ភ្នំពេញ៖ ការិយាល័យកយកា-KOICA ប្រចាំកម្ពុជា កាលពី ថ្ងៃទី២៦ ខែកញ្ញា ឆ្នាំ២០២៤ បានបើកវគ្គតម្រង់ទិសមុនចេញដំណើរ សម្រាប់មន្ត្រីរដ្ឋាភិបាលកម្ពុជា មកពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្ដន៍ ព្រមទាំងភ្នាក់ងារ​កម្មសិទ្ធិ​​បញ្ញានិងមន្ត្រីកម្មសិទ្ធិបញ្ញា ក្នុងវិស័យឯកជន ដែល ត្រូវបានជ្រើសរើសសម្រាប់​វគ្គបណ្តុះបណ្តាលស្តីពី “ការកសាងសមត្ថភាពសម្រាប់កម្មសិទ្ធិបញ្ញា និងប្រព័ន្ធកម្មវិធី​ទទួល​ស្គាល់ប្រកាសនីយបត្រតក្កកម្មនៅកម្ពុជាសម្រាប់ឆ្នាំ២០២៣ ដល់ឆ្នាំ២០២៥” ចាប់ពីថ្ងៃទី៦ ដល់ថ្ងៃទី១៧ ខែតុលា ឆ្នាំ២០២៤ នៅសាធារណរដ្ឋកូរ៉េ។

គោលបំណងនៃកម្មវិធីបណ្តុះបណ្តាលនេះ គឺដើម្បីលើកកម្ពស់កំណើនសេដ្ឋកិច្ច ប្រកបដោយចីរភាពនៅកម្ពុជា តាមរយៈការពង្រឹងសមត្ថភាពរបស់អ្នកជំនាញកម្ម​សិទ្ធិបញ្ញា ក្នុងការបង្កើត និងធ្វើពាណិជ្ជកម្មកម្មសិទ្ធិបញ្ញា ។ លើសពីនេះ មានគោល​បំណងលើកទឹកចិត្តដល់សកម្មភាពអាជីវកម្ម ដែលជំរុញដោយកម្មសិទ្ធិបញ្ញា រវាង​សហគ្រាសធុនតូច និងមធ្យមរបស់កូរ៉េ និងកម្ពុជា តាមរយៈជំនាញរបស់អ្នក​ជំនាញ​ទាំងនេះ។ ទីបំផុត កម្មវិធីស្វែងរកការបង្កើតឱកាសអាជីវកម្មថ្មី​ដោយប្រើប្រាស់អំណាច​នៃកម្មសិទ្ធិបញ្ញា។

កម្មវិធីបណ្តុះបណ្តាលនេះរួមមានសិក្ខាកាមសរុបចំនួនម្ភៃ(២០)នាក់ដែលរួមមានមន្ត្រីរដ្ឋាភិបាលកម្ពុជាមកពី មន្ត្រីរដ្ឋាភិបាលកម្ពុជា មកពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្ដន៍ ព្រមទាំងភ្នាក់ងារកម្មសិទ្ធិបញ្ញានិងមន្ត្រីកម្មសិទ្ធិបញ្ញា ក្នុងវិស័យឯកជន។ ឆ្នំានេះជាឆ្នាំទី២ នៃកម្មវិធីនេះ បន្ទាប់ពីវគ្គបណ្តុះបណ្តាលឆ្នាំទី១ ដែលធ្វើឡើងដោយជោគជ័យនៅទីក្រុងភ្នំពេញ ប្រទេសកម្ពុជា។

កម្មវិធីតម្រង់ទិសមុនចេញដំណើរក៏មានការចូលរួមពីសិក្ខាកាមមកពីកម្មវិធីបណ្តុះបណ្តាលជាសាកលចំនួនបីវគ្គ ដែលរួមមានមន្ត្រីរដ្ឋាភិបាលមកពី ១)-ក្រសួងប្រៃសណីយ៍ និងទូរគមនាគមន៍ ២)-ក្រសួងរ៉ែ និងថាមពល និង ៣)- ក្រសួងសេដ្ឋកិច្ច និងហិរញ្ញវត្ថុ។

ក្នុងឱកាសបើកវគ្គតម្រង់ទិសមុនចេញដំណើរ លោកស្រី លី សេជីន (Lee Sejin) នាយិ​កា​រងប្រចាំប្រទេសនៃការិយាល័យ កយកា-KOICA ប្រចាំប្រទេសកម្ពុជា បានអបអរ​សា​ទរ​​ដល់សិក្ខាកាម និងបានផ្តល់នូវចំណេះដឹងដ៏មានតម្លៃចំពោះ​កម្មវិធីបណ្តុះ​បណ្តាល​កយកា-KOICA។ លោកស្រី ក៏បានសម្តែងក្តីសង្ឃឹមថា កម្មវិធីនេះនឹងបំពេញតាមគោល​បំណងរបស់ខ្លួន ផ្តល់នូវបទពិសោធន៍ដ៏ល្អមួយ និងលើកកំពស់សមត្ថភាព​របស់សិក្ខា​កាមទាំងអស់។ លោកស្រី បានលើកទឹកចិត្តដល់សិក្ខាកាមទាំងអស់ ឱ្យទទួលបាន​ឱកាសពិសេសនេះ ដើម្បីស្វែងយល់ពីដំណើរការអភិវឌ្ឍរបស់ប្រទេសកូរ៉េ អំឡុងពេល​ស្នាក់​នៅសាធារណរដ្ឋកូរ៉េ និងចែករំលែកចំណេះដឹងដែលទទួលបាននៅពេលត្រឡប់​មកកម្ពុជាវិញ ដើម្បីរួមចំណែកដល់ការអភិវឌ្ឍប្រកបដោយចីរភាព។

នៅក្នុងកម្មវិធីតម្រង់ទិសមុនការចេញដំណើរនេះ មន្ត្រីកយកា-KOICA ប្រចាំប្រទេស​កម្ពុជា បានផ្តល់នូវទិដ្ឋភាពសង្ខេបនៃវគ្គបណ្តុះបណ្តាល និងសិក្ខាកាមបានយក់ពីកម្មវិធី​បណ្តុះ​បណ្តាលរបស់កយកា-KOICA។ កម្មវិធីនេះក៏មាន កម្មសិក្សាការី ដែលបាន​បញ្ចប់​​ការ​សិក្សាមកពីប្រទេសកូរ៉េ តាមរយៈកយកា-KOICA បានចែករំលែកព័ត៌មាន និងបទពិសោធន៍ ដែលមានប្រយោជន៍អំពីជីវិតនៅក្នុងប្រទេសកូរ៉េ និង មន្រ្តីកយកា-KOICA បានគូសបញ្ជាក់ពីគោលការណ៍ណែនាំសំខាន់ៗ រួមទាំងក្រមសីលធម៌ និង​គោលនយោបាយទាក់ទងនឹងការបៀតបៀនផ្លូវភេទផងដែរ ។

សិក្ខាកាមដែលបានជ្រើសរើសបានបង្ហាញពីការដឹងគុណរបស់ពួកគេចំពោះ កយកា-KOICA និងរដ្ឋាភិបាលកូរ៉េស ម្រាប់ការគាំទ្រ ហើយពួកគេបានបង្ហាញការចូលរួម និង​ការ​ប្តេជ្ញាចិត្តពេញមួយវគ្គ ដើម្បីលើកកម្ពស់ការកសាងសមត្ថភាព សម្រាប់ការ​យល់ដឹង​ដ៏ទូលំទូលាយអំពីកម្មសិទ្ធិបញ្ញា និង កម្មវិធីទទួលស្គាល់ប្រកាសនីយបត្រតក្កកម្ម ។

គួរកត់សម្គាល់ថា ចាប់តាំងពីឆ្នាំ១៩៩៤មក កម្មវិធីបណ្តុះបណ្តាលរបស់កយកា-KOICA បានគាំទ្រដល់មន្ត្រីរដ្ឋាភិបាលកម្ពុជា ដែលមានសិក្ខាកាមបានបញ្ចប់កម្មវិធីបណ្តុះ​បណ្តា​ល​​សរុបចំនួន៣ ៧៧៣នាក់ ក្នុងកម្មវិធីជំនួយផ្សេងៗ ដូចជា កម្មវិធីបណ្តុះបណ្តាល​សម្រាប់​ប្រទេស ការបណ្តុះបណ្តាលជាសកល និងកម្មវិធីអាហារូបករណ៍។ កយកា-KOICA នឹងបន្តគាំទ្រ និងអនុវត្តកម្មវិធីនានាក្នុងប្រទេសកម្ពុជា ដែល​កំណត់​គោលដៅ​អភិវឌ្ឍន៍ធនធានមនុស្ស៕

ដោយ ៖ ង៉ាន់ ទិត្យ