រយៈពេល ២៥ឆ្នាំ សិស្សក្រីក្រប្រមាណ ៣០ម៉ឺននាក់ ទទួលផលពីកម្មវិធីផ្តល់អាហារតាមសាលារៀន
(សៀមរាប)៖ រយៈពេល ២៥ឆ្នាំ សិស្សក្រីក្រទទួលបានផល ប្រមាណ ៣០ម៉ឺននាក់ ពីកម្មវិធីផ្តល់អាហារតាមសាលារៀ។ កម្មវិធីផ្តល់អាហារតាមសាលារៀន នឹងក្លាយជាកម្មវិធីថ្នាក់ជាតិពេញលេញ ដោយរដ្ឋជាអ្នកគ្រប់គ្រងទាំងស្រុង ។ ពាក្យដែលត្រូវបានប្រើនោះ គឺ «ញ៉ាំឆ្អែត មានកម្លាំងរៀន និងកាត់បន្ថយការចំណាយ»។
ឯកឧត្ដមបណ្ឌិត ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គម បានថ្លែងឱ្យដឹងថា សាលារៀនកម្រិតបឋមសិក្សា ក្នុងខេត្តគោលដៅចំនួន ១០ នឹងត្រូវផ្ទេរមកជាសាលាគ្រប់គ្រងដោយរាជរដ្ឋាភិបាល ក្រោយពីអនុវត្ត ក្រោមកិច្ចសហប្រតិបត្តិការពីដៃគូអភិវឌ្ឍន៍។
![](https://asset.ams.com.kh/central/media/2024/07/photo_2024-07-04_14-32-56-1024x682.jpg)
នៅក្នុងឱកាសទស្សនកិច្ចទៅកាន់សាលារៀន ដែលមានកម្មវិធីផ្ដល់អាហារតាម សាលារៀនដោយប្រើប្រាស់កសិផលក្នុងសហគមន៍ នៅស្រុកប្រាសាទបាគង ខេត្តសៀមរាប កាលពីថ្ងៃទី៣ ខែកក្កដា ឆ្នាំ២០២៤ បានឱ្យដឹងថា កម្មវិធីនេះ មានគោលបំណងលើកកម្ពស់អាហារូបត្ថម្ភ និងការសិក្សារបស់កុមារក្នុងតំបន់មានភាពក្រីក្រ និងភាពងាយរងគ្រោះខ្ពស់ ដោយចូលរួមចំណែកបង្កើនការចុះឈ្មោះចូលរៀន, បញ្ចប់ការសិក្សា, និងកាត់បន្ថយអត្រាបោះបង់ការសិក្សានៅកម្រិតបឋមសិក្សា ព្រមទាំងចូលរួមលើកកម្ពស់សេដ្ឋកិច្ចសហគមន៍ផងដែរ ។ រហូតមកដល់ពេលនេះ យើងមានសាលារៀនដែលប្រើប្រាស់ថវិកាជាតិចំនួន ៥៥៣សាលារៀន» ។
កម្មវិធីផ្តល់អាហារតាមសាលារៀន បានចាប់ផ្តើមអនុវត្តនៅឆ្នាំ១៩៩៩ ដោយកម្មវិធីស្បៀងអាហារពិភពលោក (WFP) និងក្រសួងអប់រំ យុវជន និងកីឡា ក្រោមហិរញ្ញប្បទានជំនួយដៃគូអភិវឌ្ឍន៍ ដោយចាប់ផ្ដើមដំបូងមានតែ៦៤សាលា និងមានអ្នកទទួលផល ៣៧.៥០០នាក់ប៉ុណ្ណោះ ។ មកដល់បច្ចុប្បន្ន កម្មវិធីបានពង្រីកខ្លួនដល់សាលារៀនគោលដៅសរុបចំនួន ១.១១៤សាលា ក្នុងខេត្តចំនួន ១០ទូទាំងប្រទេស និងមានសិស្សទទួលផលសរុបប្រមាណ៣០ម៉ឺននាក់ គ្រាដែលដំបូងឡើយ ត្រូវបានអនុវត្តដោយកម្មវិធីស្បៀងអាហារពិភពលោក (WFP) ក្រោមហិរញ្ញប្បទាន របស់មូលនិធិ McGovern-Dole និងក្រសួងកសិកម្មសហរដ្ឋអាមេរិក (USDA)។
![](https://asset.ams.com.kh/central/media/2024/07/photo_2024-07-04_14-32-46-1024x682.jpg)
យោងតាមរបាយការណ៍របស់ក្រុមប្រឹក្សាជាតិគាំពារសង្គម បានឱ្យដឹងថា ក្នុងឆ្នាំ២០២៤នេះ ក្រសួងអប់រំ យុវជន និងកីឡា បាននិងកំពុងអនុវត្តកម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ នៅតាមសាលារៀនគោលដៅចំនួន ៥៥៣សាលា ក្នុងខេត្តចំនួន១០ រួមមាន ៖ ខេត្តសៀមរាប កំពង់ធំ ព្រះវិហារ បាត់ដំបង ស្ទឹងត្រែង បន្ទាយមានជ័យ កំពង់ចាម កំពង់ឆ្នាំង ពោធិ៍សាត់ និងឧត្តរមានជ័យ ក្នុងនោះមានសិស្សទទួលផលចំនួនជាង ១៥ម៉ឺននាក់ និងចុងភៅ ១.៥១៨នាក់ សម្រាប់ត្រីមាសទី១ ឆ្នាំសិក្សា២០២៣- ២០២៤ ដោយបានចំណាយថវិកាជាង ៥លាន៥៦ម៉ឺនដុល្លារអាមេរិក ៕
![](https://asset.ams.com.kh/central/media/2024/07/photo_2024-07-04_14-33-16-1024x682.jpg)
![](https://asset.ams.com.kh/central/media/2024/07/photo_2024-07-04_14-32-41-1024x682.jpg)
![](https://asset.ams.com.kh/central/media/2024/07/photo_2024-07-04_14-33-22-1024x682.jpg)
![](https://asset.ams.com.kh/central/media/2024/07/photo_2024-07-04_14-33-27-1024x682.jpg)
![](https://asset.ams.com.kh/central/media/2024/07/photo_2024-07-04_14-33-52-1024x682.jpg)
ដោយ ៖ ង៉ាន់ ទិត្យ
រូបភាព ៖ រិន រចនា