ស្វាយរៀង៖ឃុំដូនស ស្រុកស្វាយជ្រំ ខេត្តស្វាយរៀង​មាន​វត្តចំនួន៣ គឺ វត្តល្ងើន វត្តសូរ ទី៣និងវត្តសាមគ្គីបឹងកែក។ ក្នុងឱកាសបុណ្យភ្ជុំបិណ្ឌនេះតាំងពីវេនបិណ្ឌ១រហូតដល់វេនបិណ្ឌទី១៤មានប្រជាពុទ្ធបរិស័ទជិតឆ្ងាយបានមកចូលរួមកាន់បិណ្ឌដោយសប្បាយរីករាយ ។នេះដោយជីវភាពប្រជា​ពលរដ្ឋនិងហេដ្ឋារចនាសម្ព័ន្ធផ្លូវនៅជនបទកាន់តែត្រូវបានកែលំអជា​ ផ្លូវបេតុង ផ្លូវក្រាលថ្មភ្នំជាដើម ងាយស្រួលក្នុង​ការធ្វើដំណើរ។

លោកស្រី ជា ស៊ីម មេឃុំដូនស ស្រុកស្វាយជ្រំ ​បាននិយាយ​ថា ដើម្បីជួយរៀបចំសណ្ដាប់ធ្នាប់នៅក្នុងឱកាស បុណ្យភ្ជុំ​បិណ្ឌនេះក្នុងនាមគណៈបញ្ជាការឯកភាពឃុំ បានរៀបចំ​កម្លាំងទាំងក្រុមប្រឹក្សាឃុំ ប៉ុស្តិ៍រដ្ឋបាល ប្រជាការពារ ដើម្បី​សម្រួលការធ្វើដំណើរជូនដល់ប្រជាពលរដ្ឋ ពុទ្ធបរិស័ទ ដែលបានអញ្ជើញមកចូលរួមកាន់បិណ្ឌតាមវត្តនានា។

លោកស្រីបន្តថា ដោយសារមានផ្លូវគមនាគមន៍ល្អ ធ្វើឱ្យ​ប្រជាពលរដ្ឋអាចមកធ្វើបុណ្យ ធ្វើទានបានដោយ​សប្បាយ​រីករាយ ។ក្នុងឆ្នាំ ២០២៤នេះ​​ឃុំបានស្ថាបនាផ្លូវលំបានមួយ​ខ្សែប្រវែងជាងមួយគីឡូម៉ែត្រដោយក្រាលខ្សាច់ភ្នំ នៅភូមិ​ព្រៃរកា និងធ្វើផ្លូវបេតុងគម្រោងបន្តបានប្រវែង៤២២​ម៉ែត្រ។

ទន្ទឹមនឹងថវិកាមូលនិធិឃុំ សង្កាត់ ក៏មានសប្បុរសជននិង​ក្រុមការងារជួយផងដែរ ដូចជា ផ្លូវពីវត្តល្ងើនទៅភូមិបឹង​កែកដែល មានសភាព​សំបុក មាន់ត្រូវបានជួសជុលដោយ​គ្រឿងចក្រកៀរក្រាលថ្ម ។ ខ្សែទី២ ពីផ្លូវបេតុងភូមិ​រំពាត់​ជ្រូក ទៅវត្តសូក៏ត្រូវ បានជួសជុល និងផ្លូវមួយខ្សែទៀត​ពីភូមិដូងព្រះ ទៅផ្លូវអន្តរឃុំអង្គតាសូ​ប្រវែងមួយគីឡូម៉ែត្រ។

លោកស្រីរំលឹកថាឆ្នាំនេះមិនដូចឆ្នាំមុនៗទេ។ឆ្នាំមុនៗឱ្យ​តែដល់រដូវបុណ្យភ្ជុំបិណ្ឌមានភ្លៀងធ្លាក់ជោកជាំធ្វើឱ្យមានការលំបាកខ្លះក្នុងការធ្វើដំណើរ។ក្នុងនាមលោកស្រីនិង​ក្រុមប្រឹក្សាឃុំ ពិតជាសប្បាយរីករាយណាស់ដែលមាន​សប្បុរសជនជិតឆ្ងាយ ក៏ដូចជាក្រុមការងារចុះជួយឃុំ និងព្រះសង្ឃ បានស្រុះស្រួលមូលមតិគ្នាជួយជាថវិកា​ជួលគ្រឿងចក្រមកជួសជុលផ្លូវនានា នៅឃុំដូនស៕

ដោយ៖នុត នាង