រតនគិរី៖រតនគិរីបានសម្រេចនឹងរៀបចំពិធីអបអរសាទរ​បញ្ឈប់​ការបន្ទោបង់ពាសវាលពាសកាលនៅថ្ងៃទី៣០ ខែកក្កដា ឆ្នាំ២០២៤​ខាងមុខនេះក្រោមអធិបតីភាពដ៏ខ្ពង់ខ្ពស់ឯកឧត្តម ឆាយ ប្ញទ្ធីសែន រដ្ឋមន្ត្រីក្រសួងអភិវឌ្ឍន៍ជនបទ។នេះបើយោង​តាមស្មារតីនៃ កិច្ច​ប្រជុំនេះព្រឹកថ្ងៃទី៤ ខែកក្កដា ឆ្នាំ២០២៤ នាសាលប្រជុំសាលាខេត្ត ក្រោមវត្តមានឯកឧត្តម ញ៉ែម សំអឿន អភិបាលខេត្តរតនគិរី។

អង្គប្រជុំនាពេលនេះបានសម្រេចរៀបចំពិធីអបអរសាទរបញ្ឈប់ការបន្ទោបង់ពាសវាល ពាសកាលនៅសាលមហោស្រពនៃ​មន្ទីរ​វប្បធម៌ខេត្តតេនគិរីនាថ្ងៃទី៣០ ខែកក្កដាខាងមុខនេះក្រោម​អធិបតីភាពឯកឧត្តមរដ្ឋមន្ត្រីក្រសួងអភិវឌ្ឍន៍ជនបទ ក្នុង​គោលបំណង បង្កើនការយល់ដឹងអំពីសារៈសំខាន់ពីអនាម័យ និងបង្កើនការទទួលបាននូវការលើកកម្ពស់ អនាម័យនៅតាម​សហគមន៍ជនបទ​ក្នុងព្រះរាជាណាចក្រកម្ពុជាពិសេសក្នុងភូមិ​សាស្ត្រខេត្តរតនគិរី ​ព្រមទាំងទទួលបានចំណេះដឹងពីការអ​នុវត្តអ​នាម័យបាន​ល្អ​ត្រឹមត្រូវនិងបទពិសោធន៍ដើម្បីពន្លឿន​ការងារ​ឈានទៅសម្រេចឱ្យបានការអនុវត្តការលើកកម្ពស់​អនាម័យជនបទឱ្យបាន១០0ភាគរយ។
ក្នុងកិច្ចប្រជុំឯកឧត្តម ញ៉ែម សំអឿន បានរំលេចថា ក្រោម​កិច្ចសហការជាមួយក្រសួងអភិវឌ្ឍន៍ជនបទ រដ្ឋបាលខេត្ត និងក្រុមការងារបច្ចេកទេសផ្គត់ផ្គង់ទឹកស្អាត អនាម័យជនបទ រួមជាមួយអង្គការនានាក្នុងខេត្ត ជាពិសេសអង្គការ​ភ្លែន​​អន្តរជាតិកម្ពុជា ដែល​បានរួមចំណែកយ៉ាងសកម្ម លើការ​ផ្គត់ផ្គង់ទឹកស្អាត និងអនាម័យជនបទ ទាំងនៅសហគមន៍ និងតាមសាលារៀន នៅទីជនបទ​ក្នុងខេត្តរតនគិរី ។តាមរយៈការខិតខំប្រឹងប្រែងរួមគ្នានេះបានធ្វើឱ្យខេត្តរតនគិរី សម្រេចបញ្ចប់ការបន្ទោបង់ពាសវាល ពាសកាល​ទាំងស្រុងនាឆមាសទី១ ឆ្នាំ២០២៤៕
ដោយ៖ គតិ យុត្ត