប្តាហ៍នេះ ដើម្បីសម្រេចថាតើ គណបក្សរបស់លោក ត្រូវរំលាយ ឬក៏អត់៕
ប្រភពពី AFP ប្រែសម្រួល៖ សារ៉ាត