អគ្គស្នងការដ្ឋាននគរបាលជាតិ និង សម្ព័ន្ធដាអនដាអូលរបស់កូរ៉េចុះអនុស្សរណៈនៃការយោគយល់ ដើម្បីអនុវត្តគម្រោងសាកល្បងធ្វើឲ្យប្រសើរឡើងនូវប្រពន័្ធគ្រប់គ្រងទិន្នន័យអនុវត្តច្បាប់ស្តីពីចរាចរណ៍ផ្លូវគោក
(ភ្នំពេញ)៖អគ្គស្នងការនគរបាលជាតិ នៃក្រសួងមហាផ្ទៃ បានសហការជាមួយ សម្ព័ន្ធ DAON DAOL (ដាអនដាអូល) នៃសាធារណៈរដ្ឋកូរ៉េ គ្រោងនឹងដាក់ដំណើរការគម្រោងសាកល្បងមួយក្នុងគោលបំណងធ្វើការកែលម្អសុវត្ថិភាពចរាចរណ៍នៅកម្ពុជា តាមរយៈការបង្កើតមូលដ្ឋានទិន្នន័យគ្រប់គ្រងច្បាស់លាស់ ពង្រឹងការគ្រប់គ្រង ប្រតិបត្តិការ បទល្មើសចរាចរណ៍ កាត់បន្ថយការកកស្ទះចរាចរណ៍ បង្ការគ្រោះថ្នាក់ និងកាត់បន្ថយការបំពុលបរិយាកាសនៅកម្ពុជា។
គួរបញ្ជាក់ថាពិធីចុះអនុស្សរណៈនៃការយោគយល់នេះបានធ្វើឡើងកាលពីថ្មីៗមកនេះដោយមានការចូលរួមពីសំណាក់ឯកឧត្តម ហ៊ឹម យ៉ាន រដ្ឋលេខាធិការ ក្រសួងមហាផ្ទៃ និងជាអគ្គលេខាធិការរងនៃគណៈកម្មាធិការជាតិសុវត្ថិភាពចរាចរណ៍ផ្លូវគោក តំណាងដ៏ខ្ពង់ខ្ពស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្តម LEE SEOUNG HO តំណាងសម្ព័ន្ធ DAON DAOL (ដាអនដាអូល) និងជាទីប្រឹក្សា នៃគណៈកម្មាធិការជាតិសុវត្ថិភាពចរាចរណ៍ផ្លូវគោកកម្ពុជា។
ថ្លែងក្នុងពិធីនេះ ឯកឧត្តម ហ៊ឹម យ៉ាន បានឱ្យដឹងថា ការចុះអនុស្សរណៈនៃការយោគយល់នេះ គឺជាជំហ៊ានដ៏មានសារៈសំខាន់ក្នុងការធ្វើឲ្យប្រសើឡើងវិញនូវប្រព័ន្ធគ្រប់គ្រងទិន្នន័យអនុវត្តច្បាប់ចរាចរណ៍ផ្លូវគោក របស់អគ្គស្នងការដ្ឋាននគរបាលជាតិ កម្ពុជា ដែលមានការទទួលខុសត្រូវក្នុងការអនុវត្តច្បាប់ចរាចរណ៍ផ្លូវគោកទូទាំងប្រទេស ។ កម្ពុជាចាប់តាំងពីមានកំណើនសេដ្ឋកិច្ច ក្រោមការដឹកនាំរបស់រាជរដ្ឋាភិបាលចាស់រហូតដល់រាជរដ្ឋាភិបាលថ្មីមក កំណើនយាន្តយន្តចេះតែមានការកើនឡើងច្រើនជាបន្តបន្ទាប់។
ឯកឧត្តមបានបន្តឱ្យដឹងដែរថា “គម្រោងនេះនឹងចាប់ផ្តើមអនុវត្តជាផ្លូវការនៅខែតុលា ឆ្នាំ២០២៤ ហើយនឹងជាជំហានដ៏គួរឲ្យកត់សំគាល់ និងសំខាន់មួយក្នុងដំណើររបស់ប្រទេសកម្ពុជាឆ្ពោះទៅកាន់ការគ្រប់គ្រងបទល្មើសតាមប្រព័ន្ធបច្ចេកវិទ្យា ប្រកបដោយនិរន្តភាព សុវត្ថិភាព និងប្រសិទ្ធភាព” ។
ជាមួយគ្នានេះដែរ ឯកឧត្តម ហ៊ឹម យ៉ាន បានមានប្រសាសន៍ដែរថា បច្ចុប្បន្នយើងមានប្រព័ន្ធទិន្នន័យ៤ ដែលកំពុងដំណើរការ រួមមានដូចជា៖ ប្រព័ន្ធទិន្នន័យយាន្តយន្ត ប្រព័ន្ធទិន្នន័យប័ណ្ណបើកបរ ប្រព័ន្ធទិន្នន័យគ្រោះថ្នាក់ និងប្រព័ន្ធទិន្នន័យពិន័យ និងដកពិន្ទុ ។
ដោយឡែក ឯកឧត្តម LEE SEOUNG HO បានបញ្ជាក់ដែរថាការចុះអនុស្សរណៈនៃការយោគយល់នៃភាគីទាំងពីរគឺជាប្រយោជន៍ដើម្បីឲ្យសុវត្ថិភាពចរាចរណ៍ផ្លូវគោកកាន់តែល្អប្រសើរឡើង។ ក្រៅពីនេះវាក៏នឹងបានចូលរួមរក្សាសណ្តាប់ធ្នាប់ ក៏ដូចជាការទប់ស្កាត់អត្រាគ្រោះថ្នាក់ចរាចរណ៍នៅកម្ពុជាផងដែរ ។
គួរបញ្ជាក់ផងដែរ សម្ព័ន្ធដាអនដាអូល ដែលរួមមាន ក្រុមហ៊ុន DAON DAOL Cambodia ក្រុមហ៊ុន NZERO ក្រុមហ៊ុន OSCO ក្រុមហ៊ុន INFRA TECH និងសាកលវិទ្យាល័យដឹកជញ្ជូនជាតិកូរ៉េ (KNUT) បានសហការរួមគ្នាជាមួយអគ្គស្នងការដ្ឋាននគរបាលជាតិ ផ្តោតសំខាន់លើការបង្កើតប្រព័ន្ធគ្រប់គ្រងប្រព័ន្ធអនុវត្តច្បាប់ចរាចរណ៍នៅកម្ពុជា ដើម្បីគ្រប់គ្រងប្រតិបត្តិការពិន័យ បទល្មើសចរាចរណ៍ គ្រោះថ្នាក់ និងកាត់បន្ថយការកកស្ទះចរាចរណ៍ បង្ការគ្រោះថ្នាក់ កាត់បន្ថយការបំពុលបរិយាកាស និងបង្កើតមូលដ្ឋានទិន្នដ្ឋានគ្រប់គ្រងច្បាស់លាស់ និងមានប្រសិទ្ធភាពនៅកម្ពុជា ៕
ដោយ ៖ ម៉ាដេប៉ូ
