ភ្នំពេញ៖ ក្រុម VKH Rally Racing បានចេញដំណើរទៅចូលរួមព្រឹត្តការណ៍​ប្រណាំង​រថយន្ត ឆ្លងកាត់ឧបសគ្គ ឆ្នាំ២០២៤ ( Asia Cross Country Rally 2024 ) លើចម្ងាយផ្លូវសរុប ២៤០០គីឡូម៉ែត្រ នៅប្រទេសថៃ ដោយបានឆ្លងកាត់​ព្រំដែនតាមច្រកចាំយាមខេត្តកោះកុង ឆ្ពោះទៅសម្រាកនៅខេត្តត្រាត។

កីឡាករ វង្ស គឹមហួត បានបញ្ជាក់ថា ឆ្លងតាមបទពិសោធន៍ធ្លាប់ចូលរួមការ​ប្រណាំង​កម្រិតអាស៊ីមួយនេះ តាំងពីឆ្នាំ២០១៣ រហូតឆ្នាំ២០២៤នេះ ក្រុម VKH Rally Racing នឹងទទួលបានលទ្ធផលល្អ ពីព្រោះក្រុមការងារមានចិត្តមោះមុត និង​ឆន្ទៈខ្ពស់ បូករួមនឹងបទពិសោធន៍ ភាពស្ទាត់ជំនាញជាច្រើនឆ្នាំ​លើផ្នែក​បច្ចេកទេស ការជួសជុល និងការជួយសង្គ្រោះរថយន្តប្រណាំង។

អ្នកជំនាញប្រណាំង Rally រូបនេះ បន្ថែមថា ចំពោះបញ្ហាបច្ចេកទេស​រថយន្ត​ប្រណាំង​ដែលយើងធ្លាប់ឆ្លងកាត់ យើងបានកែសម្រួលគ្រប់បែបយ៉ាងដែលគិត​មិនដល់ យើងត្រូវប្រុងប្រយ័ត្នជាងមុនទ្វេរដង។ កីឡាករ វង្ស គឹមហួត បន្តថា សម្រាប់ការធ្វើដំណើរពីភ្នំពេញទៅកាន់ខេត្តសូរ៉ាតថានី ត្រូវសម្រាកតាមផ្លូវ២ថ្ងៃ​​​​ទើបដល់គោលដៅ លើចម្ងាយផ្លូវ ១៣០០គីឡូម៉ែត្រ។ ជាមួយគ្នានេះយើងបាន​សម្រេចចិត្តបើករថយន្តប្រណាំងផ្លូវឆ្ងាយ ដើម្បីសាកល្បងរថយន្ត និងពិនិត្យ​ពីបច្ចេកទេស កម្លាំងម៉ាស៊ីន គ្រឿងក្រោមរថយន្ត កង់ និងផ្នែកផ្សេងៗខ្វះខាត​កន្លែងណា និងសល់ពេលវេលាច្រើនបានជួសជុល អោយបានល្អជៀសវាងបញ្ហាកើតឡើងដូចឆ្នាំមុន។

កីឡាករ វង្ស គឹមហួត អោយដឹងទៀតថា ការប្រណាំង Rally ឆ្នាំនេះ មានរថយន្ត​ចូលរួមច្រើនរហូត៤៥គ្រឿង រីឯ Class សាំង ៩គ្រឿង មកពី១០ប្រទេស សិតសឹង​តែជៀងខ្លាំង មានកីឡាករប្រណាំងថ្មី និងកីឡាករប្រណាំងដែលខកខាន​ពីឆ្នាំមុន​ក៏ត្រឡប់មកចូលរួមវិញ។

គួររម្លឹកថា ព្រឹត្តការណ៍ប្រណាំងរថយន្ត ឆ្លងកាត់ឧបសគ្គ ឆ្នាំ២០២៣ ក្រុម VKH Rally Racing ទទួលបានលេខ១១ ក្នុងរថយន្តប្រណាំងសរុប ៤១គ្រឿង ។

សូមបញ្ជាក់ថា ព្រឹត្តការណ៍ប្រណាំងរថយន្ត ឆ្លងកាត់ឧបសគ្គ ឆ្នាំ២០២៤ ( Asia Cross Country Rally 2024 ) នឹងចាប់ផ្តើមប្រកួតរយៈពេល៦ថ្ងៃ ពីថ្ងៃទី១១ ដល់ទី​១៧ ខែសីហា នៅប្រទេសថៃ ពីខេត្តសូរ៉ាតថានី ទៅខេត្តហួហ៊ីន និងបញ្ចប់​នៅខេត្តកាន់ឆាណាក់បូរី។ ក្រុម VKH Rally Racing មានរថយន្តប្រណាំងមួយ​គ្រឿង បើបរដោយកីឡាករ ហេង បញ្ញា និងជំនួយការអ្នកបើកបរ កីឡាករ វង្សគឹមហួត និងមានរថយន្ត Service ៤គ្រឿង ៕

អត្ថបទ-រូបភាព ចាន់ វិចិត្រ