កំពង់ចាម៖ដោយមិនបង្អង់យូរ បន្ទាប់ពីបានទទួល​ព័ត៌មានតាម​បណ្ដាញសង្គម ឯកឧត្តម អ៊ុន ចាន់ដា អភិបាលខេត្តកំពង់ចាម រួមក្រុមការងារខេត្ត មន្ត្រីបច្ចេក​ទេស អាជ្ញាធរមូលដ្ឋាន និងឯកឧត្តម ថោ ជេដ្ឋា​រដ្ឋមន្ត្រីក្រសួងធនធានទឹកនិងឧតុនិយមបាន
អញ្ជើញ​ពិនិត្យស្ថានភាពការបាក់ស្រុត ច្រាំងចូលទៅ​ក្នុងទន្លេមេគង្គ ស្ថិតនៅភូមិមាន់ដប់លើ (មុខវត្តមាត់ដប់ ) ឃុំមានជ័យ ស្រុកស្រីសន្ធរ។

កាលពីរសៀលថ្ងៃសៅរ៍ទី១៩ ខែតុលា ឆ្នាំ២០២៤​ឯកឧត្តមអភិបាលខេត្តកំពង់ចាម និងឯកឧត្តមរដ្ឋមន្ត្រី​ក្រសួងធនធានទឹក និងឧតុនិយម បានពិនិត្យច្រាំងទន្លេ​ដែលបាក់ស្រុតមានបណ្ដោយប្រវែង ៨០ម៉ែត្រនិងទទឹង ប្រវែងពី១៥ ទៅ២០ម៉ែត្រនៅភូមិមាន់ដប់លើ ឃុំមានជ័យ ស្រុកស្រីសន្ធរ។ក្នុងដំណើរពិនិត្យ​ផ្ទាល់​របស់មន្រ្តីជាន់ខ្ពស់នេះដែរ ក៏មានការនិមន្ត និងចូលរួម​ព្រះចៅអធិការវត្ត គណៈកម្មការវត្ត លោកគ្រូ អ្នកគ្រូ ព្រមទាំងប្រជាពលរដ្ឋដែលមានការព្រួយបារម្ភពីការបាក់ច្រាំងទន្លេនេះផងដែរ។

បន្ទាប់មកឯកឧត្តមរដ្ឋមន្រ្តី និងឯកឧត្តមអភិបាលខេត្ត បានបន្តចុះពិនិត្យច្រាំងទន្លេដែលបានបាក់ស្រុតនាពេលកន្លងស្ថិតនៅ ព្រំប្រទល់ ឃុំមានជ័យ ដែលនៅសល់​ចម្ងាយពីផ្លូវ ៧០បេ ប្រវែងពី២ ម៉ែត្រទៅ៣ម៉ែត្រ ប៉ុណ្ណោះ​។ 

ជាមធ្យោបាយក្នុងការសង្រ្គោះ ឯកឧត្តមរដ្ឋមន្ត្រី​ក្រសួង​ធនធានទឹក បានចាត់មន្ត្រីបច្ចេកទេសក្រសួង​សហការ​ជាមួយអាជ្ញាធរ​ ខេត្តកំពង់ចាម ដើម្បីសិក្សាលទ្ធភាព​ក្នុងការស្តារ និងជួសជុលច្រាំងទន្លេឡើងវិញ៕
ដោយ៖លី ពៅ