ភ្នំពេញ៖ សិល្បៈករ សិល្បៈការិនី យើងត្រូវចេះប្រើប្រាស់វេទិការ ឬបណ្តាញ​ផ្សព្វផ្សាយឯកជនរបស់ខ្លួន ដើម្បីអប់រំអំពីផលប៉ះពាល់នៃគ្រឿងញៀន។ ត្រូវធ្វើអ្វីៗ​ដើម្បីជួយឱ្យពលរដ្ឋរបស់យើងចៀសផុតពីគ្រឿងញៀន ដែលបំផ្លាញសង្គម បំផ្លាញ​គ្រួសាររបស់ពួកគាត់។ នេះជាការថ្លែងបញ្ជាក់ពីសំណាក់ឯកឧត្តម នេត្រ ភក្ត្រា រដ្ឋមន្ត្រី​ក្រសួងព័ត៌មាន និងជាប្រធានគណៈកម្មការទទួលបន្ទុក​ផ្សព្វផ្សាយ​អប់រំ​ស្តីពីគ្រឿងញៀន។

ក្នុងពិធីចុះហត្ថលេខា លើអនុស្សារណៈ នៃការយោគយល់ រវាង អាជ្ញាធរជាតិ​ប្រយុទ្ធប្រឆាំងគ្រឿងញៀន និងក្រុមហ៊ុនហង្សមាស គ្រុប ស្តីពីកិច្ចសហប្រតិបត្តិការ​ពង្រឹង និងលើកកម្ពស់ប្រសិទ្ធភាពការងារ ផ្សព្វផ្សាយអប់រំពីផលប៉ះពាល់ និង​គ្រោះថ្នាក់ដោយសារគ្រឿងញៀន រសៀលថ្ងៃទី ០៨ ខែ សីហា ឆ្នាំ២០២៤ នាស្ថានីយ៍វិទ្យុ និងទូរទស្សន៍ហង្សមាស ស្ថិតក្នុងខណ្ឌច្បារអំពៅ រាជធានីភ្នំពេញ ឯកឧត្តមរដ្ឋមន្រ្តីក្រសួងព័ត៌មានបានឱ្យដឹងថា ៖ ”ទាំងផលិតករ ទាំងសិល្បៈករ​សូមចូលរួមក្នុងការផលិត ឬជាស្បតអប់រំដើម្បីផ្សព្វផ្សាយ ។ ក្រសួងព័ត៌មាននឹង​ជួយជំរុញឱ្យបណ្តាញសារព័ត៌មានផ្សេងៗទាំងទូរទស្សន៍ វិទ្យុ វើបសាយជាដើម​ជួយផ្សព្វផ្សាយបន្ត។ខ្ញុំសុំឱ្យការប្រគុំតន្រ្តីធំៗ ប្រដាល់ ឬកម្មវិធីផ្សេងៗ​ទៀតជួយផ្សព្វ​ផ្សាយ និងបញ្ជ្រាបការអប់រំពីគ្រោះថ្នាក់កើតចេញពីគ្រឿងញៀននេះ” ។

ឯកឧត្តមរដ្ឋមន្រ្តីបានថ្លែង ឱ្យដឹងដែរថាគិតត្រឹមរយៈពេល២២០ថ្ងៃ នៃយុទ្ធនាការ​បង្ក្រាបរួមទូទាំងប្រទេស ចាប់ពីថ្ងៃទី១ ខែមករា ២០២៤ ដល់ថ្ងៃ៧ ខែសីហា ឆ្នាំ២០២៤ មានចំនួន ៦៤៥៥ករណី ឃាត់មនុស្សបាន ១៦០៤២នាក់ ស្រី ១២៧៧នាក់ ចាប់បានសារធាតុញៀនគ្រប់ប្រភេទចំនួនជាង៥តោន គីមីផ្សំមាន​ចំនួន ២២៧គីឡូក្រាម កញ្ឆារស្ងួត ៦២គីឡូក្រាម និងកញ្ឆារស្រស់ជាង ៦ពាន់ដើម។

ឯកឧត្តមបានបន្តថា ប្រមុខរាជរដ្ឋាភិបាលក៏បានដាក់ចេញនូវវិធានការ ” សម្អាតចក​ក្នុងបឹង ” គឺលប់បំបាត់ឱ្យអស់នៅក្នុងសង្គម តាមរយៈ ការតេស្តរកសារធាតុញៀន នៅក្នុងជួរមន្ត្រីរាជការ និងកងកម្លាំងមានសមត្ថកិច្ចទាំងបីស្ថាប័ន ដោយបានធ្វើតេស្ត ចំនួន ១០០៩៣១នាក់ មានវិជ្ជមាន ៩៨នាក់ ត្រូវបានបណ្តេញចេញពីក្រមខ័ណ្ឌ ៨៩នាក់ និង ៨នាក់ កំពុងអនុវត្តតាមច្បាប់ ។

អ្នកឧញ៉ា អ៊ឹង ឆៃងួន អគ្គនាយកក្រុមហ៊ុនហង្សមាស គ្រុប លើកឡើងថា ៖ កិច្ចសហ​ការ​​គ្នាក្នុងការផ្សព្វផ្សាយរវាងហង្សមាស និងអាជ្ញាធរជាតិប្រយុទ្ធប្រឆាំងគ្រឿងញៀន​នាពេលនេះ បានបង្ហាញឱ្យឃើញពីការយកចិត្តទុកដាក់របស់រាជរដ្ឋាភិបាល និង​អាជ្ញា​ធរ ក្នុងការលើកកម្ពស់ប្រព័ន្ធផ្សព្វផ្សាយ តាមរយៈហង្សមាស ក្នុងការផ្សព្វ​ផ្សាយទប់ស្កាត់ ការលក់ដូរ និងប្រើប្រាស់គ្រឿងញៀន ។ នាពេលកន្លងមក ក្នុង​កម្មវិធីនានារបស់ហង្សមាស ទាំងកម្មវិធីសិល្បះ ព័ត៌មាន ហង្សមាស តែងតែ ផ្សព្វ​ផ្សាយជានិច្ច ក្នុងការបញ្ជ្រាបសារអប់រំ ស្តីពីបញ្ហាគ្រឿងញៀន។

ក្នុងនាមហង្សមាស អ្នកឧញ៉ា សូមចូលរួមគាំទ្រ ដល់វិធានការរបស់រដ្ឋភិបាល ដែលបានដាក់ចេញក្នុងការលប់បំបាត់បញ្ហាគ្រឿងញៀន ឱ្យអស់នៅកម្ពុជា។

រដ្ឋមន្រ្តីក្រសួងព័ត៌មាន បានឱ្យដឹងដែរថា គ្រឿងញៀនភាគច្រើនឆ្លងចូលមកប្រទេស​កម្ពុជា តាមរយៈដីគោក ប្រមាណ ៥៦ភាគរយ តាមផ្លូវទឹក ៨ភាគរយ ផ្លូវអាកាស ១០ភាគរយ កញ្ចប់ប្រៃសណីយ៍ប្រមាណ ២០ភាគរយ និងការកែច្នៃក្នុងប្រទេស​ប្រមាណ ១០ភាគរយ ។តាមការប៉ាន់ប្រមាណ យុវជនជាង២ ម៉ឺន ទៅ៣ម៉ឺននាក់ បាននិងកំពុងរងឥទ្ធិពលពីគ្រឿងញៀន ។ ដោយឡែកសម្រាប់ក្រុមមនុស្សរង​គ្រោះពីគ្រឿងញៀនកើតឡើងដោយសារ ៣ចំណុចសំខាន់ៗគឺការចង់សាក,​ទី២ចាញ់បោកគេឱ្យប្រើប្រាស់ និងទី ៣ចាប់បង្ខំតែម្តង ៕

ដោយ៖ម៉ាដេប៉ូ