ផ្ទុះបាតុកម្ម ជុំវិញការខ្វះទឹកប្រើ នៅអ៊ីតាលី
បរទេស៖ ប្រជាជនរាប់រយនាក់រស់នៅលើកោះ Sicily ប្រទេសអ៊ីតាលី បានតវ៉ាប្រឆាំងនឹងកង្វះទឹកប្រើប្រាស់ និងការគ្រប់គ្រង ទឹកមិនល្អ នៅលើកោះ ដែលរងគ្រោះដោយសារតែគ្រោះរាំងស្ងួតធ្ងន់ធ្ងរ នៅឆ្នាំនេះ។
អំឡុងបាតុកម្ម កាលពីថ្ងៃសុក្រ ប្រជាជននៅទីក្រុង Agrigento បានព្យាយាមបញ្ជូនសារ ទៅអាជ្ញាធរ តាមរយៈបដា សរសេររៀបរាប់ថា «យើងចង់បានទឹក» និងស្រែកថា «ជារឿងអាម៉ាស់» ព្រមទាំងបដាថា «ទឹកគឺជាសិទ្ធិសម្រាប់ទាំងអស់គ្នា ទឹក គឺជាសិទ្ធិជាមូលដ្ឋាន» ។
អ្នករៀបចំការហែក្បួន បានសង្កត់ធ្ងន់ថា «ប្រជាជនហត់នឿយនឹងកង្វះទឹក ឥតឈប់ឈរ និងការគ្រប់គ្រងធនធានទឹក ដែលគ្មានប្រសិទ្ធភាព»។ ក្រុមនេះបាននិយាយ នៅក្នុងសេចក្តីថ្លែងការណ៍មួយថា «ស្ថានភាពទឹក នៅក្នុងទីក្រុងត្រូវបានកាត់ផ្តាច់ ជាញឹកញាប់ ជាមួយនឹងការបែងចែកទឹក មិនមាននិរន្តរភាព» ។
គួរបញ្ជាក់ថា Agrigento ជាទីក្រុងដែលមានប្រជាជនចំនួន ៥៥០០០នាក់ រស់នៅតំបន់ឆ្នេរសមុទ្រភាគខាងត្បូង នៃកោះ Sicily ដែលជាទីតាំងបុរាណវត្ថុដ៏សំខាន់ ដែលមានប្រាសាទក្រិកស្ថិតក្នុងបញ្ជីបេតិកភណ្ឌពិភពលោក នៃអង្គការយូណេស្កូ។
យោងតាមទីភ្នាក់ងារសារព័ត៌មាន Ansa បានឱ្យដឹងថា នៅឯកិច្ចប្រជុំបន្ទាន់មួយ កាលពីថ្ងៃសុក្រ មន្ត្រី Sicilian បានអនុម័តវិធានការស្តីពីការបង្កើនបរិមាណទឹក នៅក្នុងទីក្រុង Agrigento ឱ្យបាន២០ភាគរយ ក្នុងរយៈពេល១០ថ្ងៃបន្ទាប់៕
ប្រភពពី AFP ប្រែសម្រួល៖ សារ៉ាត