ភ្នំពេញ៖រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈឯកឧត្តម ហេង សួរ បានរំលឹកដល់​ពលរដ្ឋខ្មែរ និងពលករដែលកំពុង​ស្នាក់នៅ​ក្នុងខេត្តជាប់ឆ្នេរសមុទ្រទាំងប្រាំឱ្យស្តាប់ការណែនាំរបស់អាជ្ញាធរជប៉ុន។ការរំលឹកនេះខណៈ​ទីភ្នាក់ងារឧតុនិយម​ជប៉ុននៅរសៀលថ្ងៃទី៨ ខែសីហា ឆ្នាំ២០២៤នេះបានជូនដំណឹងថា មានគ្រោះរញ្ជួយដីកម្រិត​៦រ៉ិចទ័រដែលអាចបង្កឱ្យមានហានិ​ភ័យ​នៃរលកយក្សស៊ូណាមិនៅ​តាមតំបន់ជាប់មាត់សមុទ្រនៃខេត្តចំនួនប្រាំ។

ខេត្តទាំងប្រាំនោះមាន ខេត្ត គូជី(Kochi), ខេត្ត មីយ៉ាហ្សាគី​(Miyazaki), ខេត្ត អូអ៊ីតា(Oita), ខេត្ត កាហ្គូស៊ីម៉ា(Kagoshima) និងខេត្ត អេហ៊ីម៉េ(Ehime)។លើតាមបណ្តាញសង្គមផ្លូវការនៅ​រសៀលថ្ងៃទី៨ ខែសីហា នេះដែរ ឯកឧត្តមរដ្ឋមន្ត្រី ហេង សួរ បានរំលឹកថា “សូមបងប្អូនប្រជាពលរដ្ឋខ្មែរដែលកំពុងរស់​នៅតំបន់​ខាងលើ មានការប្រុងប្រយ័ត្នខ្ពស់ និងអនុវត្តតាមការណែនាំរបស់​អាជ្ញាធរមូលដ្ឋានក្នុងករណីមានការជម្លៀសទៅកាន់កន្លែងមានសុវត្ថិភាព ហើយប្រសិនបើបងប្អូនបានទទួលព័ត៌មានអំពី​ករណី​ពលរដ្ឋខ្មែរ​យើងដែលរងផលប៉ះពាល់ សូមមេត្តាជូនដំណឹងមកស្ថាន​ទូតជា​បន្ទាន់តាមរយៈហ្វេស​ប៊ុកស្ថានឯកអគ្គរាជទូត​កម្ពុជាប្រចាំប្រទេសជប៉ុន Royal Embassy of Cambodia in Japan ឬ 080 4689 9374”។

ជាមួយគ្នានេះ ឯកឧត្តមរដ្ឋមន្រ្តីក៏បានជូនពរឱ្យបងប្អូនទាំងអស់​គ្នាជួបសុខសុវត្ថិភាព ចៀសផុតពីគ្រោះធម្មជាតិនេះផងដែរ។

គួរបញ្ជាក់ថា យោងតាមការផ្សព្វផ្សាយរបស់ទីភ្នាក់ងារឧតុនិយម​ជប៉ុននៅរសៀលថ្ងៃទី៨ ខែសីហានេះបានជូនដំណឹងថា មានគ្រោះ​រញ្ជួយដីកម្រិត៦រ៉ិចទ័រដែលអាចបង្កឱ្យមានហានិភ័យនៃរលកយក្សស៊ូណាមិនៅតាមតំបន់ជាប់មាត់សមុទ្រនៃខេត្ត គូជី(Kochi), ខេត្ត មីយ៉ាហ្សាគី(Miyazaki), ខេត្ត អូអ៊ីតា(Oita), ខេត្ត កាហ្គូស៊ីម៉ា​(Kagoshima) និងខេត្ត អេហ៊ីម៉េ(Ehime)៕

ដោយ ៖ង៉ាន់ ទិត្យ