រតនគិរី៖ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការបានរំលឹក​ដល់​មន្រ្តីនៃមន្ទីរផែនការខេត្តរតនគិរីឱ្យបន្តពង្រឹងរចនាសម្ព័ន្ធ ដឹកនាំ ការ​លើក​កម្ពស់សមភាពយេនឌ័រ និងប្រសិទ្ធភាពការងារ ឱ្យបានល្អជាង​នេះថែមទៀត បើទោះបីថ្នាក់ដឹកនាំនិងមន្ត្រី ទាំងអស់បានបំពេញ​ភារកិច្ចយ៉ាងសកម្ម និងសម្រេចបានលទ្ធផលសំខាន់ៗជាច្រើន ក្នុង​ពេលកន្លងមកយ៉ាងណាក៏ដោយ។

ឯកឧត្តម ប៊ិន ត្រឈៃ បានណែនាំបន្ថែមយ៉ាងដូច្នេះក្នុងឱកាស​អញ្ជើញជួបសំណេះសំណាលជាមួយថ្នាក់ដឹកនាំ និងមន្ត្រីរាជការ​នៃមន្ទីរផែនការខេត្តរតនគិរីកាលពីរសៀលថ្ងៃទី១១ ខែកញ្ញា ឆ្នាំ២០២៤ ។

ប្រធានស្តីទីមន្ទីរផែនការខេត្តរតនគិរី លោក ខេង សារ៉ាត់ បាន​ជម្រាប​​ឯកឧត្តមរដ្ឋមន្រ្តីថា មន្ទីរបានបំពេញមុខងារជា សេនាធិការ ជូនក្រសួងផែនការ លើបេសកម្មទទួលបន្ទុកអនុវត្ត សកម្មភាព​ការងាររបស់ខ្លួន ក្នុងការដឹកនាំនិងសម្របសម្រួល លើវិស័យផែនការ ការងារស្ថិតិ តាមដានត្រួតពិនិត្យ វាយតម្លៃប្រជាជន និងអភិវឌ្ឍន៍ និងកិច្ចការចាំបាច់មួយចំនួនទៀត ។

ក្នុងឱកាសនេះឯកឧត្តមរដ្ឋមន្ត្រីក្រសួងផែនការបានកោតសរសើរ និងវាយតម្លៃខ្ពស់ ចំពោះមន្ទីរផែនការខេត្តដែលបានបំពេញភារកិច្ច យ៉ាងសកម្ម និងសម្រេចបានលទ្ធផលសំខាន់ៗជាច្រើន ជាពិសេស​ការពង្រឹងរចនាសម្ព័ន្ធដឹកនាំ លើកកម្ពស់សមភាពយេនឌ័រ និងប្រសិទ្ធ​ភាពការងារ ជាមួយនឹងយន្តការវាយតម្លៃមន្ត្រីរាជការ រាប់ចាប់ពីមន្ត្រី រហូតដល់ប្រធានមន្ទីរ។

ឯកឧត្តមបន្តថា ផ្សារភ្ជាប់នឹងការងារកំណែទម្រង់ ក៏ដូចយន្តការត្រួត​ពិនិត្យវាយតម្លៃមន្ត្រីរាជការក្រសួងបាន និងកំពុងអនុវត្ត លើការងារ​សំខាន់់ៗមួយចំនួនក្នុងនោះ ការរៀបចំកម្មវិធីវិនិយោគសាធារណៈ​៣ឆ្នាំរំកិល,ការរៀបចំផែនការយុទ្ធសាស្ត្រ អភិវឌ្ឍន៍ជាតិ ,ការតាមដាន​ការអនុវត្តកម្មវិធីសកម្មភាព នៃសន្និសីទអន្តរជាតិ ស្ដីពីប្រជាជន​និង​អភិវឌ្ឍន៍,ការចាកចេញ របស់កម្ពុជា ពីចំណាត់ក្រុមប្រទេស​អភិវឌ្ឍន៍​តិចតួច និងយុទ្ធសាស្ត្រអន្តរកាលដោយរលូន និងការអនុវត្ត​គោលដៅ​អភិវឌ្ឍន៍ ប្រកបដោយចីរភាពរបស់កម្ពុជា៕

ដោយ៖ឡុង សំបូរ