កំពង់ឆ្នាំង៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង មាន​ប្រសាសន៍ថា កីឡានាំមកនូវសុខភាព ចំណងសាមគ្គីភាព និងកាយ​សម្បទាមាំមួន ។ឯកឧត្តមថ្លែងបែបនេះក្នុងពិធីបើកការប្រកួតមិត្តភាព ទេសចរណ៍ រវាងក្រុមកីឡាបាល់​ទាត់វ័យចាស់​ខេត្តកំពង់ឆ្នាំងនិងកីឡា​បាល់ទាត់តារាកម្ពុជា ដឹកនាំដោយលោក ខេម​មកពីរាជធានី​ភ្នំពេញ នៅទីលានបាល់ទាត់មុខ​សាលាខេត្ត​កំពង់ឆ្នាំង កាលពី​រសៀលថ្ងៃទី២៨ ខែសីហាឆ្នាំ២០២៤ ។

ពិធីខាងលើបានប្រព្រឹត្តទៅក្រោមធិបតីភាពឯកឧត្តម ស៊ីវ រុន ប្រធាន​ក្រុមប្រឹក្សាខេត្ត ឯកឧត្តម ស៊ុន សុវណ្ណារិទ្ធិ អភិបាលខេត្ត​កំពង់ឆ្នាំង និងលោកជំទាវ ព្រមទាំងមានការចូលរួមទស្សនា​ពីមន្ត្រីរាជការជុំវិញ​ខេត្ត និងប្រជាពលរដ្ឋជា​អ្នកគាំទ្រយ៉ាង​ច្រើនកុះករ។

ឯកឧត្តមអភិបាលខេត្តកំពង់ឆ្នាំងបន្តថាការប្រកួតគ្នានៅរសៀលនេះគឺដើម្បីរឹតចំណងសាមគ្គីភាពរវាងក្រុមកីឡាករបាល់ទាត់វ័យចាស់ខេត្តកំពង់ឆ្នាំង និងក្រុមកីឡាបាល់ទាត់តារាកម្ពុជា ដឹកនាំដោយ លោកខេម ជាតារាចម្រៀងដ៏ល្បីមកពីរាជធានភ្នំពេញ ។
ឆ្លៀត​នៅក្នុងឱកាសនោះ ឯកឧត្តម សូមកោតសរសើរ ដល់ប្រជាពល​រដ្ឋខេត្តកំពង់ឆ្នាំងជាង ៣០០នាក់ ដែលបាន​ធ្វើ​ដំណើរទស្សនកិច្ច​តាមបណ្ដាខេត្តភូមិភាគឦសាន កាលពីពេលថ្មីៗនេះ។ ដោយឡែក​ចូលរួមជាមួយ រាជរដ្ឋាភិបាល ស្ដីពីមូលនិធិ​អភិវឌ្ឍន៍ហេដ្ឋារចនា​សម្ព័ន្ធតាមបន្ទាត់ព្រំដែន ក្នុងនាមឯកឧត្តម អភិបាលខេត្ត សូមចូលរួមមូលនិធិនេះចំនួន ៨០លានរៀល។

សូមបញ្ជាក់ថាការប្រកួតមិត្តភាពទេសចរណ៍ រវាងក្រុមកីឡាបាល់​ទាត់វ័យ​ចាស់ខេត្តកំពង់ឆ្នាំងជាមួយក្រុមតារាកម្ពុជា ដឹកនាំ​ដោយ​លោកខេម មកពីរាជធានីភ្នំពេញជាលទ្ធផល ៣ ស្មើ ។អ្វីដែលជា​ការចាប់អារម្មណ៍ការ​ប្រកួតបានស្ថិត ក្រោមតំណក់ភ្លៀង ។  ក្រុមកី​ឡាបាល់ទាត់វ័យចាស់ ខេត្តកំពង់ឆ្នាំង គេឃើញ ឯកឧត្តម ស៊ុន សុវណ្ណារិទ្ឋិ អភិបាលខេត្ត​កំពង់ឆ្នាំង ជាកីឡាករ ពាក់អាវលេខ៨៩និង អភិបាលក្រុង ស្រុក ជាច្រើនរូបទៀត ដែលសុទ្ធតែជាកីឡាករមិន​សូវបានហ្វឹកហាត់។ ចំណែក​ក្រុមកីឡា តារាកម្ពុជា គេឃើញ លោក ខេម ពាក់អាវលេខ១០ និង លោក ប៊ីអាជី ពាក់អាវលេខ៩៩៩ ។នៅ​ពេលដែល​កីឡាករទាំងនោះទាត់បាល់ ឬ ពេលខ្លះរអិលដួលម្តងៗដែល ធ្វើឱ្យអ្នកទស្សនាសើចហ៊ោលើកទឹកចិត្តយ៉ាងកងរំពង៕
ដោយ៖សុខ គឹមសៀន