(ភ្នំពេញ៖)សត្វទោចថ្ពាល់លឿងនៅក្នុងក្រុមគ្រួសារសត្វទោចទី២ នៅតំបន់ជំរុំសត្វទោច ចាហ៊ូ ដែនជម្រកសត្វព្រៃកែវសីមា ខេត្តមណ្ឌលគិរី ទើបតែបង្កើតបានកូនតូចថ្មីមួយ ដែលធ្វើឱ្យគ្រួសាររបស់សត្វទោចមួយក្រុមនេះមានសមាជិកឡើងរហូតដល់ ៦ ក្បាលហើយនាពេលនេះ។

បើតាមទីភ្នាក់ងារជំនួយអាមេរិក USAID មរតកបៃតងបានឱ្យដឹងនៅថ្ងៃទី ១៦ ខែ សីហា ឆ្នាំ ២០២៤នេះថា តាមរយៈ អង្គការសេចក្ដីសង្ឃឹមពិភពលោកអន្តរជាតិប្រចាំកម្ពុជា ក្រុមស្រាវជ្រាវចាហ៊ូ បានតាមដាន និងសិក្សាពីអាកប្បកិរិយារបស់គ្រួសារសត្វទោចថ្ពាល់​លឿងមួយក្រុមនេះអស់រយៈពេល ៤ ជំនាន់មកហើយ ចាប់តាំងពីឆ្នាំ ២០១៣ មក ដែលធ្វើឱ្យក្រុមនេះក្លាយជាក្រុមគ្រួសារសត្វទោចដែលមានភាពសាំងច្រើនជាងគេ ក្នុងចំណោមក្រុមគ្រួសារសត្វទោចទាំងបួនដែលក្រុមអ្នកស្រាវជ្រាវ ចាហ៊ូ កំពុងតាមដាន។

USAID មរតកបៃតងបានឱ្យដឹងដែរថា នៅខេត្តមណ្ឌលគិរី ដែនជម្រកសត្វព្រៃកែវសីមា ជាតំបន់​ដែលមានចំនួនសត្វជិតផុតពូជប្រភេទនេះរស់នៅច្រើនជាងគេ។ ជាអកុសល ចំនួនសត្វទោចដ៏អស្ចារ្យទាំងនេះមានការថយចុះយ៉ាងឆាប់រហ័ស ដែលភាគច្រើន​ដោយសារតែការបាត់បង់ទីជម្រក និងការជួញដូរធ្វើជាសត្វចិញ្ចឹម។

ដើម្បីជួយការពារប្រភេទសត្វជិតផុតពូជនេះ USAID មរតកបៃតង ធ្វើការជាមួយ អង្គការសេចក្ដីសង្ឃឹមពិភពលោកអន្តរជាតិប្រចាំកម្ពុជា ដើម្បីជួយដល់ក្រុមស្រាវជ្រាវ តំបន់ជំរុំសត្វទោច ចាហ៊ូ ក្នុងការត្រួតពិនិត្យ និងសិក្សាពីអាកប្បកិរិយារបស់ក្រុម​គ្រួសារសត្វទោចថ្ពាល់លឿងចំនួន ៤ ក្រុម ក្នុងគោលបំណងផ្សាំង​ពួកវាទៅនឹងវត្តមាន​របស់ក្រុមអ្នកស្រាវជ្រាវរបស់ ចាហ៊ូ ដែលយើងហៅថា «អ្នកការពារសត្វទោច» និងការពារពួកវាពីការផុតពូជនៅក្នុងដែនជម្រកសត្វព្រៃកែវសីមា។

ក្រុមអ្នកស្រាវជ្រាវក៏សម្រេចបាននូវការពង្រីកការគ្រប់គ្រងជម្រករបស់សត្វទោចបាន ៤៤៥,៥ ហិកតា បន្ថែមទៀត នៅក្នុងឆមាសទីមួយនៃឆ្នាំនេះ ដែលធ្វើឱ្យការពង្រីកតំបន់​រស់នៅរបស់សត្វទោចបានរហូតដល់ ៦៩១,៣ ហិកតា រហូតមកដល់បច្ចុប្បន្ន។

គួរបញ្ជាក់ថា សត្វទោចថ្ពាល់លឿង ជាប្រភេទសត្វជិតផុតពូជនៅលើពិភពលោក ហើយ​រស់នៅ​ជាក្រុមគ្រួសារស្រដៀងនឹងមនុស្សយើងដែរ ដោយរួមរស់ស្ម័គ្រស្មោះជាមួយ​នឹង​គូជីវិត និងកូនចៅជាច្រើនជំនាន់។ សត្វទោចវ័យក្មេងត្រូវរៀនពីឥរិយាបថ​សត្វទោច​សំខាន់ៗ និងវិធីសាស្រ្ដរកចំណីដើម្បីចិញ្ចឹមជីវិតមុនពេលវាត្រូវបែក​ចេញពីគ្រួសារនៅ​អាយុប្រហែល ៨ ឆ្នាំ។ សត្វទោចញីអាចបង្កើតកូនបានមួយក្នុងរយៈពេលពី ២ ទៅ ៣ ឆ្នាំម្តង ដែលធ្វើឱ្យការបង្កើតកូនរបស់វានេះក្លាយជាព្រឹត្តិការណ៍ដ៏អស្ចារ្យ និងកម្រ​បាន​ឃើញ ៕

ដោយ៖ម៉ាដេប៉ូ