ក្រដាសប្រាក់ប្រភេទថ្មី ២០ម៉ឺនរៀល និយាយដោយសាមញ្ញ ជាប្រភេទក្រដាសប្រាក់អនុស្សាវរីយ៍ ដែលដាក់ចេញត្រឹម ២០លានសន្លឹកប៉ុណ្ណោះ
(ភ្នំពេញ)៖ ក្រដាសប្រាក់ប្រភេទថ្មី ២០ម៉ឺនរៀល និយាយសាមញ្ញជាប្រភេទក្រដាសប្រាក់អនុស្សាវរីយ៍ ដែលត្រូវបានដាក់ចេញត្រឹម ២០លានសន្លឹកប៉ុណ្ណោះ ដើម្បីអបអរសាទខួប២០ឆ្នាំ នៃការគ្រងរាជ្យសម្បត្តិ ព្រះមហាក្សត្រនៃកម្ពុជា ។ នេះជាការចេញមកបញ្ជាក់ពីសំណាក់ លោកជំទាវបណ្ឌិត ជា សិរី ទេសាភិបាលធនាគារជាតិកម្ពុជា តាមរយៈវីដេអូខ្លីប្រមាណជាង ៤នាទី នាព្រឹកថ្ងៃទី១៦ ខែតុលា ឆ្នាំ២០២៤ ។
លោកជំទាវ ជា សិរី ទេសាភិបាលធនាគារជាតិកម្ពុជា បានបញ្ជាក់ថា ការប្រកាសដាក់ចេញនូវក្រដាសប្រាក់ប្រភេទថ្មី២០០,០០០រៀល នៅថ្ងៃទី១៦ ខែតុលា ឆ្នាំ២០២៤ មិនប៉ះពាល់អ្វីដល់ចំនួនរូបិយវត្ថុដែលមាននៅក្នុងចរាចរនៃសេដ្ឋកិច្ចរបស់ប្រទេសកម្ពុជាទេ ។ ក្រដាសប្រាក់ប្រភេទថ្មី ២សែនរៀលនេះទៀតសោត ត្រូវបានដាក់ចេញត្រឹមចំនួន២០លានសន្លឹកប៉ុណ្ណោះ ដែលនិយាយសាមញ្ញជាប្រភេទក្រដាសប្រាក់អនុស្សាវរីយ៍ ដើម្បីអបអរសាទខួប២០ឆ្នាំ នៃការគ្រងរាជ្យសម្បត្តិ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។
ទេសាភិបាលធនាគារជាតិរូបនេះ បានឱ្យដឹងទៀតថា កន្លងមក មានការព្រួយបារម្ភ នៅពេលធនាគារជាតិកម្ពុជា ដាក់ចេញនូវប្រភេទធនប័ត្រថ្មី ថា រាជរដ្ឋាភិបាល ឬធនាគារជាតិកម្ពុជា ខ្វះលុយ ទើបត្រូវបោះផ្សាយក្រដាសប្រាក់បន្ថែម ។ ជុំវិញក្ដីបារម្ភនេះ ត្រូវបានលោកជំទាវ អះអាងថា ការដាក់ចេញនូវធនប័ត្រប្រភេទថ្មីនេះ គ្រាន់តែជំនួសក្រដាសប្រាក់ចាស់ ទក់ រហែក ដែលធនាគារជាតិបានដកចេញពីចរាចរ ។
លោកជំទាវ ទេសាភិបាលធនាគារជាតិកម្ពុជា បានពន្យល់បន្ថែមថា ការដាក់ចេញក្រដាសប្រាក់ប្រភេទថ្មីនេះ គឺគ្រាន់តែជំនួសក្រដាសប្រាក់ចាស់ ទក់ រហែក ដែលយើងបានដកចេញពីចរាចរណ៍ ដែលមានន័យថា កន្លងមក នៅពេលដែលធនាគារជាតិនៃកម្ពុជា បានដាក់ធនប័ត្រទៅក្នុងចរាចរណ៍ ធនបត្រនោះ គឺតែងតែមានការចាស់ ទក់ រហែក ជារឿងធម្មតា។ ដូច្នេះហើយ រាល់ពេលដែលធនាគារជាតិនៃកម្ពុជា ប្រមូលនូវប្រភេទក្រដាសប្រាក់នេះ ចូលមកធនាគារជាតិវិញ គឺត្រូវយកទៅជ្រើសរើសយកក្រដាសប្រាក់ណាដែលចាស់ ខណៈក្រដាសប្រាក់ខ្លះ ចាស់ដែរ ប៉ុន្តែនៅប្រើប្រាស់បាន ក៏យកទៅដាក់ឱ្យចរាចរណ៍ក្នុងសេដ្ឋកិច្ចឡើងវិញ ហើយក្រដាសប្រាក់ណា ដែលចាស់ ទក់ រហែកខ្លាំង មិនអាចដាក់ចូលទៅក្នុងចរាចរណ៍វិញបាន គឺទី១ ត្រូវយកទៅកាត់ជាកំណត់តូចៗ បន្ទាប់មកយកទៅដុតចោល នៅឡរបស់ធនាគារជាតិនៃកម្ពុជា ។ ចំនួនដែលកាត់ និងដុតនោះ ត្រូវបានកត់ត្រាទុកច្បាស់ថា មានទំហំប៉ុន្មាន ហើយធនាគារជាតិ នឹងជំនួសទៅតាមទំហំទឹកលុយដោយក្រដាសប្រាក់ថ្មី ។
តាមរយៈការពន្យល់ខាងលើ លោកជំទាវ ជា សិរី សង្ឃឹមថា នឹងមិនមានការយល់ច្រឡំ ឬបកស្រាយខុសពីការដាក់ចេញនូវធនប័ត្រប្រភេទថ្មីនេះទេ។ លោកជំទាវ ក៏បានអំពាវនាវឱ្យសាធារណជន ឱ្យស្រលាញ់ និងគាំទ្រ ក៏ដូចជាប្រើប្រាស់ក្រដាសប្រាក់រៀល រក្សាគុណតម្លៃរបស់ប្រាក់រៀល ឱ្យបានកាន់តែខ្លាំងផងដែរ ។
សូមជម្រាបថា រាជរដ្ឋាភិបាលកម្ពុជា តាមរយៈអនុក្រឹត្យដែលចុះហត្ថលេខា នៅថ្ងៃទី ១៦ ខែតុលា ឆ្នាំ២០២៤ បានប្រកាសអនុញ្ញាឱ្យចេញផ្សាយ ធ្វើចរាចរ និងប្រើប្រាស់ ទូទាំងប្រទេសកម្ពុជានូវធនប័ត្រអនុវស្សាវរីយ៍ប្រភេទ ២០០,០០០រៀលទន្ទឹមនឹង បណ្តាប្រភេទក្រដាសប្រាក់ដែលត្រូវបានចេញផ្សាយរួចហើយ។ យោងតាមអនុក្រឹត្យរាជរដ្ឋាភិបាល ធនាគារជាតិនៃកម្ពុជាបានផ្សព្វផ្សាយពីលក្ខណៈសម្គាល់នៃធនប័ត្រថ្មីខាងលើនេះ និងបានប្រាប់ឱ្យសាធារណជន ពិនិត្យសម្គាល់ធនប័ត្រថ្មីនេះឱ្យបានច្បាស់លាស់ ជៀសវាងការភ័ន្តច្រឡំ ៕
ដោយ ៖ វណ្ណលុក
