ទោះជាភ្លៀងធ្លាក់ជាប់ៗគ្នាមិនដាច់ក៏កំណាត់ផ្លូវជាតិលេខ៣ ត្រពាំងរពៅ-វាលរេញ នៅតែអាចធ្វើចរាចរណ៍បាន
ភ្នំពេញ៖ឯកឧត្តម ផន រឹម អ្នកនាំពាក្យក្រសួងសាធារណការនិងដឹកជញ្ជូនបានប្រាប់ឱ្យដឹងថា គិតត្រឹមថ្ងៃទី១៩ ខែកក្កដា ឆ្នាំ២០២៤នេះ ភ្លៀងបានបន្តធ្លាក់ជាប់ៗគ្នាឥតដាច់ជាង១០ថ្ងៃមកហើយ ធ្វើឱ្យកំណាត់ផ្លូវជាតិលេខ៣ ត្រង់ចំណុចត្រពាំងរពៅ-វាលរេញ ដែលរងការខូចខាតស្រាប់ផងនោះ កាន់តែពិបាកក្នុងដំណើរការជួសជុល ថែទាំ ជួសជុលប្រចាំ ក៏ប៉ុន្តែស្ថានភាពចរាចរណ៍នៅដំណើរការធម្មតា។
លើបណ្ដាញសង្គមផ្លូវការ ឯកឧត្តម ផន រឹម បានបញ្ជាក់ថា ពេលដាច់គ្រាប់ភ្លៀង មន្ទីរសាធារណការនិងដឹកជញ្ជូនខេត្តព្រះសីហនុ តែងចេញគ្រឿងចក្រដើម្បីបន្តថែទាំ ជួសជុលប្រចាំ ដើម្បីធានាការធ្វើចរាចរាចរណ៍របស់បងប្អូនប្រជាពលរដ្ឋ។
គួរបញ្ជាក់ថា កំណាត់ផ្លូវជាតិលេខ៣ (ត្រពាំងរពៅ-វាលរេញ) ត្រូវបានជួលជុល កែលម្អ ភ្ជួរ កៀរ កិន បង្ហាប់ តួផ្លូវ ដែលមានការខូចខាតប្រវែង២០,៦២គីឡូម៉ែត្រ ត្រង់ចំណុច (PK 181+100 – PK 201+720) ដើម្បីធានាការចរាចរណ៍របស់បងប្អូនប្រជាពលរដ្ឋដោយល្បឿនមធ្យម និងប្រើប្រាស់ថេរវេលាក្រោមមួយម៉ោងដើម្បីឆ្លងកាត់កំណាត់ផ្លូវដ៏លំបាកនេះ ទម្រាំឈានទៅដល់ការអនុវត្តការងារសាងសង់ជាក់ស្តែងឱ្យស្របទៅតាមបទដ្ឋានបច្ចេកទេសខ្ពស់នាពេលខាងមុខ។
ឯកឧត្តមអ្នកនាំពាក្យបានអំពាវនាវសូមបងប្អូនប្រជាពលរដ្ឋធ្វើដំណើរប្រកដោយសុខសុវត្ថិភាព និងសូមមេត្តាយោគយល់អធ្យាស្រ័យ ករណីមានការរំខានក្នុងអំឡុងពេលជួសជុល និងស្ថានភាពដ៏លំបាកនេះ៕
ដោយ៖មុនី
![](https://asset.ams.com.kh/central/media/2024/07/photo_2024-07-20_11-10-41-1024x768.jpg)
![](https://asset.ams.com.kh/central/media/2024/07/photo_2024-07-20_11-10-36-1024x768.jpg)
![](https://asset.ams.com.kh/central/media/2024/07/photo_2024-07-20_11-10-34-1024x768.jpg)
![](https://asset.ams.com.kh/central/media/2024/07/photo_2024-07-20_11-10-33-1024x768.jpg)
![](https://asset.ams.com.kh/central/media/2024/07/photo_2024-07-20_11-10-32-1024x768.jpg)
![](https://asset.ams.com.kh/central/media/2024/07/photo_2024-07-20_11-10-30-1024x768.jpg)
![](https://asset.ams.com.kh/central/media/2024/07/photo_2024-07-20_11-10-28-1024x768.jpg)
![](https://asset.ams.com.kh/central/media/2024/07/photo_2024-07-20_11-10-27-1024x768.jpg)