រដ្ឋមន្រ្តីក្រសួងកសិកម្ម ពិភាក្សាការងារអំពីគម្រោងជីវម៉ាសជាមួយមន្រ្តីអង្គការស្បៀង និងកសិកម្មនៃសហប្រជាជាតិ
ភ្នំពេញ៖ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យក្រុមការងារសហការពិនិត្យគម្រោងជីវម៉ាស (Biomass)ជាមួយអង្គការស្បៀង និងកសិកម្មនៃសហប្រជាជាតិប្រចាំប្រទេសកម្ពុជាទៅតាមលទ្ធភាពដែលអាចធ្វើបាន និងប្រើប្រាស់នូវអ្វីដែលមានស្រាប់ ប្រកបដោយប្រសិទ្ធភាព និងនិរន្តរភាព។ ឯកឧត្តមរដ្ឋមន្រ្តីក៏ បានលើកទឹកចិត្តឱ្យមានការសិក្សាបន្ថែមពីទីតាំង និងយុទ្ធសាស្រ្តក្នុងការអនុវត្តគម្រោងនេះ ឱ្យមានផលចំណេញដល់សេដ្ឋកិច្ចកម្ពុជាផងដែរ។
ការលើកឡើងបែបនេះក្នុងឱកាស ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទទទួលជួបពិភាក្សាការងារអំពីជីវម៉ាស ជាមួយលោកស្រី Rebekah Bell នាយកអង្គការស្បៀង និងកសិកម្មនៃសហប្រជាជាតិប្រចាំប្រទេសកម្ពុជានៅថ្ងៃទី៨ ខែសីហា ឆ្នាំ២០២៤។
ក្នុងជំនួបនេះឯកឧត្តមរដ្ឋមន្ត្រី បានស្តាប់ការធ្វើបទបង្ហាញអំពីជីវម៉ាសដែលអាចទទួលបានពីប្រភពផ្សេងៗ ដូចជា រុក្ខជាតិ កាកសំណល់សត្វ ដំណាំកសិកម្ម និងសំណល់ឧស្សាហកម្ម ហើយជាធម្មតាត្រូវបានបំប្លែងទៅជីវឧស្ម័ន និងជីវឥន្ធនៈជាដើម៕
ដោយ៖ម៉ាដេប៉ូ
