(ភ្នំពេញ)៖ គណៈគ្រប់គ្រង និងអាជីវករផ្សារចាស់ ស្ថិតនៅក្នុងសង្កាត់វត្តភ្នំ ខណ្ឌ​ដូនពេញ រាជធានីភ្នំពេញ នៅព្រឹកថ្ងៃទី៥ ខែសីហា ឆ្នាំ២០២៤ រៀបចំពិធីអបអរ​សាទរ​ការបើកការដ្ឋានសាសង់ព្រែកជីកហ្វូណនតេជោ ៥ សីហា ២០២៤ ។

គម្រោងព្រែកជីកហ្វូណនតេជោ គឺជាព្រែកជីកប្រវត្តិសាស្ត្រថ្មី១សម្រាប់ព្រះរាជា​ណា​ចក្រ​កម្ពុជាក្នុងយុគសម័យសន្តិភាពនិងការឯកភាពជាតិពេញលេញ ដែលនឹងផ្តល់​ឧត្តមប្រយោជន៍យ៉ាងធំធេងជូនប្រជាជនខ្មែរទូទាំងព្រះរាជាណាចក្រកម្ពុជា ដែលជា​គំនិតផ្តួចផ្តើមប្រកបដោយចក្ខុវិស័យវែងឆ្ងាយរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានព្រឹទ្ធសភា​នៃព្រះរាជាណាចក្រកម្ពុជា និងបន្តអនុវត្តយ៉ាងម៉ឺងម៉ាត់ ព្រមទាំងជំរុញការ​អភិវឌ្ឍ​គម្រោងនេះឱ្យបានសម្រេចជោគជ័យ ដោយរាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រី​នៃព្រះរា​ជាណាចក្រកម្ពុជា។

គម្រោងព្រែកជីកនេះស្ថិតនៅភាគនិរតីនៃផ្លូវនាវាចរណ៍ និងប្រព័ន្ធភស្តុភារកម្ម​ទន្លេបាសាក់ ដែលនឹងដើរតួនាទីយ៉ាងសំខាន់ដល់ប្រព័ន្ធ ដឹកជញ្ជូនផ្លូវទឹករបស់​កម្ពុជា ឱ្យកាន់តែមានសក្ដានុពល តាមរយៈការកាត់បន្ថយរយៈពេល កាត់បន្ថយ​ចម្ងាយផ្លូវនិងតំម្លៃក្នុងការដឹងជញ្ជូន និងនីតិវិធីនៃការដឹកជញ្ជួនឆ្លងកាត់ទំនិញ​ពីកម្ពុជាចេញទៅសមុទ្រ។

គម្រោងនេះនឹងជួយជំរុញដល់កំណើនសេដ្ឋកិច្ចកម្ពុជា ដែលមានជាអាទិភាព​ក្នុងការ​ទាក់ទាញការវិនិយោគនិងការអភិវឌ្ឍ លើវិស័យដឹកជញ្ជូនពហុម​ធ្យោ​បាយតាមផ្លូវទឹក ទន្លេ សមុទ្រ និងកំពង់ផែ ការបង្កើតបាននូវមជ្ឈមណ្ឌល​ពាណិជ្ជកម្ម ការអភិវឌ្ឍ​ផែរណបថ្មីៗជាច្រើន ការពង្រីកតំបន់អភិវឌ្ឍន៍កសិ-ឧស្សាហកម្ម ប្រព័ន្ធធារាសាស្ត្រ វារីវប្បកម្ម ជួយបង្កើតប្រភពត្រីទឹកសាបនៅតាម​ព្រែកប្រឡាយនានានិងអេកូ​ទេសចរ​ណ៍ ដែលនឹងរួមចំណែកយ៉ាងសកម្មដល់ការអភិវឌ្ឍ សេដ្ឋកិច្ចជាតិ លើក​កម្ពស់​កម្រិត​ជីវភាពប្រជាពលរដ្ឋឱ្យកាន់តែប្រសើរឡើង ហើយក៏ជាប្រភពផ្គត់ផ្គង់ទឹក និងជួយ​រំដោះទឹកជំនន់នៅតាមបណ្តាខេត្តភាគទិសនិរតី យ៉ាងមានប្រសិទ្ធ​ភាពផងដែរ ៕

ដោយ ៖ ង៉ាន់ ទិត្យ