(ខេត្តកណ្តាល)៖ ដើម្បីថែរក្សាប្រពៃណី លើកស្ទួយវិស័យកីឡាអុំទូក និងបង្កបរិយា​កាស សប្បាយរីករាយ ជូនបងប្អូនប្រជាពលរដ្ឋក្រោមម្លប់សុខសន្តិភាព និងក្នុង​ឱកាស​អបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំ​បុក ទៅតាមទំនៀមទម្លាប់ប្រពៃណីខ្មែរយើង ដែលមានតាំងពីបុរាណកាលមក រដ្ឋ​បាល​ខេត្តកណ្តាល បានរៀបចំពិធីប្រណាំងទូក នៅក្រុងតាខ្មៅ ខេត្តកណ្តាល រយៈ​ពេល២ថ្ងៃ ចាប់ពីថ្ងៃទី១៧ ដល់ថ្ងៃទី១៨ ខែតុលា ឆ្នាំ២០២៤ ចាប់ផ្តើមហើយ ។

ពិធីប្រណាំងទូកនៅក្រុងតាខ្មៅនាឱកាសនេះ មានការអញ្ចើញជាអធិបតីភាពពី ឯកឧត្តមបណ្ឌិត ម៉ៅ ភិរុណ សមាជិកសភាមណ្ឌលកណ្ដាល ឯកឧត្តម នូ សាខន ប្រធានក្រុមប្រឹក្សា និង ឯកឧត្តម គួចចំរើន អភិបាលនៃគណៈអភិបាលខេត្ត និង​ដោយ​មានការចូលរួមពីមន្រ្តីរាជការ កងកំលាំងទាំងបី មន្ទីរនានាជំវិញខេត្ត និងប្រជា​ពលរដ្ឋ កីឡាករ យ៉ាងច្រើនកុះករ បានមកចូលរួម កម្សាន្តសប្បាយនូវព្រឹត្តិការណ៍​ដ៍អស្ចារ្យមួយនេះ ដែលកំពុងកើតមានក្រោមតំបូលនៃសុខសន្តិភាព។

គួរបញ្ជាក់ថា៖ការប្រណាំងទូកក្រុងតាខ្មៅឆ្នាំនេះ មានទូកចូលរួមប្រណាំងចំនួន ៦៦ទូក ក្នុងនោះ ៖ទូកអុំចំនួន ៣៣ទូក ទូកចែវ០៦ទូក ,ទូកអន្តរជាតិ ២៧ទូក ។

ទូកចូលរួមប្រណាំងទាំងអស់ គឺមកពីខេត្តកណ្តាលចំនួន៤១ទូក ទូករាជធានី ភ្នំពេញចំនួន៣ទូក និងបញ្ជាការដ្ឋានអង្គរក្សចំនួន០២ទូក, មានកម្លាំងចំណុះ​ទូកសរុប ៣.៩៩៤នាក់។ជាមួយគ្នានោះ ឯកឧត្តម អភិបាលខេត្តកណ្តាល បានឧបត្ថម្ភអំណោយ ជាគ្រឿង ឧបភោគ បរិភោគ និងថវិកាមួយចំនួន ដល់​បណ្តាទូក ដែលបានចូលរួមប្រណាំងផងដែរ៕

ដោយ ៖ ង៉ាន់ ទិត្យ