កំពត៖អាជ្ញាធរស្រុកទឹកឈូ បានបញ្ជាក់ថា ថ្ងៃទី៥ ខែសីហា ឆ្នាំ​២០២៤ គឺជាថ្ងៃប្រវត្តិសាស្ត្រដែលប្រជាពល​រដ្ឋខ្មែរ​គ្រប់រូបត្រូវ​ចងចាំចាប់ពីថ្ងៃនេះទៅ។ ទី១.ជាថ្ងៃបើកការ​ដ្ឋានព្រែកជីក​ហ្វូណន​តេជោ ដែលជាមរតកដ៏មហាសាលសម្រាប់អ្នកជំនាន់ក្រោយ និងទី២ គឺជាថ្ងៃកំណើតរបស់សម្តេចតេជោ ហ៊ុន សែន បិតាសន្តិភាពកម្ពុជា។ លោកថា ការចូលរួមអបអរសាទររបស់ពលរដ្ឋនៅគ្រប់ទិស បាន​បង្ហាញពីគោលជំហរគាំទ្រ និងជឿជាក់មកលើរាជរដ្ឋាភិបាល។

អភិបាលស្រុកទឹកឈូ លោកអ៊ឹម ច័ន្ទសោធន បានប្រាប់ក្នុងកម្មវិធី​អបអរសាទរ ថ្ងៃបើកការដ្ឋានព្រែកជីកហ្វូណនតេជោ នៅល្ងាច​ថ្ងៃទី៥ ខែសីហាថា  សម្រាប់ខេត្តកំពត ក៏ដូចជាស្រុកទឹកឈូ ទាំងមន្ត្រីរាជការ កងកម្លាំង យុវជន សិស្សនិស្សិត ប្រជាពលរដ្ឋ ព្រះសង្ឃ និងសាសនិក​ផ្សេងៗទូទាំងខេត្ត បានបង្ហាញនូវទឹកចិត្តរំភើបរីករាយក្រៃលែង ក្នុងការ​ចូលរួមអបអរសាទរពិធីបើកការដ្ឋាន ព្រែកជីកហ្វូណនតេជោ។

លោកបានបញ្ជាក់ មិនថាខេត្តកំពត  ឬស្រុកទឺកឈូទេ នៅទូទាំង​ប្រទេស  គ្រប់ទិសទីមាន​រៀបចំកម្មវិធី​អបអរសាទរយ៉ាងឱឡារឹកបំផុត  ។ទាំងនេះបានបង្ហាញថា ប្រជាពលរដ្ឋខ្មែរ យល់ច្បាស់អំពីគុណតម្លៃ នៃគម្រោងព្រែកជីកហ្វូណន​តេជោ បង្ហាញគោលជំហរគាំទ្រ និងជឿ​ជាក់លើការដឹកនាំដ៏ត្រឹមត្រូវរបស់រាជរដ្ឋាភិបាលដែលដឹកនាំដោយសម្ដេចធិបតី ហ៊ុន ម៉ាណែត។

ដោយឡែកក្រុមយុវជនស្រឡាញ់សន្តិភាពស្រុកទឹកឈូ  ក៏បានបង្ហាញ​ពីការមើលឃើញ​របស់ខ្លួនថា ប្រជាពលរដ្ឋគ្រប់ទិសទី​នៅក្នុងខេត្តកំពត បានចូលរួមអបអរសាទរពិធីបើកការដ្ឋានព្រែកជីកហ្វូណនតេជោយ៉ាងផុសផុល  និងប្រកបដោយទឹក​ចិត្តរំភើប​រីករាយ។

សូមជម្រាបថា កម្មវិធីអបអរសាទរថ្ងៃបើកការដ្ឋានព្រែកជីក​ហ្វូណន​តេជោ នៅខេត្តកំពត ត្រូវបានរៀបចំឡើងនៅតាម​រដ្ឋបាល​គ្រប់​លំដាប់​ថ្នាក់  មន្ទីរ អង្គភាព ស្ថាប័នរដ្ឋ និងឯកជន គ្រឹះស្ថានសិក្សា​អប់រំផ្សេងៗ​ដោយមានការទូងស្គរវាយជួង​រគាំង  និង​មានការស្រែក​ជយឃោស​យ៉ាងកងរំពងនៅគ្រប់ទីកន្លែង។ ពេលល្ងាចមាន​ការរាំច្រៀង​កម្សាន្ត ការទទួលទាន​អាហារសាមគ្គី  ការកាត់នំខួប​កំណើត និងការ​បាញ់កាំជ្រួចផងដែរ។
គប្បីបញ្ជាក់ដែរថា ខេត្តកំពតគឺជាខេត្តមួយក្នុងចំណោមខេត្តទាំងបួន ដែលព្រែកជីកហ្វូណនតេជោឆ្លងកាត់ ក្នុងនោះមាន ខេត្ត
កណ្ដាល តាកែវ កំពត និងខេត្តកែប៕
ដោយ សិលា សារិន