ភ្នំពេញ៖នៅប្រទេសជប៉ុននៅថ្ងៃទី៨ ខែសីហា ឆ្នាំ២០២៤ នេះ​ស្ថានឯក​អគ្គរាជទូតនៃព្រះរាជាណាចក្រកម្ពុជា ប្រចាំប្រទេសជប៉ុន បានជូនដំណឹងដល់បងប្អូនប្រជាពលរដ្ឋខ្មែរទាំងអស់ដែលកំពុងរស់នៅ ធ្វើការ និងសិក្សានៅប្រទេសជប៉ុនថា ទីភ្នាក់ងារឧតុ​និយម​ជប៉ុនបាន​ចេញសេចក្តីជូនដំណឹងអំពីគ្រោះរញ្ជួយដី កម្រិត៦ រិចទ័រ នៅខេត្ត មីយ៉ាហ្សាគី(Miyazaki )ស្ថិតនៅភាគនិរតី​ប្រទេស​ជប៉ុន ដែល​អាចបង្កឱ្យមានហានិភ័យនៃរលកយក្សស៊ូណាមិនៅតាមតំបន់ជាប់មាត់សមុទ្រនៃខេត្ត គូជី(Kochi), ខេត្ត​អូអ៊ីតា​(Oita), ខេត្ត កាហ្គូស៊ីម៉ា​(Kagoshima) និងខេត្ត អេហ៊ីម៉េ(Ehime) នៅរសៀលថ្ងៃទី៨ ខែសីហា។

ស្ថានទូតបានរំលឹកថា សូមបងប្អូនប្រជាពលរដ្ឋខ្មែរ ដែលកំពុងរស់​នៅតំបន់ខាងលើ មានការប្រុងប្រយ័ត្នខ្ពស់ និងអនុវត្តតាម​ការ​ណែនាំរបស់អាជ្ញាធរមូលដ្ឋាន ក្នុងករណីមានការជម្លៀស ឬប្រសិនបង​ប្អូនបានទទួលព័ត៌មានអំពីពលរដ្ឋខ្មែរយើង​ដែលរង​ផលប៉ះ​ពាល់ សូមមេត្តាជូនដំណឹងមកស្ថានទូតជាបន្ទាន់តាមរយៈហ្វេសប៊ុកស្ថានឯកអគ្គរាជទូតកម្ពុជាប្រចាំប្រទេសជប៉ុន Royal Embassy of Cambodia in Japan ឬ 080 4689 9374 ៕
ដោយ៖ ង៉ាន់ ទិត្យ