(ភ្នំពេញ)៖ វិស័យសុខាភិបាល គឺជាគោលនយោបាយអាទិភាពមួយ​របស់​រាជរដ្ឋា​ភិបាល ដែលដាក់ចុះដើម្បីគិតគួរពីសុខមាលភាពរបស់ប្រជាពលរដ្ឋ ដោយនៅក្នុងយុទ្ធសាស្ត្របញ្ចកោណដំណាក់ទី១ គឺពង្រឹងខឿនការពារ​សុខភាព​របស់ប្រជាជន ដោយបន្តអភិវឌ្ឍវិស័យសុខាភិបាល សំដៅ​ធានា​ឱ្យប្រជាពលរដ្ឋគ្រប់រូបរស់នៅប្រកបដោយសុខសុវត្ថិភាព សុខភាពល្អ លើមូលដ្ឋានគ្រឹះដ៏រឹងមាំ នៃសន្តិភាព ។

ជាមួយនឹងការតាំងចិត្តរបស់រាជរដ្ឋាភិបាល ក៏បានផ្តោតលើគោលដៅធំចំនួនពីរ គឺ ទី១ ការពារអាយុជីវិតរបស់ប្រជាពលរដ្ឋពីហានិភ័យនៃការឆ្លងរីករាលដាល​នៃជំងឺកូវីដ-១៩ និងជំងឺឆ្លងកាចសាហាវផ្សេងទៀតដែលលេចឡើងជាយថា​ហេតុក្នុងពេលបច្ចុប្បន្ន និងទៅអនាគត, ទី២ លើកកម្ពស់សុខភាព និងសុខ​មាលភាពរបស់ប្រជាពលរដ្ឋឱ្យកាន់តែប្រសើរឡើង ជាពិសេសប្រជាពល​រដ្ឋក្រី​ក្រ ជនងាយរងគ្រោះដូចជាស្រ្តី កុមារ វ័យជំទង់ មនុស្សចាស់ជរា ជន​មានពិការ​ភាព តាមរយៈការពង្រឹងភាពធន់នៃប្រពន្ធ័សន្តិសុខ សុខភាព និងទំនើបភាវូប​នីយកម្មប្រពន្ធ័ផ្តល់សេវាថែទាំសុខភាព ក្នុងដំណើរឆ្ពោះ​ទៅសម្រេចការ​គ្របដណ្តប់សុខភាពជាសកលនៅកម្ពុជា នាដំណាច់ឆ្នាំ២០៣០ ។

នេះជាការថ្លែងរបស់ ឯកឧត្តម នេត្រ ភក្ត្រា ប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ ក្នុងឱកាសជួបសំណេះសំណាលជាមួយថ្នាក់ដឹកនាំ មន្ត្រីសុខាភិបាល តាមបណ្តាស្រុក ក្រុង ក្នុងខេត្តក្រចេះ និងផ្តល់ថ្នាំវីតាមីន C ទុកសម្រាប់ចែកជូនដល់ប្រជាពលរដ្ឋតាមបណ្តាមូលដ្ឋាននានាផងដែរ នាព្រឹកថ្ងៃទី២៨ ខែមិថុនា ឆ្នាំ២០២៤ នៅមន្ទីរសុខាភិបាលខេត្តក្រចេះ ។

ឯកឧត្ត​ម នេត្រ ភក្ត្រា ក៏បានជំរុញលើកទឹកចិត្តដល់មន្ត្រីសុខាភិបាល​បន្តយក​ចិត្ត​ទុកដាក់ខ្ពស់ ក្នុងការផ្តល់សេវាសុខាភិបាលប្រកបដោយគុណភាព វិជ្ជាជីវៈ ជូនដល់ប្រជាពលរដ្ឋ និងជាការកសាងនូវជំនឿទុកចិត្តរបស់ពលរដ្ឋចំពោះ​សេវាសុខាភិបាលរបស់មន្ទីរពេទ្យបង្អែកខេត្តក្រចេះ ៕

ដោយ ៖ ង៉ាន់ ទិត្យ