ភ្នំពេញ ៖ តាមរយៈបាឋកថា ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាម​ពលបានលើកឡើងអំពីគម្រោងវិនិយោគលើវិស័យ អគ្គិសនី ចំនួន ២៣​គម្រោង មានតម្លៃប្រមាណ ៥,៧៩០លានដុល្លារអាមេរិកដែលគណៈរដ្ឋមន្ដ្រី​ដឹកនាំដោយសម្ដេចមហា បវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានអនុម័ត កាលពីសប្ដាហ៍កន្លងទៅនេះ។

បាឋកថានេះ បានធ្វើឡើងក្នុងវេទិកាពិភាក្សាស្តីពី «គោលនយោបាយថាម​ពលកម្ពុជា» ដែលរៀបចំឡើងដោយក្លិបអ្នក កាសែតកម្ពុជា នៅមជ្ឈមណ្ឌល​សហប្រតិបត្តិការ កម្ពុជា-ជប៉ុន (CJCC)កាលពីរសៀលថ្ងៃទី៤ ខែតុលា ឆ្នាំ២០២៤នេះ ។

វេទិកាពិភាក្សានេះ ធ្វើឡើងដោយមានការគាំទ្រពីក្រសួងរ៉ែ និងថាមពល និងសកលវិទ្យាល័យភូមិន្ទភ្នំពេញ ក្នុងគោលបំណង ដើម្បីផ្តល់ឱកាសដល់​អ្នកសារព័ត៌មានបានស្វែងយល់អំពីគម្រោងថាមពលស្អាត ឬថាមពលកើត​ឡើងវិញ ។ អញ្ជើញចូលរួមក្នុងវេទិកានេះផងដែររួមមាន លោក ពុយ គា ប្រធានក្លិបអ្នកកាសែតកម្ពុជា,អ្នកសារព័ត៌មានចំនួន ៤៩នាក់ មកពី៣៥​ស្ថាប័ន ព្រមទាំងសិស្សនិសិត្សជាង៤០០នាក់។

ក្នុងកិច្ចពិភាក្សា បានផ្តល់ឱកាសឱ្យអ្នកសារព័ត៌មាន បានលើកជាសំណួរ​ពាក់ព័ន្ធនឹងភាពវិវឌ្ឍន៍ថ្មីៗនៃវិស័យអគ្គិសនីនៅកម្ពុជា ហើយឯកឧត្តមរដ្ឋមន្ត្រី បកស្រាយ និងពន្យល់បន្ថែមទាក់ទងប្រធានបទដ៏មានសារៈសំខាន់នេះ។

នៅក្នុងវេទិកាឯកឧត្តម កែវ រតនៈបានថ្លែងអំពីភាពវិវឌ្ឍន៍ថ្មីៗនៃវិស័យថាមពល​ដើម្បីផ្តល់ឱកាសដល់អ្នកសារព័ត៌មានបានស្វែង យល់អំពីគម្រោងថាមពល​ស្អាតឬថាមពលកកើតទ្បើងវិញនៅកម្ពុជាដែលរាជរដ្ឋាភិបាលទើបនឹងអនុម័តជាប្រវត្តិសាស្ត្រនាពេលថ្មីៗនេះ ។ ឯកឧត្តមរដ្ឋមន្រ្តី បានលើកឡើងពីគោល​នយោបាយនៃការអភិវឌ្ឍន៍វិស័យថាមពលនៅកម្ពុជាដែលរាជរដ្ឋាភិបាល ក្នុងអាណត្តិទី៧ បានផ្តោតទៅលើមុំ៤ សំខាន់ៗ គឺមានប្រភពផ្គត់ផ្គង់គ្រប់គ្រាន់ ថាមពលកាន់តែស្អាត ថ្លៃសមរម្យ មានស្ថេរភាព និងមានសមធម៌ ដើម្បីធ្វើឱ្យ​ការ​រស់នៅ និងការធ្វើអាជីវកម្មនៅកម្ពុជាកាន់តែមិនសូវ​ជាប់ការលំបាក។

ដោយឡែកគម្រោងវិនិយោគដែលទើបគណៈរដ្ឋមន្ដ្រីអនុម័តនេះ គឺមាន​គម្រោង​មួយជាគម្រោងប្រវត្តិសាស្ដ្រសម្រាប់ប្រទេស កម្ពុជា គឺការប្រើប្រាស់​ថាមពលដើរដោយកម្លាំងខ្យល់។គម្រោងទាំង២៣គម្រោងនេះ មានអានុភាព​សរុបចំនួន៣៩៥០ មេហ្គាវ៉ាត់ ភាគច្រើនបំផុតគឺជាថាមពលស្អាតដែល​មានរហូតដល់ ២១គម្រោង ក្នុងនោះរួមមាន ថាមពលពន្លឺព្រះអាទិត្យ ឈរលំដាប់លេខ១, ថាមពលវារីអគ្គិសនី ឈរលំដាប់លេខ២ និងថាមពល​ខ្យល់ ឈរលំដាប់លេខ៣។

ឯកឧត្តមរដ្ឋមន្ដ្រីក្រសួងរ៉ែ និងថាមពល បានបញ្ជាក់ថា គម្រោងដែលត្រូវបាន​គណៈរដ្ឋមន្ដ្រីអនុម័តនេះគឺជាការយកមូលដ្ឋាន គ្រឹះក្នុងអាណត្តិចាស់ ដែលដឹក​នាំដោយសម្ដេចតេជោ ហ៊ុន សែន មកពង្រឹង និងពង្រីកថាមពលស្អាតឱ្យ​កាន់​តែធំតាមរយៈការ ពង្រីកថាមពលដើរដោយពន្លឺព្រះអាទិត្យ ហើយយកទៅ​ពង្រីក​ទៅប្រភេទថ្មីមួយទៀត គឺថាមពលដើរដោយកម្លាំងខ្យល់ ដែលមាន​អានុភាព​សរុបចំនួន៩០០មេហ្គាវ៉ាត់ មានចំនួន៦គម្រោងនៅក្នុងខេត្ត​មណ្ឌលគិរី។

គម្រោងអភិវឌ្ឍវិស័យអគ្គិសនីទាំង ២៣គម្រោង ខាងលើនេះមាន៖ គម្រោង​ថាមពលពន្លឺព្រះអាទិត្យ ចំនួន ១២គម្រោង គម្រោងថាមពលខ្យល់ ចំនួន ៦គម្រោង គម្រោងជីវម៉ាស (Biomass) ផ្តុំជាមួយថាមពល​ពន្លឺព្រះអាទិត្យ ចំនួន ១គម្រោង គម្រោងផលិតអគ្គិសនីដើរដោយឧស្ម័ន (LNG) ចំនួន ១គម្រោង គម្រោងវារីអគ្គិសនី ចំនួន ១គម្រោង និងគម្រោងស្ថានីយស្តុក​ថាមពល ចំនួន ២គម្រោង។ ក្នុងគម្រោងអភិវឌ្ឍន៍សរុបចំនួន ២៣ខាងលើ មានគម្រោងអភិវឌ្ឍស្ថានីយផលិតអគ្គិសនី ចំនួន ២១គម្រោង ដែលមាន​អានុភាព​សរុប ៣ ៩៥០មេហ្គាវ៉ាត់ និងមានគម្រោងអភិវឌ្ឍស្ថានីយស្តុក​ថាមពល ចំនួន ២គម្រោង ដែលមានអានុភាព ២ ០០០មេហ្គាវ៉ាត់។
តាមការពិនិត្យ និងវិភាគលើលក្ខណៈបច្ចេកទេស សេដ្ឋកិច្ច និងសង្គម ការអភិវឌ្ឍគម្រោង ២៣នេះ មានផលប្រយោជន៍ចំពោះព្រះរាជា​ណាចក្រ​កម្ពុជា ក្នុងការបំពេញប្រភពអគ្គិសនីឱ្យបានគ្រប់គ្រាន់ និងទាន់ពេលតាម​កំណើននៃតម្រូវការអគ្គិសនីដែលកើនឡើង ផ្តល់ប្រភពអគ្គិសនីដល់​ប្រព័ន្ធបណ្តាញជាតិ ដើម្បីអាចធ្វើការផ្គត់ផ្គង់​អគ្គិសនីមួយដែលអាចទុក​ចិត្តបាន និងមានតម្លៃសមរម្យ ដល់អ្នកប្រើប្រាស់គ្រប់ប្រភេទនៅ​គ្រប់ទីកន្លែងនៅ កម្ពុជា៕
ដោយ៖គង់ សុផុល