(ភ្នំពេញ)៖ ក្រុមហ៊ុន សោម៉ា គ្រុប បានសហការជាមួយ Global Institute For Tomorrow រៀបចំកម្មវិធីអ្នកដឹកនាំសកលឆ្នាំ២០២៤ រយៈពេល២សប្ដាហ៍ ដោយសប្ដាហ៍ទី១ធ្វើឡើងនៅទីក្រុងហុងកុងប្រទេសចិន និងសប្ដាហ៍ទី២​ធ្វើឡើងនៅប្រទេសកម្ពុជា ដោយផ្ដោតលើប្រធានបទ«ការលើកកម្ពស់ផលិតភាព​កសិកម្មតាមរយៈបច្ចេកវិទ្យាទំនើប និងឌីជីថលនីយកម្មកសិកម្មនៅកម្ពុជា» ដោយលើកយកដំណាំដំឡូងមីជាករណីសិក្សា ក្នុងគោលបំណងដើម្បីជួយ​ដល់កសិករក្នុងការបង្កើនទិន្នផល មានទីផ្សារល្អប្រកបដោយនិរន្តរភាព ។

ថ្លែងក្នុងពិធីបិទវគ្គបណ្តុះបណ្តាល នារសៀលថ្ងៃទី១៣ ខែកញ្ញា ឆ្នាំ២០២៤ លោកជំទាវ ចម ក្រស្នា អគ្គនាយិកា ក្រុមហ៊ុន សោម៉ា គ្រុប មានប្រសាសន៍ថា ៖ វគ្គបណ្តុះបណ្តាល​ភាពជាអ្នកដឹកនាំនេះ ធ្វើឡើងក្នុងគោលបំណង អភិវឌ្ឍន៍សមត្ថភាពទាំង​ក្នុងវិស័យ​សាធារណៈ និងឯកជន ដើម្បីជំរុញផលិតភាព និងលើកកម្ពស់ជីវភាពរបស់ប្រជាកសិករ ផ្តោតទៅលើកសិកម្មបែបទំនើប និងឧស្សាហកម្មតាមបែបសកល ក្នុងការបង្កើនទិន្នផល និងមានទីផ្សារល្អប្រកបដោយនិរន្តរភាព ពិសេសផលិតផលដំឡូងមីដែលជាផ្នែក​មួយនៃសេដ្ឋកិច្ចរបស់កម្ពុជា ។ លោកជំទាវ ចម ក្រស្នា អគ្គនាយិកា មានប្រសាសន៍​បន្ថែមថា ការជុំវិញការអភិវឌ្ឍន៍កសិដ្ឋានទំនើប មាន​ប្រព័ន្ធគ្រប់គ្រងត្រឹមត្រូវ នឹងជួយ​ដល់ការបង្កើនសក្ដានុពល លើវិស័យកសិកម្ម​នៅកម្ពុជា ដែលជួយដល់​លទ្ធភាពក្នុងការផ្គត់ផ្គង់ទីផ្សារក្នុងស្រុក និងការនាំចេញផងដែរ ។

ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ មានប្រសាសន៍ថា វិស័យកសិកម្មនៅក្នុងប្រទេសកម្ពុជា ពិតជាត្រូវការ​យ៉ាងខ្លាំង​លើកិច្ចសហការពីអន្តរជាតិ ទាំងក្នុងការជួយបង្កើនចំណេះដឹង នៃការធ្វើកសិកម្ម​បែបទំនើបកម្ម ជាពិសេសការរកទីផ្សារ ការបង្កើនផលិតភាព និងលើកកម្ពស់ជីវភាពប្រជាកសិករនៅកម្ពុជា ។

ឯកឧត្តមរដ្ឋលេខាធិការ បានបង្ហាញនូវការគាំទ្រ ចំពោះគម្រោងរបស់ GIFT ដែលចង់ជួយដល់កសិកររបស់កម្ពុជា និងមានជំនឿថា កសិករកម្ពុជានឹង​ទទួលបានគំនិតបន្ថែមទៀត លើការដាំដុះដំណាំកសិកម្មផ្សេងៗ ប្រកបដោយបច្ចេកវិទ្យាទំនើប និងឌីជីថលនីយកម្ម ស្របតាមគោលនយបាយរបស់រាជរដ្ឋាភិបាលកម្ពុជា ។

សូមបញ្ជាក់ថា ៖ សិក្ខាកាមក្នុងវគ្គសិក្សានៃកម្មវិធីអ្នកដឹកនាំសកលបានធ្វើការចុះ​ជួប​កសិករ​តាមចំការ អ្នកប្រមូលទិញ អាជ្ញាធរមូលដ្ឋាន និងក្រុមហ៊ុនកសិឧស្សាហ៍កម្ម​នៅខេត្តកំពង់ធំ និងព្រះវិហារ បន្ថែមលើសពីនេះសិក្ខាកាមក៏បានជួបភាគីពាក់ព័ន្ធ​មួយចំនួន​ទៀតដូចជា សាកលវិទ្យាល័យភូមិន្ទកសិកម្ម CDRI សហព័ន្ធដំឡូងមីកម្ពុជា និងមន្រ្តីអគ្គនាយកដ្ឋានកសិកម្មដើម្បីស្វែងរកព័ត៌មាន ការគាំទ្រ និងចូលរួមផ្ដល់ជា​ធាតុចូលសំខាន់ៗសម្រាប់ចងក្រងជារបាយការណ៍ និងម៉ូដែលអាជីវកម្ម (Business Model) សម្រាប់ការអនុវត្តសាកល្បង និងមានអ្នកជំនាញមកពីប្រទេសអាល្លឺម៉ង់ ឥណ្ឌា ប្រេស៊ីល ម៉ិកស៊ិក សិង្ហបុរី ជប៉ុន ហ្វីលីពីន ម៉ាឡេស៊ី បង្ហាញទស្សនៈចម្រុះ និងគំនិតថ្មីៗមកពិភាក្សា។

Global Institute For Tomorrow (GIFT) គឺជាគ្រឹះស្ថានឯករាជ្យមួយផ្ដោតលើការ បណ្ដុះផ្នត់គំនិតភាពជាអ្នកដឹកនាំ ការគ្រប់គ្រងនិងអភិវឌ្ឍន៍ស្ថាប័ន ការប្រឹក្សាគោលនយោបាយ និងស្វែងយល់ពីបម្រែបម្រួលនិងកំណើននៅអាស៊ី គ្រឺះស្ថាននេះមានមូលដ្ឋាននៅប្រទេសម៉ាឡេស៊ី និងទីក្រុងហុងកុងប្រទេសចិន ៕

ដោយ / គ្រី សម្បត្តិ