អភិបាលខេត្តកំពង់ធំចុះពិនិត្យស្ថានភាពនេសាទបឹងទន្លេសាបក្នុងភូមិសាស្ត្រឃុំផាត់សណ្ដាយ
កំពង់ធំ៖ ឯកឧត្តម នួន ផារ័ត្ន អភិបាលខេត្តកំពង់ធំ និងលោកជំទាវ ព្រមទាំងមន្រ្តីក្រុមការងារបានអញ្ជើញពិនិត្យស្ថានភាពជាក់ស្តែងនៅតំបន់ព្រៃលិចទឹកបឹងទន្លេសាបនៅរដូវបិទនេសាទ និងពិនិត្យមើលការរស់នៅរបស់បងប្អូនប្រជាពលរដ្ឋ នៅក្នុងឃុំផាត់សណ្តាយ ស្រុកកំពង់ស្វាយ ខេត្តកំពង់ធំ។
ក្នុងបេសកកម្មកាលពីថ្ងៃទី២៤ ខែកញ្ញា ឆ្នាំ២០២៤ ឯកឧត្តម នួន ផារ័ត្ន បានចុះពិនិត្យស្ថានភាពនៅចំណុចមួយចំនួនដូចជា តំបន់ចុងព្រែឆ្កោក តំបន់ក្រឡុកបាយក្អែក តំបន់ត្រួយវែង តំបន់ព្រែកបា តំបន់ព្រែកតាសោម តំបន់ព្រែកជើងលោង និងតំបន់មុំបី ដែលជាទឹកដីជាប់ព្រំប្រទល់រវាងខេត្តទាំងបី រួមមាន ខេត្តកំពង់ធំ ពោធិសាត់ និងខេត្តកំពង់ឆ្នាំង ។
ខណៈជួបជាមួយអាជ្ញាធរ មន្រ្តីជំនាញពាក់ព័ន្ធ និងប្រជាពលរដ្ឋ ឯកឧត្តម នួន ផារ័ត្ន បានអំពាវនាវដល់សហគមន៍នេសាទទាំងអស់ និងអាជ្ញាធរសូមបន្តផ្សព្វផ្សាយពីច្បាប់នេសាទជូនដល់ប្រជាពលរដ្ឋនៅក្នុងតំបន់នេះ នៅរដូវបិទនេសាទ និងរដូវត្រីពងកូន ។ដោយឡែកគ្រប់សហគមន៍ទាំងអស់ក៏ត្រូវរៀបចំជាតំបន់អេកូទេសចណ៍ធម្មជាតិ ដើម្បីទាក់ទាញទេសចរជាតិ អន្តរជាតិ មកទស្សនាសត្វស្លាប ទស្សនាផ្ទះបណ្ដែតទឹក ជីវៈចម្រុះ ។ល។ពីព្រោះនៅបណ្ដាទីតាំងទាំងនេះសុទ្ធសឹងតែមានសក្ដានុពលទេសចរណ៍ផងដែរ បន្ថែមលើមុខរបរនេសាទ។ធ្វើបែបនេះនឹងបង្កើនចំណូលសម្រាប់គ្រួសារផងដែរ៕
ដោយ៖ប៊ុនរដ្ឋា
