(ភ្នំពេញ)៖ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួង មហាផ្ទៃ និងជាប្រធានសហព័ន្ធកីឡាទូកកានូនិងរ៉ូអ៊ីងកម្ពុជា បានថ្លែងគូបញ្ជាក់ថា កម្ពុជាអាចនឹងក្លាយជាម្ចាស់ផ្ទះ ការប្រកួតកីឡាទូក World Championships នៅពេលខាងមុខ ប្រសិនបើប្រជែងទទួលបានលទ្ធផលល្អពីការប្រកួតវគ្គជម្រុះការ ប្រកួតពិភពលោកនៅក្នុងតំបន់អាស៊ាន។

ការលើកឡើងរបស់ ឯកឧត្តម ស សុខា នៅក្នុងកិច្ចប្រជុំឆ្លងរបាយការណ៍ស្តីអំពីវ ឌ្ឍនការងារប្រចាំឆមាសទី១ និងលើកទិសដៅបន្តសម្រាប់ឆមាសទី២ ឆ្នាំ២០២៤ របស់សហព័ន្ធកីឡាទូកកានូ និងរ៉ូអ៊ីងកម្ពុជា នាព្រឹកថ្ងៃទី២២ ខែ សីហា នៅទីស្តីការ ក្រសួងមហាផ្ទៃ។

ឯកឧត្តម អភិសន្តិបណ្ឌិត ស សុខា បានថ្លែងទៀតថា សម្រាប់ការប្រកួតនៅអន្តរជាតិ ពិសេស គឺការប្រកួតវគ្គជម្រុះកម្រិតពិភពលោក នៅតាមបណ្តាលប្រទេសអាស៊ាន ប្រសិនបើអត្តពលិកទូកកម្ពុជាយើងមានលទ្ធភាពប្រជែងបានចំណាត់ចាប់ពីចំណាត់ថ្នាក់លេខ៣ទៅដល់លេខ១ នាំយកមកជូនជាតិ. កម្ពុជាក៏មានគម្រោង នឹងស្នើសុំធ្វើជា​ម្ចាស់ផ្ទះ World Championships ដូចបណ្តាប្រទេសទាំងអស់នោះដែរ។ដូច្នោះហើយ កម្ពុជាក៏ត្រូវការនូវធានធានចៅក្រមអាជ្ញាកណ្តាលនិងមន្រ្តីបច្ចេកទេស​ដែលមានជំនាញស្តង់ដារ ដើម្បីទទួលរៀបចំព្រឹត្តិការណ៍ប្រកួតនេះផងដែរ។

ទន្ទឹមជាមួយគ្នានោះ ឯកឧត្តម ប្រធានសហព័ន្ធ ក៏ជំរុញឱ្យគណៈកម្មាធិការប្រតិបត្តិ​សហ​ព័ន្ធ​យកចិត្តទុកដាក់ខ្ពស់លើផែនការបណ្តុះបណ្តាលកីឡាករកីឡាការិនី ដោយអនុវត្ត​ទៅ​តាមបែបវិទ្យាសាស្រ្តកីឡា​ ក្នុងការជំរុញសមត្ថភាពកីឡាករកីឡាការិនីឈានទៅ​រកសក្កានុពលប្រជែងដណ្តើមមេដាយពីការប្រកួតកម្រិតអន្តរជាតិ។ ជាមួយគ្នានោះ ឯកឧត្តម អភិសន្តិបណ្ឌិត ក៏បានលើកទឹកចិត្ត ឱ្យបណ្តាខេត្តដែលមានទន្លេ ត្រូវយកចិត្ត​ទុក​ដាក់បង្កើតក្រុមកីឡាទូកឱ្យមានគ្រប់វិញ្ញាសា និងហ្វឹកហាត់ឱ្យមានសក្កានុពល ចូល​រួម​ការប្រកួតគ្រប់ព្រឹត្តិការណ៍ដែលរៀបចំដោយសហព័ន្ធ ដើម្បីជាជម្រើសដ៏ល្អសម្រាប់​ការចំរាញ់ជ្រើសរើសបានកីឡាករកីឡាការិនីមានសក្កានុពលចូលរួមនៅក្នុងក្រុមជម្រើសជាតិ ។

ឯកឧត្តម អភិ បានជំរុញឱ្យតាមបណ្តាខេត្តទាំងអស់ត្រៀមកីឡាករ​កីឡាការិនីត្រៀម​ចូលរួមនៅក្នុងព្រឹត្តិការណ៍កីឡាជាតិលើកទី៤ នាអំឡុងខែ វិច្ឆិកា ឆ្នាំ២០២៤ ។

ឯកឧត្តម បានស្នើដល់អភិបាលខេត្តស្វាយរៀង ជួយពន្លឿន ការរៀបចំទីតាំងដីសម្រាប់​​​​​​​​​​មជ្ឈមណ្ឌលកីឡាលើកទឹក ដើម្បីសហព័ន្ធបានសាងសងអាគារជូន​កីឡាករកីឡាការិនី​គ្រូបង្វឹកសម្រាប់ស្នាក់នៅនិងហ្វឹកហាត់។ នាឱ្យកាសនោះដែរ

ឯកឧត្តម អភិ បានស្នើដល់គណៈកម្មាធិការប្រតិបត្តិ ត្រូវរួបរួមគ្នានៅក្នុងការអភិវឌ្ឍ ដើម្បីជំរុញឱ្យកីឡាមួយនេះ មានសក្កានុពលដណ្តើមបានមេដាយពីការប្រកួតអន្តរជាតិ ព្រោះការចូលរួមរបស់កម្ពុជាមិនជាការចូលរួមកំដរឆាកឡើយ។ ពិសេស ត្រូវគិតលើ​ការជ្រើសរើសយុវជនថ្នាល់នៅក្នុងការបំពាក់បំប៉នត្រៀមកីឡាយុវជនអាស៊ីឆ្នាំ២០២៩ ដែលកម្ពុជាទទួលធ្វើជាម្ចាស់ផ្ទះ។ក្នុងនាមជាប្រធានសហព័ន្ធកីឡាទូកកានូ និងរ៉ូអ៊ីង​កម្ពុជា ឯកឧត្តម បានថ្លែងអំណរគុណដល់សមាជិកសមាជិកា និងគ្រប់ភាគីពាក់ព័ន្ធ​ទាំងអស់ ដែលបានចូលរួមគាំទ្រនិងរួបរួមគ្នា ធ្វើឱ្យផែនការឆមាស​ទី១ សម្រេចបានលទ្ធផលល្អ ៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ