តំណាងយូណេស្កូប្រចាំកម្ពុជា៖ថែរក្សាការពារទាំងប្រាសាទបុរាណនិងប្រជាជន
សៀមរាប៖លោក សាដា យូម៉ា អាឡាម (Sardar Umar Alam)តំណាងយូណេស្កូប្រចាំនៅកម្ពុជាកាល ពីព្រឹកថ្ងៃទី១៣ ខែសីហា ឆ្នាំ២០២៤ នៅក្នុងកិច្ចពិគ្រោះយោបល់ស្ដីពី”ការគ្រប់គ្រងតំបន់រមណីយដ្ឋានបេតិកភណ្ឌពិភពលោក អង្គរ”បានលើកឡើងពីបំណងប្រាថ្នាក្នុងការថែរក្សាការពារទាំងប្រាសាទបុរាណ និងប្រជាជន។
លោកបន្តថា នេះគឺស្របតាមចក្ខុវិស័យរបស់សម្តេចមហាបវរធិបតីនាយករដ្ឋមន្រ្តីដែលបានដាក់ចេញរវាងអង្គរ និងប្រជាជន គឺត្រូវយកទាំងពីរ។
លោកបន្ថែមថា អង្គរ ជាប្រាសាទបុរាណជាសម្បត្តិបេតិកភណ្ឌជាតិ និងជាសម្បត្តិវប្បធម៌របស់មនុស្សជាតិដែលមានតែមួយគត់ នៅលើផែនដីនេះ ជាតំណាងឱ្យវប្បធម៌អរិយធម៌ដ៏រុងរឿងនៃប្រជាជាតិខ្មែរយើង។ ប្រជាជន រាជរដ្ឋាភិបាល មានកាតព្វកិច្ច ក្នុងការបម្រើ និងការពារផលប្រយោជន៍ដ៏ឧត្តុង្គឧត្តម្ភរបស់ប្រជាពលរដ្ឋគ្រប់រូប គ្រប់ក្រុមគ្រួសារ និងគ្រប់និន្នាការនយោបាយ ជំនឿសាសនា ដោយមិនរើសអើងពណ៌ “គ្មានប្រជាជន គឺគ្មានប្រជាជាតិដ៏ឧត្តុង្គឧត្តម្ភរបស់យើងនោះទេ”។
ថ្លែងនៅក្នុងពិធីបើកិច្ចពិគ្រោះយោបល់ស្តីពី “ការគ្រប់គ្រងតំបន់រមណីយដ្ឋានបេតិកភណ្ឌពិភពលោកអង្គរ”កាលពីព្រឹកថ្ងៃ ទី១២ ខែសីហាឯកឧត្តម សាយ សំអាល់ បានមានប្រសាសន៍ថា រាជរដ្ឋាភិបាលកម្ពុជា គ្រប់អាណត្តិ បានយកចិត្តទុកដាក់បំផុតនៅក្នុង ការគ្រប់គ្រង អភិរក្សមរតកវប្បធម៌របស់ដូនតា ដោយមានគោលការណ៍ច្បាស់លាស់ គឺដៃម្ខាងការពារមរតកដូនតា និងដៃម្ខាងកសាងសេដ្ឋកិច្ចជូនប្រជាពលរដ្ឋ។
ឯកឧត្តម សាយ សំអាល់ បានបន្តទៀតថា សង្គ្រាមផ្ទៃក្នុងបានធ្វើឱ្យខ្មែរបាក់បែក។ ចែកជាបក្ខជាពួកជាក្រុមផ្សេងគ្នា។ ប៉ុន្តែបន្ទាប់ពីដួលរលំរបស់របបខ្មែរក្រហម កម្ពុជាដែលមានប្រាសាទអង្គរជាចំណុចប្រសព្វគ្នាមួយបានដឹកនាំឱ្យខ្មែរ មានសន្តិភាព និងការអភិវឌ្ឍក្រោមនយោបាយឈ្នះៗរបស់សម្តេចតេជោ ហ៊ុន សែន ។
ឯកឧត្តមបន្តថា សារៈសំខាន់របស់អង្គរវត្តបានធ្វើឱ្យកម្ពុជាមានថ្ងៃនេះ។ ដូច្នេះមានកិច្ចការជាច្រើនដែលយើងត្រូវធ្វើសម្រាប់រមណីយដ្ឋានអង្គរជាបន្តទៀត។ ធ្វើយ៉ាងណាយើងត្រូវការពារមរតកដូនតា និងការពាររក្សានូវឧត្តមប្រយោជន៍របស់ប្រជា ជនយើងដែរ។
ឯកឧត្តម សាយ សំអាល់ បានគូសបញ្ជាក់ទៀតថា ឥឡូវមកដល់អាណត្តិនេះ ក្រសួងរៀបចំដែនដី នគរូបនីយកម្ម និងសំណង់ ត្រូវបានរាជរដ្ឋាភិបាលប្រគល់ភារកិច្ចឱ្យមកជួយសម្របសម្រួលដឹកនាំការងារនៅតំបន់អង្គរនេះ។” សម្តេចមហាបវរធិបតីបានឱ្យគោលការណ៍ខ្ញុំច្បាស់ ហើយបានដាក់បទបញ្ជាឲ្យខ្ញុំច្បាស់ថា ដៃម្ខាងត្រូវថែរក្សាមរតកដូនតារបស់យើង ហើយដៃម្ខាងទៀតក៏ត្រូវគិតគូរប្រយោជន៍របស់ប្រជាជនរបស់យើងនៅតំបន់អង្គរហ្នឹង និងក្នុងទឹកដីសៀមរាបជារួមតែម្តង”។
ឯកឧត្តមឧបនាយករដ្ឋមន្ត្រី បានបន្តថា ដូច្នេះដើម្បីតម្រង់ទិសនៅក្នុងកិច្ចការងារគ្រប់គ្រងតំបន់អង្គរនេះ យើងត្រូវរួមគ្នាលើកយកជាគំនិតផ្ទាល់ខ្លួនរបស់យើងមកជជែកគ្នាដើម្បីស្វែងរកធាតុចូលក្នុងការគ្រប់គ្រងតំបន់រមណីយដ្ឋានអង្គរនេះ នៅក្នុងចំណុចរួមតែមួយ។
សូមជម្រាបថា កិច្ចពិគ្រោះយោបល់ស្ដីពី”ការគ្រប់គ្រងតំបន់រមណីយដ្ឋានបេតិកភណ្ឌពិភពលោក អង្គរ”បានរៀបចំឡើងដោយ ក្រសួងរៀបចំដែនដី នគរូបនីយកម្ម និងសំណង់រយៈពេលពីរថ្ងៃចាប់ពីថ្ងៃទី១២ និងថ្ងៃទី១៣ ខែសីហានៅខេត្តសៀមរាប។ ពិធីនេះបានប្រព្រឹត្តិទៅក្រោមអធិបតីភាពឯកឧត្តម សាយ សំអាល់ ឧបនាយករដ្ឋមន្រ្តី និងជារដ្ឋមន្រ្តីក្រសួងរៀប ចំដែនដី នគរូបនីយកម្ម និងសំណង់និងអញ្ជើញចូលរួមលោកជំទាវបណ្ឌិតសភាចារ្យ ភឿង សកុណារដ្ឋមន្ត្រីក្រសួងវប្បធម៌និងវិចិត្រ សិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា ឯកឧត្តម ហង់ ពៅ អគ្គនាយកនិងថ្នាក់ដឹកនាំនៃអាជ្ញាធរជាតិ អប្សរាជាច្រើនរូបទៀត ។ពិសេសតំណាងអង្គការយូណេស្កូប្រចាំកម្ពុជា៕
ដោយ៖គ្រី សម្បត្តិ
