សៀមរាប៖ មន្ទីរទំនាក់ទំនងជាមួយរដ្ឋសភា-ព្រឹទ្ធសភា និង​អធិការកិច្ច​ខេត្តសៀមរាប សហការជាមួយអាជ្ញាធរស្រុក​បន្ទាយ​ស្រីនិង ការិយាល័យប្រឆាំងគ្រឿងញៀន នៃស្នងការ​ដ្ឋាននគរបាលខេត្ត នៅថ្ងៃទី២០ ខែមិថុនា ឆ្នាំ២០២៤​បានរៀបចំពិធីផ្សព្វផ្សាយច្បាប់​ស្តីពីការត្រួតពិនិត្យគ្រឿងញៀន នៅសាលាស្រុកបន្ទាយស្រី ក្រោមអធិបតីភាពលោក លឹម ភក្តី ប្រធានមន្ទីរទំនាក់ទំនង​ជាមួយ​រដ្ឋសភា-ព្រឹទ្ធសភា និងអធិការកិច្ចខេត្ត និងវត្តមានចូលរួមពី អភិបាលស្រុក ប្រធានក្រុមប្រឹក្សាស្រុក អង្គភាពស្ថាបន័នានា កម្លាំង​ប្រដាប់​អាវុធទាំងបីប្រភេទ អាជ្ញាធរមូលដ្ឋាន លោកគ្រូអ្នកគ្រូ សិស្សានុសិស្ស យុវជនកាកបាទ ក្រហមស្រុក សរុប ចំនួនជាង​២០០នាក់។

ពិធីពេញមួយព្រឹកនេះ រៀបចំឡើងក្នុងគោលបំណងផ្តល់​នូវចំណេះ​ដឹងផ្នែកច្បាប់ជូនអ្នកចូលរួមក៍ដូចជាប្រជាពលរដ្ឋ​ទូទៅបានយល់​ដឹងនិងរួម​គ្នាអនុវត្តតាម សំដៅរួមគ្នាបង្ការ ទប់ស្កាត់ ប្រយុទ្ឋប្រឆាំងនឹងបទល្មើសគ្រឿងញៀន  សំដៅលើកកម្ពស់ សន្តិសុខ សុវត្ថិភាព ក្នុងមូលដ្ឋានឱ្យ​មានប្រសិទ្ឋិភាព។

លោក រិន ឡូត  អភិបាលស្រុកបន្ទាយស្រី បានចាត់ទុកការ​ផ្សព្វផ្សាយនេះ​មាន​សារៈសំខាន់បំផុតដើម្បីបញ្ជ្រាបការ​យល់​ដឹងទៅដល់ប្រជាពលរដ្ឋគ្រប់មជ្ឈដ្ឋាន ជាពិសេសស្រទាប់​យុវជនជាសិស្សានុសិស្ស ព្រោះថាបញ្ហាគ្រឿងញៀននៅ តែជាកត្តាប្រឈម និងក្តីកង្វល់របស់គ្រួសារនិងសង្គមជាតិ។

លោកវរសេនីយ៍ទោ ហាក់ សំអឿន នាយរងការិយាល័យ​ប្រឆាំងគ្រឿងញៀនបានពន្យល់និងបកស្រាយថា គ្រឿងញៀន គឺជាកំពូល​ឧក្រឹដ្ឋកម្មអន្តរជាតិ ដែលបាននិងកំពុងរាតត្បាត​នៅពាសពេញពិភពលោក ហើយបានទន្ទ្រានចូលមកប្រទេស​កម្ពុជា ដោយបាន​បង្កនូវគ្រោះមហន្តរាយធ្ងន់ធ្ងរជាច្រើនចំពោះ​ប្រជាពលរដ្ឋ ជាពិសេសយុវជន យុវនារី និងកុមារខ្មែរយើង។

លោក លឹម ភក្តី ប្រធានមន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្តមានប្រសាសន៍ថាគ្រឿងញៀន គឺជាអន្ទាក់​ប្រកបដោយគ្រោះថ្នាក់ សម្រាប់មនុស្សគ្រប់រូប ប្រសិនបើនរណាម្នាក់ធ្លាក់ចូលក្នុងអន្ទាក់នេះហើយ អ្នកនោះ​កម្រនឹងដក​ខ្លួនរួច​ណាស់ ហើយរមែងតែងតែផ្ដល់ផលអាក្រក់​ចំពោះអ្នកប្រព្រឹត្ត គ្រួសារ សហគន៍ និងសង្គមជាតិ ។លោកប្រធានមន្ទីរបញ្ជាក់ថា​យើងទាំងអស់គ្នាត្រូវចាំថា គ្រឿងញៀនមិនមែនជាឱសថសម្រាប់ជួយបំបាត់ទុក្ខព្រួយ ឬជួយឱ្យរៀនពូកែ ជួយលើកកម្លាំងអ្វីនោះទេ ។ផ្ទុយទៅវិញការប្រើប្រាស់គ្រឿងញៀននាំឱ្យខូចសុខភាព បង្កបញ្ហាដល់គ្រួសារ ដល់សង្គម និងខុសច្បាប់ហើយនាំឱ្យខូច​អនាគតនិង​អាចស្លាប់ទៀតផង។

លោកបានអំពាវនាវដល់គ្រប់បណ្ដាមន្ទីរ ស្ថាប័ន ជាពិសេស​អង្គភាពជំនាញ ត្រូវមានផែនការគ្រប់គ្រង និងអនុវត្ដច្បាប់​ឱ្យបាន​ច្បាស់លាស់គ្រប់ជ្រុងជ្រោយព្រមទាំងជួយផ្សព្វផ្សាយ​បន្ដដល់ប្រជាពលរដ្ឋឱ្យបានយល់ដឹងអំពីច្បាប់ស្តីពីការត្រួតពិនិត្យគ្រឿងញៀននេះ។លោកក៏បានសំណូមពរដល់ឳពុកម្ដាយ ឬអាណាព្យាបាល ត្រូវចេះតាមដានសកម្មភាពកូន ទាំង​អត្តចរិក ទាំងការសិក្សា ហើយ​ប្រសិនបើមានការសង្ស័យ ឬដឹងថាកូនរបស់ខ្លួន ប្រើប្រាស់គ្រឿងញៀន គួរតែសហការ និងរាយការណ៍ជូនអាជ្ញាធរឬ​សមត្ថកិច្ចមូ​ល​ដ្ឋាន ដើម្បីមានវិធានការទប់ស្កាត់ ហើយ ក្មួយៗដែលជាសិស្សានុសិស្ស ត្រូវជៀសឱ្យឆ្ងាយពីគ្រឿងញៀន៕

ដោយ៖​ប៊ុន​ រដ្ឋា