ភ្នំពេញ៖ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) បានស្វាគមន៍​បណ្ណសាររក្សមកពីប្រទេសកម្ពុជា និងវៀតណាម សម្រាប់ “កម្មវិធីគ្រប់គ្រងកំណត់ត្រា និងបណ្ណសារឆ្នាំ២០២៤”។

នេះគឺជាកម្មវិធីបណ្ដុះបណ្ដាល ដោយមានកម្មវិធីឧទ្ទេសនាមចំនួន២សំខាន់ៗគឺ “គោលនយោបាយអភិរក្សឌីជីថលរយៈពេលវែង និងការគ្រប់គ្រងព័ត៌មានបច្ចេកវិទ្យា” និង “ការចងចាំរបស់អង្គការយូណេស្កូនៃគម្រោងអភិរក្សពិភពលោក និងករណីសិក្សា” អមដោយដំណើរទស្សនកិច្ចសិក្សាស្វែងយល់អំពី មជ្ឈមណ្ឌលធនធានរបស់ អ.វ.ត.ក.ផងដែរ។

កម្មវិធីបណ្ដុះបណ្ដាលនេះ ត្រូវបានអ.វ.ត.ក.ចាត់ទុកថាជាឱកាសដ៏ប្រពៃមួយសម្រាប់ បណ្ណសាររក្ស មកពីស្ថាប័នទាំងអស់​ ដើម្បីទទួលបាននូវការយល់ដឹងអំពីបច្ចេកទេស​អភិរក្សឌីជីថលកម្រិតខ្ពស់ និងវិធីសាស្ត្ររៀបចំបណ្ណសារបែបទំនើបកម្មដោយ​បណ្ណសារជាតិ​នៃប្រទេសកូរ៉េ។

សិក្ខាកាមចូលរួមក្នុងវគ្គបណ្ដុះបណ្ដាលនេះគេឃើញមានការចូលរួមពីសំណាក់ បណ្ណសាររក្ស អ.វ.ត.ក. មជ្ឈមណ្ឌលតម្កល់ឯកសារច្បាប់ពាក់ព័ន្ធនឹង អ.វ.ត.ក. (LDC) បណ្ណសារជាតិកម្ពុជា សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងនាយកដ្ឋានកំណត់ត្រា និងបណ្ណសារនៃប្រទេសវៀតណាម (SRADV)។

ឯកឧត្តម ក្រាញ់ តូនី ប្រធានរដ្ឋបាលស្ដីទីនៃ អ.វ.ត.ក. បានលើកឡើងថា “កម្ពុជា យើង​មាន​ច្បាប់​គ្រប់គ្រងបណ្ណសារ ដែលបានអនុម័តនៅឆ្នាំ២០០៥ ហើយអនុក្រឹត្យស្តីពី​ការរៀបចំ និងការប្រព្រឹត្តទៅនៃក្រុមប្រឹក្សាបណ្ណសារត្រូវបានចេញនៅឆ្នាំ២០១៩ ដើម្បីបង្កើតគោលការណ៍ និងនីតិវិធីសម្រាប់គ្រប់គ្រង និងថែរក្សាបណ្ណសារសាធារណៈ​ប្រកបដោយប្រសិទ្ធភាព។ យ៉ាងណាក៏ដោយ យើងដឹងថាច្បាប់នេះគួរពិចារណអំពី​ការធ្វើវិសោធនកម្ម និងធ្វើទំនើបកម្មស្របតាមការធ្វើឌីជីថលក្នុងពេលបច្ចុប្បន្ន»។

ឯកឧត្តមបានបញ្ជាក់បន្ថែមថា៖ «សសរស្តម្ភនៃកំណែទម្រង់គឺធនធាន​មនុស្សលើសពី​អ្វីទាំងអស់។ យើងត្រូវការអ្នកជំនាញដែលមានទស្សនៈវិស័យខ្ពស់។ ដូច្នេះហើយ ខ្ញុំជឿជាក់ថា កម្មវិធីនេះ នឹងរួមចំណែកយ៉ាងសំខាន់ដល់ការអភិវឌ្ឍបុគ្គល​ដែល​មាន​ជំនាញ និងសមត្ថភាពក្នុងវិស័យដ៏សំខាន់នេះ។»

គួរបញ្ជាក់ថា កម្មវិធីបណ្តុះបណ្តាលនៅថ្ងៃនេះគឺជាផ្នែកមួយនៃកម្មវិធីបណ្ដុះបណ្ដាល​អំពី”ការគ្រប់គ្រងកំណត់ត្រា និងបណ្ណសារឆ្នាំ២០២៤” ដែលបានចាប់ផ្តើមពីថ្ងៃទី២៦ ដល់ថ្ងៃទី៣០ ខែសីហា នៅក្នុងរាជធានីភ្នំពេញ។ កម្មវីធីនេះបានបង្ហាញពីសារៈ​សំខាន់នៃការធ្វើឌីជីថលឯកសារនៅក្នុងការអនុវត្តបណ្ណសារទំនើប ដែលនឹងបន្ដឆ្ពោះ​ទៅគ្រប់គ្រងបណ្ណសារក្នុងពេលអនាគត់ក្នុងតំបន់កំណត់ចំណាំចំពោះបណ្ណាធិការព័ត៌មានសមិទ្ធផលរបស់ អ.វ.ត.ក. ពីខែមករា ឆ្នាំ២០២៣ ដល់ខែមិថុនា ឆ្នាំ២០២៤ផ្អែកតាម​ស្មារតី«កិច្ចព្រមព្រៀងបន្ថែមស្តីពីការរៀបចំក្នុងពេលអន្តរកាល និងការបញ្ចប់​ការងារ​របស់អង្គជំនុំជម្រះវិសាមញ្ញ» នៅឆ្នាំ២០២១ រវាងរាជរដ្ឋាភិបាលកម្ពុជា និងអង្គការសហ​ប្រជាជាតិ អ.វ.ត.ក. ត្រូវបានផ្តល់អាណត្តិឱ្យអនុវត្តមុខងារសេសសល់ដែលរួមមាន​មុខ​ងារគតិយុត្តិ និងមិនមែនមុខងារគតិយុត្តិ សម្រាប់រយៈពេល៣ឆ្នាំដំបូងពីឆ្នាំ២០២៣ ដល់២០២៥៕

ដោយ ៖ ម៉ាដេប៉ូ