បាត់ដំបង៖ការអនុវត្តច្បាប់ស្ដីពី៖ ការប្រកួតប្រជែង ច្បាប់ស្ដីពីកិច្ច​ការពារអ្នកប្រើប្រាស់ និងបទប្បញ្ញត្តិពាក់​ព័ន្ធ ក្នុងការធ្វើពាណិជ្ជកម្ម តាមប្រព័ន្ធអេឡិចត្រូនិក និងកម្មសិទ្ធិបញ្ញា សម្រាប់សហគ្រាសធុនតូច និងមធ្យម ត្រូវបានលើកមកធ្វើជាប្រធានបទក្នុង​សិក្ខា​សាលាមួយ​នៅសាលាខេត្តបាត់ដំបងកាលពីថ្ងៃទី៨ ខែតុលា ឆ្នាំ២០២៤។

សិក្ខាសាលានេះរៀបចំដោយអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការ​ក្លែង​បន្លំ(ក.ប.ប.)នៃ​ក្រសួង​ពាណិជ្ជ​កម្មដោយមានការអញ្ជើញចូលរួមពីលោក ផេង សិទ្ធី អភិបាលរងខេត្តបាត់ដំបង តំណាងស្ថាប័នអយ្យការអម​សាលាដំបូង តំណាងអង្គភាពកងកម្លាំងតំណាង ស្ថាប័ន​ អង្គភាព មន្ទីរជំនាញ​ពាក់ព័ន្ធជុំវិញខេត្ត សមាគមសហគ្រិនស្ត្រីកម្ពុជា សមាគមសហគ្រិន​វ័យក្មេង សភាពាណិជ្ជកម្មកម្ពុជា អាជ្ញាធរក្រុង ស្រុក និង ម្ចាស់​សហគ្រាស​ធុនតូច និងមធ្យមជាច្រើននាក់។

ឯកឧត្ដម ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនា​យកនៃអគ្គនាយកដ្ឋានការពារអ្នកប្រើ​ប្រាស់ កិច្ចការប្រកួត​​ប្រជែង​និងបង្រ្កាបការក្លែងបន្លំ«ក.ប.ប.»បានប្រាប់ថា អង្គសិក្ខាសាលានេះ​គឺផ្តោតសំខាន់ ស្ដីពីការពិភាក្សា​ផ្លាស់ប្ដូរទស្សនទាន លើការអនុវត្តច្បាប់​ស្ដីពីការប្រកួតប្រជែង ច្បាប់ស្ដីពីកិច្ចការពារអ្នកប្រើប្រាស់ និង​បទប្បញ្ញត្តិ​ដែល​ពាក់ព័ន្ធ​ក្នុងការធ្វើពាណិជ្ជកម្មតាម​ប្រព័ន្ធអេឡិចត្រូនិក និងកម្មសិទ្ធិបញ្ញា សម្រាប់សហគ្រាសធុនតូច និងមធ្យមក្នុងខេត្ត។

ចំណែកលោក ផេង សិទ្ធី អភិបាលរងខេត្តបាត់ដំបង បានលើកទឹក​ចិត្តឱ្យសិក្ខាកាមចូលរួមទាំងអស់មាន​អ្នកអនុវត្តច្បាប់និងធុរជន ដើម្បីពិភាក្សាលើបញ្ហានានាដែលពាក់ព័ន្ធនឹងកិច្ចការពារអ្នកប្រើប្រាស់ កិច្ចការប្រកួតប្រជែង សុវត្ថិភាពម្ហូបអាហារ ក៏ដូចជាបទ​ប្បញ្ញត្តិ​ពាក់ព័ន្ធផ្សេងទៀត សម្រាប់ការផ្លាស់ប្តូរ ការចែករំលែកនូវបទពិសោធន៍​ល្អៗ ក្នុងការស្វែងរកដំណោះស្រាយចំពោះ​​បញ្ហា​ប្រឈម ។ពិភាក្សា​ដើម្បីបន្តទំនាក់ទំនងគ្នា ព្រមទាំងចូលរួមគោរព ក៏ដូចជាអនុវត្ត​ច្បាប់​ទាំងនេះឱ្យមានប្រសិទ្ធភាព និងធានាបាន​សុខសុវត្ថិភាពដល់អ្នកប្រើ​ប្រាស់។