អាមេរិក៖ ប្រធានាធិបតីនៃប្រទេសអ៊ុយក្រែន លោក Volodymyr Zelensky រន្ធត់ចិត្ត និង បានជូនពរ លោក Trump ឲ្យឆាប់ជាសះស្បើយ បន្ទាប់ពីត្រូវបានគេបាញ់ឲ្យរងរបួស ក្នុងពេលជួបជុំមួយ កាលពីល្ងាចថ្ងៃសៅរ៍ ម៉ោងនៅអាមេរិក។

លោកបានថ្លែងថា៖ «អំពើហិង្សាក្នុងគ្រប់ទម្រង់ និងកន្លែងណាក៏ដោយ គឺមិនត្រូវមាន ជាដាច់ខាត»។ «ខ្ញុំសូមជូនពរឱ្យប្រជាជនអាមេរិក មានភាពរឹងមាំ ក្រោយពេលកើតរឿងនេះ»។

ប្រធានាធិបតី Zelensky ក៏បានរៀបរាប់ នៅលើបណ្តាញសង្គម X ដែរថា លោករន្ធត់ណាស់ ដែលបានដឹងពីការបាញ់ប្រហារនេះ ហើយបានសម្តែងការសោកស្តាយចំពោះសាច់ញាតិ របស់អ្នកចូលរួមម្នាក់ដែលបានស្លាប់ នៅក្នុងការវាយប្រហារ។

គួររម្លឹកថា អតីតប្រធានាធិបតី និងជាបេក្ខជនប្រធានាធិបតីសហរដ្ឋអាមេរិករូបនេះ ត្រូវបានបាញ់ឲ្យរងរបួសត្រង់ត្រចៀក នៅក្នុងការប៉ុនប៉ងធ្វើឃាត នៅរដ្ឋ Pennsylvania ជាពេលជួបជុំ រកការគាំទ្រសម្រាប់ការបោះឆ្នោតជ្រើសរើសប្រធានាធិបតីថ្មី ដែលគ្រោងនឹងប្រព្រឹត្តទៅ នាខែវិច្ឆិកា ឆ្នាំ២០២៤។

ក្រៅពីស្លាប់អ្នកគាំទ្រម្នាក់ ក៏មានអ្នកចូលរួមពីរនាក់ទៀត រងរបួសធ្ងន់ធ្ងរផងដែរ ខណៈដែលខ្មាន់កាំភ្លើង ត្រូវបានអះអាងថា ស្លាប់៕

ប្រភពពី AFP ប្រែសម្រួល៖ សារ៉ាត