រដ្ឋបាល និងមន្ទីរការងារខេត្តបន្ទាយមានជ័យ អំពាវនាវឱ្យយុវជនមកទទួលការបណ្ដុះបណ្ដាលជំនាញវិជ្ជាជីវៈ
បន្ទាយមានជ័យ៖ មន្រ្តីជាន់ខ្ពស់នៃរដ្ឋបាលខេត្ត ក៏ដូចជាមន្រ្តីនៃមន្ទីរការងារ និងបណ្ដុះបណ្ដាលវិជ្ជាជីវៈខេត្តបន្ទាយមានជ័យ បានជំរុញផង និងអំពាវនាវផងដល់យុវជនដែលស្ថិតក្នុងគោលដៅបណ្ដុះបណ្ដាលបច្ចេកទេសជំនាញវិជ្ជាជីវៈ ឱ្យមកទទួលការបណ្ដុះបណ្ដាលជំនាញដើម្បីមានមុខជំនាញច្បាស់លាស់សម្រាប់ទៅប្រកបរបរចិញ្ចឹមជីវិត។
ក្នុងទិវាជាតិបណ្ដុះបណ្ដាលបច្ចេកទេស និងវិជ្ជាជីវៈលើកទី ៧ ឆ្នាំ២០២៤ដែលបានប្រារព្ធនៅវិទ្យាស្ថានពហុបច្ចេកទេសក្រុងសិរីសោភ័ណ កាលពីចុងសប្ដាហ៍កន្លងទៅនេះលោក យឹម សំណាង អភិបាលរងខេត្តបន្ទាយមានជ័យ បានរំលេចថា ក្រោមប្រធានបទ “រៀនឱ្យចប់ឱ្យចេះ ឱ្យមានការងារ” ក្នុងគោលបំណងបណ្តុះបណ្តាលបច្ចេកទេស និងវិជ្ជាជីវៈ ទៅដល់យុវជន ពិសេសយុវជនក្រីក្រនិងងាយរងហានិភ័យទទួលបានការបណ្តុះបណ្តាលបច្ចេកទេស និងវិជ្ជាជីវៈ ឬមុខជំនាញណាមួយច្បាស់លាស់ពិតប្រាក។មានជំនាញគឺអាចជួយយុវជនទាំងនោះឱ្យងាយស្រួលរកការងារធ្វើ។
បន្ថែមទៅលើលោកអភិបាលរងខេត្តលើកឡើង លោកស្រី សំរិទ្ធ សូជាតិ នាយិកាវិទ្យាស្ថានពហុបច្ចេកទេស ខេត្តបន្ទាយមានជ័យ បានអំពាវនាវដល់មាតាបិតា អាណាព្យាបាល ជំរុញ លើកទឹកចិត្តដល់សិស្សានុសិស្ស យុវជន ដែលជាកូនចៅរបស់ខ្លួនមកទទួលការបណ្តុះបណ្តាលជំនាញបច្ចេកទេសនិងវិជ្ជាជីវៈ នៅសាលាពហុបច្ចេកទេសខេត្ត ព្រោះជាការវិនិយោគរយៈពេលខ្លី ឆាប់ចប់ ឆាប់ទទួលបានផល និងមានជំនាញមួយច្បាស់លាស់។លោកស្រីបន្តថា ការបណ្តុះបណ្តាលមានដូចជា ជំនាញកសិកម្ម ,ផ្នែកមេកានិក និងយន្តសាស្ត្ររថយន្ត ,ជំនាញព័ត៌មានវិទ្យា ,ធុរកិច្ចទេសចរណ៍ និងភាសាបរទេស ,សំណង់ស៊ីវិល និងស្ថាបត្យកម្ម និង ជំនាញអគ្គិសនី និងអេឡិចត្រូនិក ជាដើម៕
ដោយ៖ គៀន ច័ន្ទហ៊ីន
![](https://asset.ams.com.kh/central/media/2024/06/photo_2024-06-17_16-05-12-1024x682.jpg)
![](https://asset.ams.com.kh/central/media/2024/06/photo_2024-06-17_16-05-16-1024x577.jpg)
![](https://asset.ams.com.kh/central/media/2024/06/photo_2024-06-17_16-05-17-1024x577.jpg)
![](https://asset.ams.com.kh/central/media/2024/06/photo_2024-06-17_16-05-19-1024x577.jpg)
![](https://asset.ams.com.kh/central/media/2024/06/photo_2024-06-17_16-05-20-1024x577.jpg)
![](https://asset.ams.com.kh/central/media/2024/06/photo_2024-06-17_16-05-27-1-1024x577.jpg)
![](https://asset.ams.com.kh/central/media/2024/06/photo_2024-06-17_16-05-27-1024x577.jpg)