សៀមរាប៖កាលពីថ្ងៃទី១៩ ខែតុលាឆ្នាំ២០២៤ឯកឧត្តម ឈី ឈីងសាន (Qu Qingshan) សមាជិកគណៈកម្មា​ធិការមជ្ឈិម និងជាប្រធានវិទ្យាស្ថាន​ប្រវត្តិសាស្ត្របក្ស និងអក្សរសាស្ត្រនៃគណៈកម្មាធិការមជ្ឈិមបក្សកុម្មុយនីស្តចិន និងសមាជិកគណៈ ប្រតិភូ បានអញ្ជើញមកធ្វើ​ទស្សនកិច្ច និងធ្វើបទឧទ្ទេសនាមស្ដីពីលទ្ធផល​សន្និបាតគណៈកម្មាធិការមជ្ឈិមលើកទី៣អាណត្តិ ទី២០ របស់គណបក្សកុម្មុយនីស្តចិន នៅសណ្ឋាគារសុខាអង្គរ ក្រុងសៀមរាប ។

ឯកឧត្តម អ៊ាន ឃុន សមាជិកគណៈកម្មាធិការកណ្តាល និងជាអនុប្រធានគណៈកម្មាធិការគណបក្សខេត្តនិងជាប្រធាន គណៈប្រចាំការនៃគណៈអចិន្ត្រៃយ៍គណបក្ស​ប្រជាជនកម្ពុជាខេត្តសៀមរាប ដែលទទួលស្វាគមន៍​គណៈប្រតិភូ និងអញ្ជើញចូលរួមស្តាប់បទ​ឧទ្ទេស​នាម បានគូសរំលេចថានេះបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំគណបក្សកុម្មុយនីស្តចិន ក្នុងការចែក​រំលែក​នូវព័ត៌មាន ទស្សនៈ និងបទពិសោធន៍ល្អៗ ដល់មន្ត្រីគណបក្សប្រជាជនកម្ពុជា និងស្របពេល​ដែលប្រទេស ទាំងពីរកំពុងប្រារព្ធ «ឆ្នាំនៃការផ្លាស់ប្ដូរ​រវាងប្រជាជន និងប្រជាជន ឆ្នាំ២០២៤» ។ឯកឧត្តមបន្តថា រយៈពេល៦៦ឆ្នាំនៃចំណង មិត្តភាពរវាងកម្ពុជា និងចិន គឺជាទំនាក់ទំនងយ៉ាង​ស្អិតរមួត។

មន្ត្រីគណបក្សប្រជាជនកម្ពុជានៃខេត្តចំនួន៤ រួមមាន សៀមរាប បាត់ដំបង បន្ទាយមានជ័យ និងខេត្តកំពង់​ធំបានចូលរួមស្តាប់បទឧទ្ទេសនាមនេះ ដោយមានការ​សម្របសម្រួលពីឯកឧត្តម ឆែ សុខទី សមាជិកគណៈ​កម្មាធិការកណ្តាលគណបក្សប្រជា ជនកម្ពុជា និងជាអនុប្រធានគណៈទាក់ទងការបរទេស។

សូមជម្រាបថា ក្រៅពីបទឧទ្ទេសនាម នៅថ្ងៃដដែលនោះ ឯកឧត្តម ឈី ឈីងសាន និងសមាជិកគណៈ​ប្រតិភូនឹង​អញ្ជើញ ទៅទស្សនាប្រាសាទអង្គរវត្ត ប្រាសាទបាយ័ន ប្រាសាទធម្មនន្ទ ប្រាសាទតាព្រហ្ម និង ចៅសាយទេវតា ប្រាសាទតាកែវ ដែលជួសជុលដោយក្រុមបុរាណវិទ្យាចិន ទស្សនាទិដ្ឋភាពក្នុងអាកាសយានដ្ឋានអន្តរជាតិសៀមរាប-អង្គរ ។ គណៈប្រតិភូបានធ្វើដំណើរមាតុភូមិនិវត្តន៍តាមជើងយន្តហោះចាកចេញអាកាសយានដ្ឋានអន្តរជាតិសៀមរាប-អង្គរ ៕
ដោយ៖​ប៊ុន​រដ្ឋា