(ភ្នំពេញ)៖ យោងតាមសេចក្តីជូនដំណឹង របស់សហភាពសហព័ន្ធយុវជនកម្ពុជា ដែលទទួលបាននៅថ្ងៃទី១៣ ខែមិថុនា ឆ្នាំ២០២៤ ស្តីពី “ព្រះរាជកម្មវិធីចម្រើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ” បានឱ្យដឹងថា ដោយទទួលបានព្រះបរមរាជានុញ្ញាតដ៏ខ្ពង់ខ្ពស់បំផុតពី សម្តេចព្រះមហាក្សត្រី នរោត្តម មុនិនាថ សីហនុ សហភាពសហព័ន្ធយុវជនកម្ពុជា (ស.ស.យ.ក.) នាព្រឹកថ្ងៃទី១៥ ខែមិថុនា ឆ្នាំ២០២៤ បានរៀបចំ «ព្រះរាជពិធីចម្រើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ» ក្នុងគោលបំណងសម្តែងថ្វាយនូវកតញ្ញូកតវេទីចំពោះព្រះរាជបូជនីយកិច្ចរបស់ សម្តេចព្រះមហាក្សត្រី ព្រះវររាជមាតាជាតិខ្មែរ ។

ក្នុងឱកាសនៃព្រះរាជពិធីចម្រើនព្រះជន្មសម្ដេចម៉ែ ក្រុមគ្រួសារ ស.ស.យ.ក. បានរៀបចំកម្មវិធីដែលរួមមាន ៖ ពិធីក្រាបថ្វាយបង្គំថ្វាយព្រះពរចម្រើនព្រះជន្ម ពិធីចម្រើនព្រះជន្មវស្សា ពិធីចម្រើនព្រះបរិត្ត ក្នុងនោះ មានការនិមន្តព្រះសង្ឃរាជ និងមន្ត្រីសង្ឃទាំងពីរគណៈចម្រើនព្រះបរិត្ត និងគោចរបិណ្ឌបាត្រសរុប ៨៩ អង្គ, កម្មវិធីពិព័រណ៌ព្រះបរមឆាយាល័ក្ខណ៍ ដើម្បីផ្សព្វផ្សាយនូវព្រះរាជជីវប្រវត្តិ ស្នាព្រះហស្ថ ស្ថាបនិក និងព្រះរាជសកម្មភាពនៃគំរូវីរភាព ប្រកបដោយទសពិធរាជធម៌របស់ សម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត និងពិធីបញ្ចាំងខ្សែភាពយន្តដែលជាព្រះរាជនិពន្ធរបស់ព្រះវររាជបិតាជាតិខ្មែរ ។

សម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតនៃយើង ព្រះអង្គបានយកអស់ព្រះកាយពល និងព្រះបញ្ញាញាណ ប្រកបដោយទឹកព្រះទ័យដ៏ស្មោះស្ម័គ្របំផុត ដង្ហែតាមព្រះរាជសកម្មភាពដ៏ថ្លៃថ្លា នៃអង្គព្រះករុណា ព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» ជាទីគោរពសក្ការៈដ៏ខ្ពង់ខ្ពស់បំផុត នៅគ្រប់កាលៈទេសៈ ក្នុងព្រះរាជកិច្ចបម្រើជាតិ មាតុភូមិន និងប្រជារាស្រ្តជាទីស្នេហារបស់ព្រះអង្គទាំងទ្វេ។

ស្នាព្រះហស្ថ និងព្រះរាជសកម្មភាពរបស់ព្រះអង្គ គឺជាគំរូព្រះវីរភាពដ៏ធំធេងដល់កូនចៅ ចៅទួត ជាពិសេសស្ត្រីកម្ពុជា គ្រប់វ័យ និងគ្រប់ស្រទាប់វណ្ណៈ ៕

អត្ថបទ៖ វណ្ណលុក
រូបភាព៖ សួង ពិសិដ្ឋ