កំពង់ធំ៖ នៅទីបញ្ជាការដ្ឋានតំបន់ប្រតិបត្តិការសឹករងកំពង់ធំ យោធភូមិ​ភាគ​ទី៤ បានរៀបចំពិធីសំណេះសំណាលសម្រាប់យោធិន​ចូលសោធន​និវត្តន៍​ចំនួន ២៤រូប ។ពិធីនេះមានគោលបំណងបង្ហាញនូវការគោរព ស្រឡាញ់ចំពោះយោធិនដែលបាន​បំពេញតួនាទីក្នុងអង្គភាព​កងទ័ពក្នុង​អំឡុងសម័យសង្គ្រាមកន្លងមក។

ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង​កំពង់ធំដែលបានអញ្ជើញចូលរួមជាអធិបតីកាលពីព្រឹកថ្ងៃទី ១៧ ខែតុលា ឆ្នាំ ២០២៤បានថ្លែងអំណរគុណ និងគោរពចំពោះយោធិន​ទាំង២៤រូបដែលបានបញ្ចប់បេសកកម្ម និងត្រូវបាន​ក្រសួង​ការពារ​ជាតិដាក់ឱ្យចូលសោធននិវត្តន៍ប្រចាំឆ្នាំ ២០២៤ ។លោកក៏បានផ្ដាំ​ផ្ញើដល់​មន្រ្តីចូលនិវត្តន៍ទាំង២៤រូបបន្តថែរក្សាសុខភាព និងចូលរួមជា​សមាជិកសមាគមអតីតយុទ្ធជន ដើម្បីទទួលបានការគាំទ្របន្ថែម​ពីសមាគមនៅអនាគត។

ក្នុងឱកាសនេះដែរឧត្តមសេនីយ៍ទោ សោម ស៊ុន ក៏បានជូនអំណោយ​និងថវិកាមួយចំនួន ដែលបានផ្ដល់ដោយសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ។អំណោយមាន អង្ករ មី ទឹកត្រី ទឹកស៊ីអ៊ីវ ត្រីខកំប៉ុង និងថវិកាមួយចំនួន៕
ដោយ៖ ប៊ុន រដ្ឋា