សៀមរាប៖វគ្គហ្វឹកហ្វឺនស្តីពីការស្រាវជ្រាវទិន្នន័យចម្ការមីន និងបច្ចេក​ទេស​បោសសម្អាតមីន ដែលមានរយៈពេលបីសប្តាហ៍ដែល​មាន​សិក្ខាកាមជនជាតិបរទេសមកពីប្រទេសកូឡុំប៊ីចំនួនប្រាំបួននាក់ ត្រូវបានបិទបញ្ចប់កាលពីថ្ងៃទី២៦ ខែកក្កដា ឆ្នាំ២០២៤ នៅសណ្ឋាគារ​បុរីអង្គរ ខេត្តសៀមរាបក្រោមអធិបតីភាពលោក អ៊ុ ភូមិរ៉ូ អគ្គនាយករង​ស៊ីម៉ាក់និងជាតំណាងឯកឧត្តម ហេង រតនា ប្រតិភូរាជរដ្ឋាភិបាល​ទទួលបន្ទុកជាអគ្គនាយកស៊ីម៉ាក់ ។

វគ្គដែលបានបញ្ចប់ផ្តោតលើមុខជំនាញចំនួនបី ។ក្នុងនេះ ១. ការ​ស្រាវជ្រាវទិន្នន័យចម្ការមីន, ២. ការស្រាវជ្រាវមិនបច្ចេក​ទេស និង៣.ការស្រាវជ្រាវបច្ចេកទេស ។

លោក ធុន សុឃា ប្រធាននាយកដ្ឋានទំនាក់ទំនងអន្តរជាតិ និងគ្រប់​គ្រងគម្រោងបានឱ្យដឹងថា វគ្គហ្វឹកហ្វឹននេះបានផ្តល់ដល់​សិក្ខាកាម​​កូឡុំប៊ីនូវចំណេះដឹងស្តីពីដំណើរការស្រាវជ្រាវមូលដ្ឋាន (BLS) បូករួមជាមួយការប្រមូលទិន្នន័យយ៉ាងល្អិតល្អន់​តា​មប្រភពផ្សេងៗគ្នា។ការវិភាគទិន្នន័យអតីតតំបន់សង្គ្រាម ដើម្បីកំណត់ពី​តំបន់ដែលរងផលប៉ះពាល់ ដោយសារគ្រាប់មីន និងធ្វើការ​សិក្សាគ្រប់ជ្រុងជ្រោយនៅនឹងកន្លែង ដើម្បីផ្ទៀងផ្ទាត់ទៅនឹងព័ត៌មាន។

ប្រធានក្រុមសិក្ខាកាមកូឡុំប៊ី លោក អង់ដ្រេ ហ្គយិននីជិ ទីប្រឹក្សាអាយម៉ា បានថ្លែងអំណរគុណដល់ក្រុមការងារស៊ីម៉ាក់​ដែលបាន​ចែករំលែកចំណេះដឹង បទពិសោធន៍នៃការស្រាវជ្រាវ​យោងលើបទដ្ឋានប្រតិបត្តិការដែលស៊ីម៉ាក់កំពុងអនុវត្ត ។លោកថា ចំណេះដឹង​នេះ​ពិតជាបានរួមចំណែក​យ៉ាងខ្លាំងក្នុងវិស័យបោស​សម្អាតមីន ក្នុងន័យនេះប្រទេសកូឡុំប៊ីនឹងធ្វើការសិក្សា​បន្ថែមនិង​កែសម្រួល​បទដ្ឋាន​ប្រតិបត្តិការរបស់ខ្លួនដើម្បីឆ្លើយតបទៅនឹង​ដំណើរការនៃការស្រាវជ្រាវតាមបែបបច្ចេកទេស និងមិនបច្ចេក​ទេសដែលបាន​អនុវត្តប្រកបដោយប្រសិទ្ធភាពនៅក្នុងប្រទេសកម្ពុជា។

បើតាម លោក ហាយ៉ាសិ អាគីហិតុ ទីប្រឹក្សាបច្ចេកទេស និងជាទី​ប្រឹក្សាតំណាងទីភ្នាក់ងារសហប្រតិបត្តិការអន្តរជាតិជប៉ុន (ចៃកា) ទំនាក់ទំនងកិច្ចសហប្រតិបត្តិការរវាងស៊ីម៉ាក់ និងប្រទេសកូឡុំប៊ី​តាំងពីឆ្នាំ២០១០ និងបានបន្តការហ្វឹកហ្វឺនរហូតមកដល់​បច្ចុប្បន្ន​ក្រោម​ជំនួយពីចៃកា​។លោកបានលើកទឹកចិត្តដល់សិក្ខកាមក្នុងការចែក​រំលែកចំណេះដឹងដែលទទួលបានក្នុងវគ្គហ្វឹក​ហ្វឺនជាមួយ​សហការីនិងធ្វើការផ្លាស់ប្តូរយុទ្ធសាស្រ្តក្នុងការបោសសម្អាតមីន។

ចំណែកលោក អ៊ុ ភូមិរ៉ូ អគ្គនាយករងស៊ីម៉ាក់ បានកោតសរសើរ និងវាយតម្លៃវគ្គហ្វឹកហ្វឺន។លោកបានអរគុណដល់​ទីភ្នាក់ងារចៃកា, អាយស៊ីនេត (ICNET)។ ជាពិសេសមន្រ្តីជំនាញអង្គភាពស៊ីម៉ាក់ ដែលបានផ្តល់នូវការគាំទ្រក្នុងបណ្តុះបណ្តាលដល់សិក្ខាកាម​កូឡុំប៊ីក្នុងរយៈពេលបីសប្តាហ៍។លោកថា គោលបំណងនៃ​ការផ្តល់ការហ្វឹកហ្វឺន គឺដើម្បីសុវត្ថិភាព និងបង្កើនល្បឿននៃការបោស​សម្អាតមីនប្រកបដោយប្រសិទ្ធភាពខ្ពស់ដើម្បីរួមចំណែកក្នុងការធ្វើឱ្យពិភពលោកនេះគ្មានគ្រាប់មីន៕
ដោយ៖ ប៊ុន រដ្ឋា