ជប៉ុន៖ ស្ថានឯកអគ្គរាជទូតកម្ពុជា ប្រចាំប្រទេសជប៉ុន បានរៀបចំ​ព្រឹត្តិការណ៍​ប្រកួត​កីឡាបាល់ទាត់មិត្តភាពនៅទីក្រុងតូក្យូ ដើម្បី “អបអរសាទរពិធីបើក​ការដ្ឋាន​ព្រែកជីក​ហ្វូណនតេជោ” ក្រោមអធិបតីភាព ឯកឧត្ដម ទុយ រី ឯកអគ្គរាជទូតកម្ពុជាប្រចាំជប៉ុន នាថ្ងៃអាទិត្យ ទី១៨ ខែសីហា ឆ្នាំ២០២៤ ដោយមានក្រុមកីឡាករបាល់ទាត់ខ្មែរចំនួន ៩ បានចូលរួមប្រកួត និងមានការចូលរួមទស្សនាដ៏ច្រើនកុះករពីសំណាក់សហគមន៍ខ្មែរ កម្មសិក្សាការី-ពលករជំនាញខ្មែរ ដែលកំពុងរស់នៅ ធ្វើការ និងសិក្សាក្នុងប្រទេសជប៉ុន សរុបជាង ២០០នាក់។ ក្រុមកីឡាករខ្មែរទាំង ៩ក្រុមនោះ មាន ទី១. ក្រុម Classic (ខេត្ត Saitama), ទី២. ក្រុមអ្នកចម្បាំង (ខេត្ត Ibaraki), ទី៣. ក្រុមអង្គរខេមរា (ខេត្ត Kanagawa), ទី៤. ក្រុម Kanuma (ខេត្ត Tochigi), ទី៥. ក្រុម Banana (ខេត្ត Gunma), ទី៦.ក្រុម Black Wolf (ខេត្ត Kanagawa), ទី៧. ក្រុមនាគស សៃតាម៉ាក់ (ខេត្ត Saitama), ទី៨. ក្រុម CJSS (តូក្យូ) និងទី៩. ក្រុម Khmer Ayase (ខេត្ត Kanagawa)។

ឯកឧត្ដមឯកអគ្គរាជទូត បានថ្លែងអំណរគុណដល់ក្រុមកីឡាករខ្មែរ និងអ្នកចូល​រួមទាំង​អស់ដែលបានចំណាយពេលវេលាមកចូលរួមក្នុងព្រឹត្តិការណ៍ ដើម្បី “អបអរសាទរពិធី​បើក​ការដ្ឋានព្រែកជីកហ្វូណនតេជោ” ។ ឯកឧត្តមឯកអគ្គរាជទូត ក៏បានសង្កត់ធ្ងន់អំពី​សារៈប្រយោជន៍នៃព្រែកជីកហ្វូណនតេជោ ដែលនឹងក្លាយជាមរតកដ៏មហាសាល​ជាប្រ​វត្តិ​សាស្ត្រ ក្រោយព្រែកជីកនេះ ត្រូវបានសាងសង់រួច ហើយពេលនោះវានឹងផ្តល់​ប្រ​យោជន៍​ដ៏សំខាន់ ដល់វិស័យជាច្រើន ជាពិសេស ការដឹកជញ្ជូន ការបង្កើត​តំបន់​ពាណិជ្ជ​កម្ម និងមជ្ឈមណ្ឌលភស្តុភារកម្ម អភិវឌ្ឍផែរណបថ្មីៗ ការអភិវឌ្ឍន៍កសិកម្ម ធារាសាស្ត្រ វារីវប្បកម្ម និងចិញ្ចឹមសត្វ ការអភិវឌ្ឍប៉ូលសេដ្ឋកិច្ចទី៤ របស់កម្ពុជា បង្កើតការងារ​បន្ថែម​នៅកំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ និងកំពង់ផែផ្សេងទៀត ការអភិវឌ្ឍទីក្រុងនិងនគរូបនីយកម្ម ជាដើម។

ជាងនេះទៀត ឯកឧត្ដមឯកអគ្គរាជទូត ក៏បានពន្យល់អំពីគោលបំណង និងសារៈសំខាន់ នៃកិច្ចសហប្រតិបត្តិការតំបន់អភិវឌ្ឍន៍ត្រីកោណកម្ពុជា-ឡាវ-វៀតណាម (CLV-DTA) ដែលជាគំនិតផ្តួចផ្តើមរបស់សម្តេចអគ្គមហាសេនាបតីតេជោ ហ៊ុន សែន អតីតនាយក​រដ្ឋមន្ត្រី និងជាប្រធានព្រឹទ្ធសភា។

ឯកឧត្តមឯកអគ្គរាជទូតក៏បានគូសបញ្ជាក់ថា គ្មានការកាត់ទឹកដី ៤ខេត្ត (ស្ទឹងត្រែង រតនគិរី មណ្ឌលគិរី និងក្រចេះ) របស់កម្ពុជាឱ្យបរទេសនោះទេ និងបានអំពាវនាវ​ដល់អ្នកចូលរួមការប្រកួតនេះ ជឿជាក់លើរាជរដ្ឋាភិបាលកម្ពុជា ដែលធានាមិន​ធ្វើឲ្យបាត់បង់អធិបតេយ្យភាព និងបាត់បងទឹកដីនោះឡើយ ហើយដែលត្រូវបានការ​ពារដោយការបោះបង្គោលព្រំដែនកម្ពុជា វៀតណាម ដែលបច្ចុប្បន្នបោះបាន 84%រួចមកហើយ។

ក្រោយការប្រកួតដ៏ស្វិតស្វាញរួចមក ជ័យលាភីលេខ១ បានទៅក្រុម Kanuma FC ជ័យលាភីលេខ២ គឺក្រុម នាគស សៃតាម៉ា និងជ័យលាភីលេខ៣ គឺក្រុម អង្គរខេមរា។

ក្រុមកីឡាករខ្មែរ និងអ្នកចូលរួមទាំងអស់បានសំដែងនូវការអរគុណយ៉ាងជ្រាលជ្រៅដល់ ឯកអគ្គរាជទូតកម្ពុជា ប្រចាំប្រទេសជប៉ុន ដែលបានរៀបចំព្រឹត្តិការណ៍ប្រកួតបាល់ទាត់​មិត្តភាពដ៏ពិសេសនេះ ដែលបានបង្ហាញពីការយកចិត្តទុកដាក់របស់ស្ថានឯកអគ្គរាជទូត​ក្នុងការបង្កលក្ខណៈឱ្យមានការជួបជុំ និងបន្តរឹតចំណងសាមគ្គីភាពឱ្យកាន់តែប្រសើរ​ថែមទៀត ក្នុងចំណោមបងប្អូនខ្មែរនៅក្នុងប្រទេសជប៉ុន និងបានស្នើស្ថានទូតពិនិត្យ​លទ្ធភាព​ក្នុងការរៀបចំព្រឹត្តិការណ៍ប្រកួតបាល់ទាត់មិត្តភាពនេះនៅពេលក្រោយទៀត ៕

ដោយ / គ្រី សម្បត្តិ