ខេត្តក្រចេះ៖ អភិបាលស្រុកចិត្របុរី ខេត្តក្រចេះ លោក យ៉ិន វណ្ណៈ បានដឹកនាំក្រុមការ​ងារ​ថ្នាក់ស្រុក និងមន្ត្រីថ្នាក់មូលដ្ឋាន នាំយកលិខិតរំលែកមរណទុក្ខ និងបច្ច័យមួយចំនួន​របស់ រដ្ឋមន្ត្រីក្រសួងព័ត៌មាន ឯកឧត្តម នេត្រ ភក្ត្រា ប្រធានក្រុមការងាររាជរដ្ឋាភិបាល និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានខេត្តក្រចេះ រួមទាំង​គ្រឿងឧបភោគ បរិភោគរបស់ អនុសាខាកាកបាទក្រហមកម្ពុជា ស្រុកចិត្របុរី ទៅផ្តល់​ជូនក្រុម​គ្រួសារសពទាំង ៣រូប ដែលបានជួបឧបទ្ទវហេតុភ្លៀងខ្យល់ខ្លាំង បណ្តាលឱ្យ​លិចទូកដឹកដំឡូងមី នៅកណ្តាលបឹងរាំង កាលពីរសៀលថ្ងៃទី២០កញ្ញា២០២៤ កន្លងទៅ។

អភិបាលស្រុកចិត្របុរី លោក យ៉ិន វណ្ណៈ បានពាំនាំប្រសាសន៍ ផ្តាំផ្ញើចូលរួមរំលែកមរណ​ទុក្ខ​ដ៏ក្រៀមក្រមនេះ ជាមួយក្រុមគ្រួសារសពទាំង ៣រូប ដែលលិចទូកដឹកដំឡូងមី ពីសំ​ណាក់​ថ្នាក់ដឹកនាំគ្រប់លំដាប់ថ្នាក់ ថ្នាក់ជាតិ ថ្នាក់ខេត្ត និងថ្នាក់មូលដ្ឋានភូមិ ឃុំ ស្រុក ក្នុងមនោសញ្ចេតនាសម្តែងការសោកស្តាយជាពន់ពេក ។

ស្របពេលជាមួយគ្នានោះ លោក យ៉ិន វណ្ណៈ ក៏បានប្រគល់សារចូលរួមរំលែកមរណទុក្ខ និងបច្ច័យរបស់ រដ្ឋមន្ត្រីក្រសួងព័ត៌មាន ឯកឧត្តម នេត្រ ភក្ត្រា ប្រធានក្រុមការងាររាជរដ្ឋា​ភិ​បាល និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានខេត្តក្រចេះ រួម​ទាំងគ្រឿងឧបភោគ បរិភោគរបស់ អនុសាខាកាកបាទក្រហមកម្ពុជាស្រុកចិត្របុរី ជូន​ដល់​ក្រុមគ្រួសារសពទាំង ៣រូប នៅថ្ងៃទី២២កញ្ញា២០២៤។

រដ្ឋមន្ត្រីក្រសួងព័ត៌មាន ឯកឧត្តម នេត្រ ភក្ត្រា បានមានប្រសាសន៍ថា ក្នុងនាមប្រធាន​ក្រុមការងាររាជរដ្ឋាភិបាល និងប្រធានក្រុមការងារ គណបក្សប្រជាជនកម្ពុជា ចុះមូល​ដ្ឋាន​ខេត្តក្រចេះ សូមសម្តែងនូវការសោកស្តាយ ជូនចំពោះក្រុមគ្រួសារបងប្អូនពលរដ្ឋ​ចំនួន ៣ រូប ដែលបានបាត់បង់ជីវិតក្នុងឧបទ្ទវហេតុ នៃការលិចទូកកាលពីថ្ងៃទី២០ ខែកញ្ញា ឆ្នាំ២០២៤ កន្លងទៅ នៅក្នុងស្រុកចិត្របុរី ខេត្តក្រចេះ ខណៈដឹកដំឡូងមីឆ្លង​កាត់​ទន្លេឆ្ពោះទៅកាន់ទីផ្សារហើយជួបភ្លៀងខ្យល់ខ្លាំង។ តាមរយៈ លោក យ៉ិន វណ្ណៈ អភិបាល នៃគណៈអភិបាលស្រុកចិត្របុរី បានយកលិខិតរំលែកទុក្ខ និងបច្ច័យរបស់ខ្ញុំ ចូលរួមបន្ថែម ជូនក្រុមគ្រួសារសព។

ឯកឧត្តមរដ្ឋមន្ត្រីក្រសួងព័ត៌មាន បានបញ្ជាក់ថា នៅវេលាម៉ោង១៤ និង២០នាទី ថ្ងៃទី​២០ កញ្ញា ២០២៤ ជនរងគ្រោះចំនួន ៥នាក់ បានធ្វើដំណើរលើទូកមួយគ្រឿង ដឹកដំឡូ​ង​មី មកដល់ចំណុចបឹងរាំង ស្ថិតក្នុងភូមិខ្នងពស់ ឃុំដារ ស្រុកចិត្តបុរី ក៏បានជួបប្រទះ​ភ្លៀង និងខ្យល់ខ្លាំង បង្កើតជារលកទឹកធំៗ វ៉ៃទូកឲ្យលិចតែម្តង។ ឯកឧត្តមរដ្ឋមន្ត្រីបាន​បន្ត​ថា ជនរងគ្រោះក្នុងឧបទ្ទវហេតុខាងលើ មានចំនួន ៥នាក់ ខណៈមាន ២នាក់ រួចផុត​ជីវិត និងបីនាក់ទៀត លិចបាត់ទៅក្នុងទឹក បន្ទាប់ពីមានកិច្ចអន្តរាគមន៍ពីប្រជាពលរដ្ឋ និងអាជ្ញាធរពាក់ព័ន្ធកម្លាំងប្រដាប់អាវុធ លោកអភិបាលស្រុក អភិបាលរងស្រុក បានរក​ឃើញសាកសព ចំនួន២នាក់ នៅរសៀលថ្ងៃដដែល លុះព្រឹកឡើងថ្ងៃទី២១ កញ្ញា ២០២៤ ទើបរកឃើញសពម្នាក់ទៀត ។

ឯកឧត្តមរដ្ឋមន្ត្រី បានបញ្ជាក់ទៀតថា ក្នុងនាមប្រធានក្រុមការងាររាជរដ្ឋាភិបាល និង​ប្រធាន​ក្រុមការងារ គណបក្សប្រជាជនកម្ពុជា ចុះមូលដ្ឋានខេត្តក្រចេះ ខ្ញុំសូមអរគុណ​ដល់អាជ្ញាធរគ្រប់ជាន់ថ្នាក់ នៃខេត្តក្រចេះ ដែលបានខិតខំប្រឹងប្រែងជួយស្វែងរក​ជន​រងគ្រោះ និងបានចូលរួមរំលែកទុក្ខក្រុមគ្រួសារសព។ ឯកឧត្តមរដ្ឋមន្ត្រី ក៏បានបួងសួង​ដល់វិញ្ញាណក្ខន្ធជនរងគ្រោះទាំង ៣ រូបបានទៅកាន់សុគតិភពកុំបីខានឡើយ៕

ដោយ៖ឡុង សំបូរ