តាកែវ៖ ការទទួលបានចំណេះនៅក្រៅសាលាពិតជាមានសារសំខាន់បំផុតសម្រាប់​សិស្សានុសិស្សវ័យក្មេងដែលនឹងជួយឱ្យពួកគេបានរៀនសូត្រអនុវត្តដោយផ្ទាល់និងបានមើលឃើញសកម្មភាពពិតៗដែលពុំមានបង្រៀនក្នុងកម្មវិធីសក្សានៅក្នុងសាលារៀនពួកគេបានរៀនតាមរយ:សៀវភៅ ការចុះសង្កេត។

ដោយមើលឃើញពីសារសំខាន់ទាំងអស់នេះហើយទើបសាលាហ្គោលដិន វ៉ាលី អាកាដឺមី អហ្វហូប វើលវ៉ាយ តែងតែបង្កើតកម្មវិធីទស្សនកិច្ចសិក្សានៅក្នុងស្រុក សម្រាប់សិស្សយ៉ាងហោចណាស់ក្នុងមួយឆ្នាំពី៤ទៅ៥លើក ទៅកាន់តំបន់​រមណីដ្ឋានទេសចរណ៍ តំបន់ទេសចរណ៍ប្រវត្តិសាស្រ្ត តំបន់សេដ្ឋកិច្ច និងតំបន់​កសិកសិកម្ម ដែលប្រជាសហគមន៍ កំពុងរកស៊ីទទួលទានដោយផ្ទាល់។ ជាក់ស្តែង កាលពីចុងសប្តាហ៍កន្លងទៅថ្មីៗនេះ សាលាបានដឹកនាំសិស្សានុសិស្ស​ចាប់ពីថ្នាក់ទី​៤ដល់៦ចំនួន១៧០នាក់ និងលោកអ្នកគ្រូចំនួន ២២នាក់ ចុះធ្វើ​ទស្សនកិច្ច​សិក្សា​ទៅ​កាន់ សហគមន៍កសិកម្ម សួនបន្លែ ដែលមានទីតាំង ស្ថិតនៅភូមិត្រពាំងចក ឃុំ ត្រាំកក់ ស្រុក ត្រាំកក់ ខេត្ត តាកែវ មានចម្ងាយផ្លូវជាង ៩០គីឡូម៉ែត្រពីរាជធា​នីភ្នំពេញ​​។

អ្នកគ្រូ សាន ចាន់ថូ គ្រូថ្នាក់ទី៦នៃសាលាហ្គោលដិន វ៉ាលី អាកាដឺមី អហ្វហូប វើលវ៉ាយ បានពន្យល់ថា កក្តាចម្បងនៃទស្សនកិច្ចសិក្សានេះ សាលាមានគោល​ដៅចង់បណ្តុះផ្នាត់គំនិតដល់សិស្សានុសិស្សវ័យក្មេងបានមកសិក្សារៀនសូត្រនិងមើលឃើញដោយផ្ទាល់អំពីចំណេះដឹងដែលពុំមានការបង្រៀនចែករំលែកនៅក្នុងកម្មវិធីសិក្សាដែលសាលាបានបង្រៀនពួកគេឡើយ។ កម្មវិធីទស្សកិច្ចសិក្សាដោយផ្ទាល់​នេះហើយ និងជួយឱ្យពួកគេរៀនសូត្រនិងស្វែងយល់បានកាន់តែច្បាស់​នូវអ្វីដែល​កំពុងតែវិវឌ្ឍកើតឡើងនៅក្នុងសង្កមនៃការរស់នៅរបស់មនុស្សយើង។ ការមកដល់កន្លែងដោយផ្ទាល់បែបនេះ សិស្សានុសិស្ស និងបានសួរនូវអ្វីដែល​ជាចម្ងល់ ហើយក៏ទទួលបានចម្លើយត្រឡប់មកវិញពីប្រជាសហគមន៍​នូវចំណេះដឹងការដាំដុះ ដែលពួកគាត់ បានអនុវត្តជាប្រចាំ។

សិស្សានុសិស្សពីររូបដែលបានចូលរួមនៅក្នុងទស្សកិច្ចសិក្សាទៅកាន់សួនបន្លែ ទូច រម្យនា រៀនថ្នាក់ទី៦”B” និង រិទ្ធ គីមឡេង រៀនថ្នាក់ទី៦”A” បានបង្ហាញអារម្មណ៍​រីករាយដែលសាលាបានបង្កើតកម្មវិធីទស្សនកិច្ចសិក្សាមកកាន់សួនបន្លែទំនើប ស្ថិតនៅឃុំ ត្រាំកក់ ស្រុក ត្រាំកក់ខេត្ត តាកែវ ព្រោះទស្សនកិច្ចសិក្សានេះ បានរៀន​សូត្រពីប្រជាសហគមន៍ដោយផ្ទាល់អំពីការដាំ ការដាក់ជីនិងការថែទាំបន្លែរហូត​ដល់ការប្រមូលផល។ ហើយចំណេះដឹងនៃការដាំនេះទៀតសោធបានបង្រៀន​ឱ្យពួកគេបានយល់ដឹងនូវអ្វីដែលជាការដាំដោយមិនប្រើប្រាស់នូវសារធាតុជីគីមីដែលបង្កគ្រោះថ្នាក់ដល់អ្នកបរិភោគ។

ទស្សនកិច្ចសិក្សាដែលសាលាហ្គោលដិន វ៉ាលី អាកាដឺមី អហ្វហូប វើលវ៉ាយ បាន​បង្កើត​ឡើងនេះ មិនត្រឹមតែបង្រៀនឱ្យសិស្សបានយល់ដឹងអំពីបច្ចេកទេសការដាំដុះ​របស់ប្រជាសហគមន៍ ប៉ុណ្ណោះនោះទេ ពោលវាថែមទាំងបានបណ្តុះផ្នាត់គំនិតឱ្យ​សិស្ស​មាន​ចិត្តចេះជួយទៅដល់សង្គម នាពេលអនាគត ពិសេស បានបង្រៀន​ឱ្យពួកគេមានភាពជាម្ចាស់ការលើខ្លួនឯងនៅពេលនៅឆ្ងាយពីអាណាព្យាបាល និងបានបង្កើតបាននូវការប្រាស្រាយទាក់ទងល្អជាមួយមិត្តរួមសាលា ដែលជាបទពិសោធន៍ជួយឱ្យពួកគេ មានភាពក្លាហាន និងធ្វើអ្វីដោយមានការទទួលខុសត្រូវខ្ពស់ផងដែរ។

គួរឱ្យដឹងដែរថា សាលា ហ្គោលដិន វ៉ាលី អាកាដឺមី អហ្វហូប វើលវ៉ាយ បានចាត់​ទស្សនកិច្ច​សិក្សារបស់សិស្សជាការផ្តល់ចំណេះដឹងដ៏មានសារសំខាន់ចាំបាច់បំផុត ដែលជួយបង្រៀនឱ្យសិស្សទទួលបានបទពិសោធន៍ជាក់ស្តែង ដែលពុំមាននៅ​ក្នុងកម្មវិធីសិក្សារៀននៅក្នុងសាលា ហើយបានជួយឱ្យសិស្សចេះឆ្នៃប្រឌិត និងចេះរៀបចំគោលដៅជីវិតដោយខ្លួបឯង។

សូមបញ្ជាក់ថា ក្នុងមួយឆ្នាំៗសាលា ហ្គោលដិន វ៉ាលី អាកាដឺមី អហ្វហូប វើលវ៉ាយ បានបង្កើតទស្សនកិច្ចសិក្សាយ៉ាងហោចណាស់ពី៥ទៅ៦លើកបូករួមនិងទស្សនកិច្ចសិក្សាទៅក្រៅប្រទេស ដូចជាប្រទេសសិង្ហបុរីជាដើម៕

ដោយ ៖ ជាវ ចន្ធូ