(ភ្នំពេញ)៖ ការប្រកួតកីឡាបេស្បលលិគលើកទី១ នៅកម្ពុជា ដែលរៀបចំដោយ សហ​ព័ន្ធ​កីឡាបេស្បល និងសុហ្វបលកម្ពុជា បានដំណើរការប្រកួតផ្លូវការ នៅពហុកីឡដ្ឋាន​ជាតិអូឡាំពិក ។

លោក ឆែម ដារា ប្រធានសហព័ន្ធកីឡាបេស្បសល-សហ្វបលកម្ពុជាលើកឡើងថា ការ​ចាប់​ផ្តើមប្រភេទកីឡាថ្មី បេស្បបលហ្វាយ ដែលមានលាយបញ្ចូល​សមាសភាព​ទាំង​កីឡាករ​កីឡាការិនីនេះ ចូលរួមប្រកួតក្នុងក្រុមនីមួយៗនេះ គឺមានការលំបាក ប៉ុន្តែការ​លំបាកនេះមិនមែនជាឧបសគ្គធំសម្រាប់ដំណើរការអភិវឌ្ឍកីឡាជំនាញមួយនេះ។

ជាមួយគ្នានេះ លោក ឆែម ដារា ក៏បានបង្ហាញការដឹងគុណចំពោះក្រសួងអប់រំ យុវជន និង​កីឡា ដែលតែងតែផ្តល់ការគាំទ្រយ៉ាងធំធេងទាំងស្មារតី កញ្ចប់ថវិកាដល់ប្រភេទ​កីឡានេះ​ឱ្យមានសកម្មភាពផុសផុលឡើងជាលំដាប់។ លោកក៏បានថ្លែងអំណរគុណ​យ៉ាង​ជ្រាលជ្រៅដល់ក្រុមហ៊ុនឧបត្ថម្ភ ដែលជាដៃគូអភិវឌ្ឍនានា ដែលជួយជ្រោមជ្រែង​ដល់ការរៀបចំលីគជាលើកដំបូងនេះ។

ដោយឡែក ឯកឧត្តម វ៉ាត់ ចំរើន រដ្ឋលេខាធិការ តំណាងដ៏ខ្ពង់ខ្ពស់ឯកឧត្តមបណ្ឌិត​សភាចា្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និង​កីឡាបាន​ថ្លែងការកោតសរសើរ និងវាយតម្លៃខ្ពស់ចំពោះមតិយោបល់របស់មន្ត្រីជាន់ខ្ពស់​សហព័ន្ធ​កីឡាបេស្បល សហ្វបលអាស៊ី និងបណ្តាដៃគូឧបត្ថម្ភទាំងអស់ ក្នុងការចូលរួមលើក​កម្ពស់​ដល់ការអភិវឌ្ឍវិស័យកីឡាបេស្បបល-សហ្វបលកម្ពុជាឱ្យមានការរីក​ចម្រើន​តទៅមុខ។

ជាមួយគ្នានេះ ​ឯកឧត្តម វ៉ាត់ ចំរើន ក៏បានជំរុញលើកទឹកចិត្តដល់កីឡាករ កីឡាការិនីចូល​រួម​ទាំងអស់ត្រូវបន្តការខិតខំប្រកួត និងហ្វឹកហាត់ឱ្យបានល្អប្រសើរ ដើម្បីដុះខាត់​សមត្ថភាព​ក្នុងជំនាញកីឡាឱ្យមានសក្តានុពល។ បន្ថែមពីលើនេះ ឯកឧត្តមរដ្ឋលេ​ខាធិការសង្កត់ធ្ងន់ថា ទ្រព្យសម្បត្តិធំជាងគេ គឺសុខភាព ហើយសុខភាព ដែលទទួលបាន​ពីការ​លេងកីឡា គឺជាសុខភាពដែលបរិសុទ្ធ មានមូលដ្ឋានគ្រឹះរឹងមាំល្អ ដែលជាការទ្រទ្រង់គុណភាពជីវិតម្នាក់ៗឱ្យកាន់តែល្អប្រសើរ។

ឯកឧត្តមលើកទឹកចិត្តដល់កីឡាករ កីឡាការិនីចាត់ទុកថា ការចូលរួមលេងវិញ្ញាសា​បេស្បលហ្វាយនេះ គឺជាសកម្មភាពមួយក្នុងជីវិតរបស់ខ្លួនជាមុនសិន ហើយត្រូវបន្ត​ការស្រឡាញ់ និងអនុវត្តវាឱ្យជាប់ជាប្រចាំ ដើម្បីអភិវឌ្ឍជំនាញកីឡាមួយនេះឱ្យកាន់​តែល្អប្រសើរ។ សូមបញ្ជាក់ថា ការប្រកួតបេស្បលហ្វាយលិគលើកទី១នៅកម្ពុជា ដំណើរ​ការប្រកួតរយៈពេល៣ថ្ងៃចាប់ពីថ្ងៃទី២២ ដល់ថ្ងៃទី២៤ ខែ សីហា ឆ្នាំ២០២៤ នៅវិមាន​កីឡានៃពហុកីឡដ្ឋានជាតិ ៕

រូបភាព ៖ ងីម ឆៃហួត
អត្ថបទ ៖ ជាវ ចន្ធូ