កំពត៖ក្នុងពិធីបិទវគ្គអប់រំនយោបាយថ្នាក់ខេត្តជំនាន់ទី៩ របស់គណៈកម្មាធិការគណបក្សប្រជាជនកម្ពុជាខេត្តកំពត កាលពី រសៀលថ្ងៃទី១៩ ខែតុលា ឆ្នាំ២០២៤ឯកឧត្តម ម៉ៅ ធនិន ប្រធានគណបក្សប្រជាជនកម្ពុជាខេត្តកំពត រំលឹកដល់មន្រ្តីគណបក្សត្រូវយកគោលការណ៍ និងចំណេះ​ដឹងផ្សេងៗទៅផ្សព្វផ្សាយឱ្យបានទូលំទូលាយ ជូនដល់ប្រជាពលរដ្ឋ។ ដើម្បីឱ្យការផ្សព្វផ្សាយមាន​ប្រសិទ្ធភាព គ្រូឧទ្ទេស និងសកម្មជនត្រូវចេះប្រើទេព​កោសល្យ និងសិល្បៈ។ពិសេសត្រូវរក្សាគោល ជំហរបក្ស “ហ៊ាននិយាយ ហ៊ានធ្វើ”។

ភូមិសាស្ត្រខេត្តកំពត ត្រូវបានបែងចែកជាបី ។ទី១ មាន៖ ស្រុកឈូក ,ជុំគិរី និងស្រុកដងទង់ ,ទី២.ស្រុកអង្គជ័យ, បន្ទាយមាស និងស្រុកកំពង់ត្រាច និងទី៣. ស្រុកទឹកឈូ ក្រុងបូកគោ និងក្រុងកំពត។ដោយផ្អែកលើភូមិសាស្រ្តនេះ ឯកឧត្តម ម៉ៅ ធនិន បាន​បន្តថា ដើម្បីឱ្យពលរដ្ឋយល់ដឹងកាន់តែច្បាស់ និងកាន់តែ​ទូលំទូលាយ អំពីគោលនយោបាយរបស់បក្ស ការដឹកនាំ ការអភិវឌ្ឍនិងចក្ខុវិស័យរបស់រាជរដ្ឋាភិបាលទៅអនាគត  ទាមទារឱ្យគ្រូឧទ្ទេស សកម្មជននៅតាមបណ្តាស្រុកក្រុង មន្ទីរអង្គភាព ចូលរួមផ្សព្វផ្សាយបន្ត នូវអ្វីដែលខ្លួន​បាន​ទទួលពីវគ្គអប់រំនយោបាយនេះឱ្យមានប្រសិទ្ធភាព ទៅតាម​ភូមិសាស្រ្តទាំងបីដែលខ្លួនធ្វើសកម្មភាព៕
ដោយ៖ សិលា សារិន