សៀមរាប៖ក្រុមប្រឹក្សាខេត្តសៀមរាបបានធ្វើការណែនាំឱ្យគណៈអភិបាល​ខេត្តពង្រឹងការផ្តល់សេវាសាធារណៈឱ្យបានឆាប់រហ័ស ,ជំរុញសន្តិសុខ​ក្នុងសហគមន៍ និងការត្រួតពិនិត្យសំណង់សាធារណៈ ។ ការណែនាំនេះ​បានធ្វើឡើងកាលពីថ្ងៃទី១៤ ខែតុលា ឆ្នាំ២០២៤ ក្នុងកិច្ចប្រជុំសាមញ្ញ​លើកទី ៥ របស់ក្រុមប្រឹក្សាខេត្តសៀមរាប អាណត្តិទី៤ ។

កិច្ចប្រជុំដឹកនាំដោយឯកឧត្តម លី សំរិទ្ធ ប្រធានក្រុមប្រឹក្សាខេត្ត និង​លោក លី សារី អភិបាលរងខេត្ត។កិច្ចប្រជុំបានពិភាក្សា និង​អនុម័ត​លើកំណត់ហេតុការប្រជុំទី៤ កាលពីថ្ងៃទី១៦ ខែកញ្ញា ២០២៤, ពិនិត្យ និងអនុម័តរបាយការណ៍ប្រចាំខែកញ្ញា ២០២៤ស្តីពីការ​អនុវត្តការងារ​របស់រដ្ឋបាលខេត្តនិងពិនិត្យនិងអនុម័តសេចក្តីសម្រេចស្តីពីការបង្កើតក្រុមការងារសម្រាប់ចុះមូលដ្ឋាន។

នៅក្នុងប្រជុំឯកឧត្តម លី សំរិទ្ធ ប្រធានក្រុមប្រឹក្សាខេត្តបានជំរុញការធ្វើ​អត្ត​សញ្ញាណបណ្ណសញ្ជាតិខ្មែរឱ្យប្រជាពលរដ្ឋបានគ្រប់គ្នានិង​ការ​ទប់​ស្កាត់ការរាំងស្ទះក្នុងការបំពេញបែបបទនេះ។ឯកឧត្តមក៏បានសង្កត់ធ្ងន់លើការផ្តល់សេវាសាធារណៈដោយឆាប់រហ័ស ការជំរុញសន្តិសុខក្នុងសហគមន៍ និងការត្រួតពិនិត្យសំណង់សាធារណៈ ដែលមានការបំពានលើចំណីផ្លូវ៕
ដោយ៖ ​ប៊ុន ​រដ្ឋា