ភ្នំពេញ៖ អង្គការសត្វព្រៃ និងរុក្ខជាតិ បានឱ្យដឹងថា គិតចាប់តាំងពីឆ្នាំ២០០២មក តាមរយៈការតាមដាន និងសិក្សាស្រាវជ្រាវរហូតមកដល់ពេលបច្ចុប្បន្ន គេបានរកឃើញពងក្រពើភ្នំ ដែលបានញាស់ជាកូនលក្ខណៈបែបធម្មជាតិមានចំនួន២៣៦ក្បាល និងក្នុងនេះ កូនក្រពើភ្នំ ដែលធ្វើការបង្កាត់ចាប់តាំងពីឆ្នាំ២០១១មក បានញាស់ ៤៨៤ក្បាល សរុបមានចំនួន ៧២០ក្បាល។

លោក លូ វន្នី ប្រធានកម្មវិធីអភិរក្សដីគោកនៃអង្គការសត្វព្រៃ និងរុក្ខជាតិ បានប្រាប់ AMS ឱ្យដឹងថា តំបន់ជួរភ្នំក្រវាញ ដែលជាតំបន់ដាច់ស្រយាលរបស់ប្រទេសកម្ពុជា គឺមានវត្តមានសត្វក្រពើភ្នំច្រើនជាងគេ ក្នុងចំណោមកន្លែងដទៃទៀត ដូចជាទំបន់ទន្លេស្រែពក ខេត្តមណ្ឌលគិរី ជាដើម ។

លោកបាននិយាយថា ជាង ២០ឆ្នាំមកនេះ ក្នុងការតាមដានពី សំបុកកូនក្រពើភ្នំ គេបានរកឃើញមានកូនក្រពើភ្នំញាស់តាមលក្ខណៈធម្មជាតិ សរុបចំនួន ២៣៦ក្បាល ។ ក្រៅពីនេះសម្រាប់អង្គការសត្វព្រៃ និង រុក្ខជាតិ មានស្ថានីយបង្កាត់កូនក្រពើភ្នំនៅសួនសត្វភ្នំតាម៉ៅ ចាប់តាំងពីឆ្នាំ២០១១មកដល់ពេលបច្ចុប្បន្នបានធ្វើការបង្កាត់កូនក្រពើញាស់បានសរុបចំនួន ៤៨៤ក្បាល និងក្នុងចំណោមកូនក្រពើទាំងនេះក៏បានលែងក្នុងជម្រកធម្មជាតិបាន ១៩៦ក្បាល នៅតំបន់ជួរភ្នំក្រវាញនេះផងដែរ ។ ចំពោះទីតាំងដែលលែងកូនក្រពើភ្នំ គឺជាតំបន់ដាច់ស្រយាលខ្លាំងដែលកម្រមានអ្នកណាទៅដល់ណាស់ ។

ទាក់ទិនក្នុងរឿងនេះ លោក លូ វន្នី ឱ្យដឹងបន្ថែមថា៖តំបន់ជួរភ្នំក្រវាញគឺជាទីតាំងដែលមានវត្តមានក្រពើភ្នំច្រើនជាងគេដោយសារតែជាទីតាំងដាច់ស្រយាលខ្លាំង និងលក្ខខណ្ឌរស់នៅរបស់ក្រពើភ្នំល្អជាងគេ។

គួរបញ្ជាក់ថា កាលពីថ្មីៗមកនេះកូនក្រពើភ្នំចំនួន ៦០ ត្រូវបានក្រុមអ្នកជំនាញបានរកឃើញ និងវាបានញាស់ថ្មី នៅឧទ្យានជាតិជួរភ្នំក្រវាញ ភាគខាងលិចប្រទេសកម្ពុជា។ កូនក្រពើភ្នំទាំង ៦០នេះ បានញាស់ចេញពីក្នុងចំណោមពងក្រពើចំនួន១០៦ ដែលត្រូវបានរកឃើញ ក្នុង ៥សំបុកផ្សេងគ្នា កាលពីពាក់កណ្តាលខែឧសភា នៅក្នុងឧទ្យានជាតិភ្នំក្រវាញ។ កូនក្រពើភ្នំទាំងនេះ បានញាស់នៅចន្លោះពីថ្ងៃទី២៧ ដល់ថ្ងៃទី៣០ ខែមិថុនា ឆ្នាំ២០២៤។ ការរកឃើញកូនក្រពើនេះដែរត្រូវបានគេចាត់ទុកថាច្រើនបំផុតពុំធ្លាប់មាន ក្នុងរយៈពេល ២០ឆ្នាំចុងក្រោយនេះ ។

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ៖ ចំពោះសត្វក្រពើភ្នំនេះ រដ្ឋបាលព្រៃឈើ នៃក្រសួងកសិកម្មសហការជាមួយអង្គការសត្វព្រៃ និងរុក្ខជាតិ កម្ពុជា បានខិតខំជ្រើសរើស ពូជក្រពើភ្នំសុទ្ធមកបង្កាត់ហើយដាក់ចូកទៅក្នុងជម្រកធម្មជាតិវិញ ក្នុងដែនអភិរក្សបរិស្ថាន ។

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថានលើកឡើងថា៖ ក្រសួងបរិស្ថានបាន និងកំពុងធ្វើការអភិរក្ស និង ស្តារទីជម្រក របស់ក្រពើភ្នំដែលជាប្រភេទជិតផុតពូជបំផុតក្នុងធម្មជាតិ។

ដោយឡែក លោក ផាប្លូ ស៊ីណូវាស (Pablo Sinovas) នាយកប្រចាំប្រទេស នៃអង្គការសត្វព្រៃ និងរុក្ខជាតិកម្ពុជាបានប្រាប់ថា៖ “អស់រយៈពេលជាងមួយទស្សវត្សរ៍មកហើយដែលអង្គការសត្វព្រៃ និងរុក្ខជាតិកម្ពុជា ជាមួយនឹងដៃគូរបស់យើង បានខិតខំប្រឹងប្រែងក្នុងបេសកកម្មក្នុងការជំរុញការកើនឡើងនៃចំនួនសត្វក្រពើភ្នំ នៅតំបន់ជួរភ្នំក្រវាញ នៃប្រទេសកម្ពុជា ។ ការងាររបស់យើងនេះ មិនត្រឹមតែទាក់ទងនឹងការបង្កាត់ពូជក្រពើភ្នំសុទ្ធប៉ុណ្ណោះទេ ប៉ុន្តែយើង ធ្វើការដើម្បីធានាឱ្យបានថាពួកវាមានទីជម្រកសមរម្យដែលត្រូវលែងទៅក្នុងធម្មជាតិវិញ” ។

គួរបញ្ជាក់ថា អង្គការមូលនិធិសាកលសម្រាប់ធម្មជាតិ(WWF)បានឱ្យដឹង​នាថ្មីៗ​នេះថា ប្រទេសកម្ពុជា គឺជាប្រទេសដែលសំបូរក្រពើភ្នំច្រើនជាងគេនៅ​លើពិភពលោក។ នៅលើពិភពលោកមានក្រពើភ្នំប្រមាណ ១០០០ក្បាល ខណៈកម្ពុជានៅសេសសល់ក្រពើភ្នំដែលជាសត្វដ៏កម្របំផុតនៅលើពិភពលោកច្រើន ជាង ៣០០ក្បាល ហើយក្នុងចំណោមនេះស្ថិតនៅក្នុងតំបន់ជួរភ្នំ​ក្រវាញ​ទឹកដីខេត្តកោះកុង និងមួយចំនួនទៀតស្ថិតនៅតាមតំបន់ទន្លេស្រែពក​ក្នុងទឹកដីខេត្តមណ្ឌលគិរី ៕

ដោយ ៖ ម៉ាដេប៉ូ